ភ្នំពេញ៖ បើទោះបីជាបញ្ហាជំងឺកូវីដ១៩ កំពុងរាតត្បាតក៏ដោយ ក៏សកម្មភាពសាងសង់កំណាត់ផ្លូវជាតិលេខ៣នៅតែបន្ត ដែលធ្វើឲ្យផ្លូវមួយនេះក្លាយជាតំបន់ដែលមានសក្តានុពល ព្រោះថា បានរួមចំណែកច្រើនដល់ការធ្វើដំណើររបស់ប្រជាពលរដ្ឋ ការដឹកជញ្ជូនទំនិញផលិតផលផ្សេងៗ ជាតំបន់ទេសចរណ៍ធម្មជាតិ និងតំបន់ឆ្នេរសមុទ្រនៃប្រទេសកម្ពុជា ហើយត្រូវបានតភ្ជាប់ទៅរាជធានីភ្នំពេញ ដែលជាបេះដូងប្រទេស។
អ្នកជំនាញអចលនទ្រព្យមើលឃើញថា ការអភិវឌ្ឍន៍នេះ បានផ្តល់ក្តីសង្ឃឹមជាច្រើនដល់អ្នកវិនិយោគដីធ្លី គម្រោងបុរីលំនៅដ្ឋាន និងពាណិជ្ជកម្មផ្សេង។ អ្នកជំនាញ បានអះអាងថា អចលនទ្រព្យនៅតាមបណ្តោយផ្លូវជាតិលេខ ៣ បានកើនឡើងខ្លាំង នៅក្នុងរយៈពេល ២ ឆ្នាំចុងក្រោយនេះ ខណៈផ្លូវជាតិមួយនេះមានចំនួនគម្រោងលំនៅដ្ឋាន និងអគារពាណិជ្ជកម្មកើនឡើងច្រើន។
ជាក់ស្តែងគម្រោង ដឺ ហ្គ្រីន វីល (The Green Ville) ជាគម្រោងបុរីលំនៅដ្ឋានដែលសាងសងនៅតំបន់ផ្លូវជាតិលេខ៣ ដែលថ្មីៗនេះគម្រោងនេះ បានបើកសម្ពោធលក់ផ្ទះគំរូថ្មី នៅថ្ងៃទី៣១ ខែឧសភា ឆ្នាំ២០២០។
តំណាងគម្រោងខាងលើ បានឲ្យដឹងថា ផ្ទះគំរូថ្មី ដែលនឹងបើកសម្ពោធនេះ ជាប្រភេទផ្ទះប្រកបអាជីវកម្ម ស្ថិតនៅលើផ្លូវមេ ១៥ម៉ែត្រ តភ្ជាប់ពីផ្លូវជាតិលេខ៣ ទៅផ្លូវក្រវ៉ាត់ក្រុងទី៣ និងផ្លូវជាតិលេខ៤។ គម្រោងនេះ ទទួលបានការចាប់អារម្មណ៍ជាខ្លាំងក្នុងការវិនិយោគ ដោយសារមានទីតាំងត្រឹមតែ ៥០០ម៉ែត្រពីស្ពានអាកាសចោមចៅថ្មី។ តំបន់ខាងលើ និងជាតំបន់ផ្លូវជាតិលេខ៣នេះ មានផ្សារទំនើប រោងភាពយន្ត Prime Cineplex មន្ទីរពេទ្យ ហាងកាហ្វេ ភោជនីយដ្ឋាន និងសាលារៀនជាច្រើន ជាចរន្តផ្លូវធំខ្វាត់ខ្វែងឆ្លងកាត់ និងជាប់ផ្លូវក្រវ៉ាត់ក្រុងទី៣ ដែលជម្រុញឲ្យតម្លៃអចលនទ្រព្យ កើនឡើងជាខ្លាំង។ គម្រោងនេះ នៅជាប់ផ្លូវជាតិលេខ ៣ ដែលមានសួនច្បារ ២៤ម៉ែត្រ និងជាទីតាំងពោរពេញទៅដោយសក្ដានុពលសេដ្ឋកិច្ច ព្រមទាំងជាតំបន់មានសន្ទុះអភិវឌ្ឍន៍ខ្ពស់ និងអំណោយផលដល់ការប្រកបរបរអាជីវកម្មខ្លាំង។
គួរបញ្ជាក់ថា ការផ្លាស់ប្តូរតម្លៃដី អាចត្រូវបានគិតតាមចន្លោះផ្លូវនីមួយៗ ដូចជា ចាប់ពីចោមចៅ រហូតដល់ ស្ពានកំពង់ទួល ដែលជាព្រំប្រទល់ខេត្តកណ្តាល និងរាជធានីភ្នំពេញ តម្លៃដីសម្រាប់អភិវឌ្ឍន៍ឧស្សាហកម្មមានចំនួន ២០០ ដុល្លារទៅ ៤០០ ដុល្លារក្នុងមួយម៉ែត្រការ៉េ៕
ដោយ៖សម្ផស្ស
