ភ្នំពេញ៖ ក្រោយពីបានពិនិត្យឯកសារសំណុំរឿង សាកសួរចម្លើយតាមនីតិវិធី និងពិនិត្យភស្តុតាង តំណាងអយ្យការបានសម្រេចបើកការស៊ើបសួរ សំណុំរឿងប៊ីចេងក្លែងក្លាយ ត្រូវចោទប្រកាន់ពីបទ វេចខ្ចប់ ស្តុកនិងចែកចាយទំនិញក្លែងបន្លំម៉ាក ហើយបញ្ជូនទៅចៅក្រមស៊ើបសួរដើម្បីចាត់ការបន្ត។
លោក លី សុផាណា អ្នកនាំពាក្យអយការអមសាលាដំបូងរាជធានីភ្នំពេញបានថ្លែងនៅថ្ងៃទី២៥ ខែមករានេះថា សំណុំរឿងប៊ីចេងក្លែងក្លាយ ដោយចោទប្រកាន់លើ ១.ឈ្មោះ អ៊ឹង សុង ភេទប្រុស អាយុ៦៨ឆ្នាំ ពីបទ វេចខ្ចប់ ស្តុកនិងចែកចាយទំនិញក្លែងបន្លំម៉ាក ប្រព្រឹត្តនៅផ្ទះលេខ ២៣A ផ្លូវលេខ ១២៥ សង្កាត់បឹងព្រលឹត ខណ្ឌ៧មករា រាជធានីភ្នំពេញ កាលពីថ្ងៃទី២២ ខែមករា ឆ្នាំ២០១៨ តាមមាត្រា១១ មាត្រា២៤ និងមាត្រា៦៤ នៃច្បាប់ស្តីពីម៉ាក ពាណិជ្ជនាម និងការប្រកួតប្រជែងមិនស្មោះត្រង់ ។ ២.អ្នកគ្រប់គ្រងអាជីវកម្មនៅផ្ទះលេខ ១០A ផ្លូវលេខ ១៤១ សង្កាត់បឹងព្រលឹត ខណ្ឌ៧មករា រាជធានីភ្នំពេញ ពីបទ វេចខ្ចប់ ស្តុកនិងចែកចាយទំនិញក្លែងបន្លំម៉ាក កាលពីថ្ងៃទី២៣ ខែមករា ឆ្នាំ២០១៨ តាមមាត្រា១១ មាត្រា២៤ និងមាត្រា៦៤ នៃច្បាប់ស្តីពីម៉ាក ពាណិជ្ជនាម និងការប្រកួតប្រជែងមិនស្មោះត្រង់ ។
៣.ម្ចាស់ទីតាំងផ្ទះលេខ ១៤B ផ្លូវលេខ ១៤១ សង្កាត់បឹងព្រលឹត ខណ្ឌ៧មករា រាជធានីភ្នំពេញ ពីបទ លក់ទំនិញក្លែងបន្លំម៉ាក កាលពីថ្ងៃទី២២ ខែមករា ឆ្នាំ២០១៨ តាមមាត្រា១១ និងមាត្រា៦៦ កថាខណ្ឌ២ នៃច្បាប់ស្តីពីម៉ាក ពាណិជ្ជនាម និងការប្រកួតប្រជែងមិនស្មោះត្រង់។
សូមបញ្ជាក់ថា នគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃដោយមានការសហការជាមួយមន្ត្រីកាំកុងត្រូល បានចុះអនុវត្ដ តាមពាក្យបណ្ដឹងពីក្រុមហ៊ុនប៊ីចេងសញ្ញារូបវែក រកកន្លែងស្តុកលក់ផលិតផលប៊ីចេងរូបវែករំលោភកម្មសិទ្ធបញ្ញាជាច្រើនគីឡូផងដែរដែលមាន៣ទីតាំង ។ ក្នុងទីតាំងទី១-នៅផ្ទះលេខ១៤BEo តាមបណ្ដោយ ផ្លូវលេខ១៤១ និង ទីតាំងទី២-ផ្ទះលេខ១០BEo តាមបណ្ដោយ ផ្លូវលេខ១៤១ និងទីតាំងទី៣-ផ្ទះលេខ២៣Aផ្លូវលេខ១២៥ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ កាលពីរសៀលថ្ងៃចន្ទ ទី២២ ខែមករា ឆ្នាំ២០១៨ ។
ប៊ីចេងសញ្ញាវែកក្រហមក្លែងក្លាយត្រូវបានសមត្ថកិច្ចកាំកុងត្រូល សហការជាមួយនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ រកឃើញ ដកហូតបានជាង៣,៥តោន និងឃាត់ខ្លួន២នាក់ ដើម្បីកសាងសំណុំរឿងបញ្ជូនទៅតុលាការ ៕ ដោយ៖បញ្ញាស័ក្តិ
