បុរសអង់គ្លេសម្នាក់ដែលបានធ្លាក់ចូលក្នុងអណ្តូងនៅកោះបាលី ប្រទេសឥណ្ឌូនេស៊ី ត្រូវបានគេជួយសង្គ្រោះ បន្ទាប់ពីនៅបាតអណ្តូងអស់រយៈពេល ៦ថ្ងៃ។
លោក Jacob Robert វ័យ ២៩ឆ្នាំបានបាក់ជើងម្ខាង ក្រោយពេលធ្លាក់ចូលក្នុងអណ្តូងជម្រៅ ៤ម៉ែត្រ ស្ថិតក្នុងភូមិ Pacatu នៅពេលគាត់ត្រូវឆ្កែដេញខាំ។
អណ្តូងនោះមានទឹកតិចៗប៉ុណ្ណោះ ប៉ុន្តែការរបួសជើង ទើបមិនអាចធ្វើឲ្យគាត់ចេញពីអណ្តូងបាន។ សាក្សីនិយាយថា មានទឹកតិចតួចប៉ុណ្ណោះនៅក្នុងអណ្តូង ទើបធ្វើឲ្យគាត់រួចផុតពីការស្លាប់។
លោកបានយំយ៉ាងខ្លាំង និងស្រែកអោយគេជួយ ហើយចុងបញ្ចប់សំឡេងរបស់គាត់ត្រូវបានលឺដល់អ្នកភូមិម្នាក់។
អ្នកភូមិម្នាក់ដែលបានរកស្មៅអោយគោក្របីគាត់នៅក្បែរតំបន់នោះ បានប្រទះឃើញគាត់ ហើយគាត់ក៏បានប្រាប់ដល់អាជ្ញាធរ។ អណ្តូងស្ថិតនៅឆ្ងាយពីភូមិ។
ប៉ូលីសឈ្មោះ Yusak Agustinus Sooai និយាយថា “គាត់មានរូបរាងស្គម និងមានរបួស នៅពេលគាត់ត្រូវបានគេរកឃើញកាលពីថ្ងៃសៅរ៍”។
គេនៅមិនទាន់បានដឹងច្បាស់នៅឡើយទេថា បុរសអង់គ្លេសរូបនោះជាអ្នករស់នៅទីនោះ ឬជាអ្នកទេសចរ។
សូមបញ្ជាក់ថា កោះបាលី ត្រូវបានអាជ្ញាធរធ្វើការបិទអស់រយៈពេលជាច្រើនខែមកហើយ ដោយសារតែការផ្ទុះរាតត្បាតវីរុសកូរ៉ូណា ទោះបីជាមានកន្លែងមួយចំនួន បានចាប់ផ្តើមធ្វើ់ការបើកដំណើរឡើងវិញដោយប្រុងប្រយ័ត្ន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
