មេដឹកនាំហុងកុង អ្នកស្រី Carrie Lam បានធ្វើការព្រមាននៅថ្ងៃអង្គារនេះថា ទីក្រុងមិនអាចមានភាពវឹកវរបន្ថែមទៀតឡើយ។ ការប្រមានរបស់អ្នកស្រីចំពេលខួបគម្រប់មួយឆ្នាំ នៃការចាប់ផ្តើមធ្វើបាតុកម្មទ្រងទ្រាយធំនៅក្នុងទីក្រុង។
មនុស្សច្រើនជាង ១លាននាក់បានធ្វើការចូលបាតុកម្មតាមដងផ្លូវ កាលពីមួយឆ្នាំមុន ដើម្បីតវ៉ាទៅនឹងច្បាប់ដែលដោយស្នើដោយរដ្ឋាភិបាលហុងកុង ដែលច្បាប់នោះអនុញ្ញាតឲ្យមានការបញ្ជូនជនសង្ស័យទៅធ្វើការកាត់ទោសក្នុងប្រទេសចិនបាន។
ក្រោយមក អ្នកស្រី Carrie Lam បានដកច្បាប់នោះចេញ ប៉ុន្តែការតវ៉ាទូទាំងហុងកុងនៅតែបន្តកើនមានដោយការព្រួយបារម្ភថា រដ្ឋាភិបាលក្រុងប៉េកាំងកំពុងរារាំងសេរីភាពនៅក្នុងទីក្រុងហុងកុង។ ការបាតុកម្មបានអូសបន្លាយអស់រយៈពេលជាច្រើនខែ។
អ្នកស្រីថ្លែងក្នុងសន្និសីទប្រចាំសប្តាហ៍ថា “ពួកយើងបានមើលឃើញពីការលំបាកដែលពួកយើងបានឆ្លងកាត់កាលពីឆ្នាំកន្លងទៅ ហើយដោយសារតែស្ថានភាពធ្ងន់ធ្ងរ ទើបពួកយើងនៅមានបញ្ហាជាច្រើនដែលត្រូវដោះស្រាយ”។
“ពួកយើងត្រូវរៀនពីកំហុស ហើយខ្ញុំសង្ឃឹមថា សមាជិកសភាទាំងអស់អាចរៀនពីកំហុសទាំងនោះ ដែលហុងកុងមិនអាចស៊ូទ្រាំនឹងភាពវឹកវរបានទៀតឡើយ”។
ក្នុងរយៈពេលថ្មីៗនេះ បាតុករបានត្រឡប់ទៅធ្វើការតវ៉ាតាមដងផ្លូវវិញ ហើយការប្រមូលផ្តុំជាច្រើននឹងអាចកើតមានឡើង។
សកម្មជនបានស្នើឲ្យប្រជាជនហុងកុងធ្វើការប្រមូលផ្តុំគ្នានៅពេលអាហារថ្ងៃត្រង់ និងក្រោយមកទៀត នៅថ្ងៃព្រហស្បតិ៍ដើម្បីប្រារព្ធខួបនៃការជួបជុំដ៏ធំកាលពីឆ្នាំមុន។ ពួកគេក៏មានគម្រោងធ្វើប្រជាមតិនៅថ្ងៃអាទិត្យ ថាតើគួរធ្វើបាតុកម្មទូទាំងក្រុងប្រឆាំងនឹងសំណើរច្បាប់សន្តិសុខឬយ៉ាងណា។
សូមបញ្ជាក់ថា កាលពីខែមុន រដ្ឋាភិបាលក្រុងប៉េកាំងបានដាក់ស្នើច្បាប់សន្តិសុខជាតិដើម្បីគ្រប់គ្រងហុងកុង ប៉ុន្តែអ្នកជំនាញបានសម្តែងការព្រួយបារម្ភថា ច្បាប់នោះនឹងរឹតត្បិតសេរីភាពដល់ទីក្រុងហុងកុង។
អាមេរិចបានប្រកាសថា ទីក្រុងហុងកុងលែងមានស្វ័យភាពពីប្រទេសចិនទៀតហើយ និងបានដកឋានៈពាណិជ្ជកម្មពិសេសចេញពីទីក្រុង៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
