បាត់ដំបងៈកម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស២នាក់ជួញដូររក្សាទុកនិងថ្នាំម៉ាទឹកកក៦ថង់ និង៩កំណាត់ទុយោបំពងបឺត ម៉ូតូមួយគ្រឿង សម្ភារពាក់ព័ន្ធមួយចំនួននៅកន្លែងផ្សេងគ្នា កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅ ថ្ងៃទី៩ខែមិថុនាឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ២នាក់នេះ បានធ្វើឡើងកាលពី ថ្ងៃទី៥ខែមិថុនាឆ្នាំ២០២០នៅចំណុចផ្សេងគ្នាក្នុងស្រុកភ្នំព្រឹកខេត្តបាត់ដំបង។
លោកសុខ និមលនាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថាជនសង្ស័យ២នាក់ដែលចាប់ឃាត់ខ្លួនករណីទី១ឈ្មោះទូច សុធាភេទប្រុសអាយុ២៧ឆ្នាំរស់នៅក្រុមទី០១ភូមិអូរដាឃុំបួរស្រុកភ្នំព្រឹកខេត្តបាត់ដំបង។ កម្លាំងដកហូតបានថ្នាំម៉ាទឹកកក៥ថង់ ទូរស័ព្ទដៃមួយគ្រឿងសម្ភារៈមួយចំនួនទៀតហើយចាប់ឃាត់ខ្លួនកាលពីម៉ោង១៣និង០០នាទីថ្ងៃទី៨ខែមិថុនាឆ្នាំ២០២០នៅចំណុចក្រុមទី០១ភូមិអូរដាឃុំបួរស្រុកភ្នំព្រឹកខេត្តបាត់ដំបង។ ករណីទី២ឈ្មោះវ៉ិត ណាំគីភេទប្រុសអាយុ២៤ឆ្នាំមានទីលំនៅភូមិបេងទ្រេតឃុំតាស្ដារស្រុកសំពៅលួនខេត្តបាត់ដំបង។ កម្លាំងដកហូតបានថ្នាំម៉ាទឹកកកមួយថង់និង៩កំណាត់ទុយោបំពងបឺត ទូរស័ព្ទដៃមួយគ្រឿងម៉ូតូមួយគ្រឿងសម្ភារពាក់ព័ន្ធប្រើប្រាស់ថ្នាំញៀនមួយចំនួនទៀតហើយចាប់ឃាត់ខ្លួនកាលពីម៉ោង១៥និង៤៥នាទីថ្ងៃទី៨ខែមិថុនាឆ្នាំ២០២០នៅចំណុចក្រុមទី១០ភូមិភ្នំប្រាំពីរឃុំបួរស្រុកភ្នំព្រឹកខេត្តបាត់ដំបង។
លោកសុខ និមលបានបញ្ជាក់ថាកម្លាំងបានសហការជាមួយកម្លាំងប៉ូលិសស្រុក ចុះបង្ក្រាបបានករណីរនេះហើយចាប់ឃាត់ខ្លួនជនសង្ស័យ២នាក់និងវត្ថុតាងបានភ្លាមៗជាក់ស្ដែងតែម្ដង។បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យនិងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់នៅថ្ងៃទី៩ខែមិថុនាឆ្នាំ២០២០ហើយ៕
ដោយ៖អ៊ុងសារុំ
