លោក អ៊ីលហាន កេម៉ាល់ តាគ (H.E.Mr. ILHAN Kemal Tug) ឯកអគ្គរដ្ឋទូតសាធារណរដ្ឋតួគី ដែលត្រូវបានចប់អាណត្តិពីកម្ពុជា បានលើកឡើងថាចំណងការទូត និងកិច្ចសហប្រតិបត្តិការរវាងប្រទេសកម្ពុជា និងតួគី មានការរីកចម្រើនគួរឲ្យកត់សម្គាល់ នៅក្នុងរយៈពេល បេសកកម្មការទូត៤ឆ្នាំ របស់ឯកឧត្តមនៅកម្ពុជា។
រយៈពេល៤ឆ្នាំមកនេះ ប្រទេសទាំងពីរបានផ្លាស់ប្តូរដំណើរទស្សនកិច្ចពីគ្នាទៅវិញទៅមក ពិសេសដំណើរទស្សនកិច្ច របស់រដ្ឋមន្ត្រីក្រសួងការបរទេស កម្ពុជា ទៅកាន់ប្រទេសតួគីកាលពីពេលថ្មីៗនេះ។ ទន្ទឹមនឹងចំណងការទូត កិច្ចសហប្រតិបត្តិការរវាងរដ្ឋាភិបាលប្រទេសទាំងពីររីកចម្រើន លោក អ៊ីលហាន កេម៉ាល់ តាគ ក៏ចង់ឃើញកិច្ចសហប្រតិបត្តិការរវាងសភាប្រទេសទាំងពីរមានការរីកចម្រើន និងរឹងមាំថែមទៀតផងដែរ។
នៅក្នុងឱកាសចូលជួបសម្តែងការគួរសម និងជម្រាបលាសម្តេចប្រធានរដ្ឋសភា នាព្រឹកថ្ងៃទី២៦ ខែមករា ឆ្នាំ២០១៨ នៅវិមានរដ្ឋសភា នៅមុនពេល ដែល លោក ត្រូវបញ្ចប់បេសកកម្មការទូតពីកម្ពុជានោះ។ លោក អីុលហាន កេម៉ាល់ តាគ បានស្នើសុំ សម្តេចអគ្គមហាពញាចក្រី ហេង សំរិន ជួយជំរុញកិច្ចសហប្រតិបត្តិការសភាប្រទេសកម្ពុជា និងតួគី ឲ្យមានការរីកចម្រើនឡើង ពិសេសសុំឲ្យមានការផ្លាស់ប្តូរបទពិសោធន៍គ្នាទៅវិញទៅមក រវាងក្រុមមិត្តភាពសភាប្រទេសទាំងពីរ។
លោក អីុលហាន កេម៉ាល់ តាគ បានថ្លែងអំណរគុណចំពោះរាជរដ្ឋាភិបាល រដ្ឋសភា ព្រឹទ្ធសភា និងប្រជាពលរដ្ឋកម្ពុជា ដែលបានផ្តល់កិច្ចសហប្រតិបត្តិការគាំទ្រដល់បេសកកម្មការទូតរបស់ឯកឧត្តម ឲ្យទទួលបានជោគជ័យ។ ឯកឧត្តម ឯកអគ្គរដ្ឋទូត ដែលត្រូវចប់អាណត្តិ បានជម្រាបសម្តេច ប្រធានរដ្ឋសភាថា នៅក្នុងឱកាសដែលឯកឧត្តមបានចូលជម្រាបលាសម្តេចនាយករដ្ឋមន្ត្រី នៃព្រះរាជាណាចក្រកម្ពុជា កាលពីប៉ុន្មានថ្ងៃមុននេះ សម្តេច នាយករដ្ឋមន្ត្រី បានជម្រាបឯកឧត្តមថា សម្តេចនឹងអញ្ជើញទៅបំពេញទស្សនកិច្ចនៅប្រទេសតួគី នាពេលខាងមុខនេះ។
“យើងខ្ញុំរង់ចាំ និងត្រៀមស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់ សម្តេច ហ៊ុន សែន នៅប្រទេសតួគី។ ដំណើរទស្សនកិច្ចនេះ នឹងធ្វើឲ្យ កិច្ចសហប្រតិបត្តិការ និងចំណងការទូតកម្ពុជា តួគីកាន់តែរឹងមាំឡើង” នេះជាការលើកឡើងរបស់ លោក អីុលហាន កេម៉ាល់ តាគ។
សម្តេចអគ្គមហាពញាចក្រី ហេង សំរិន បានមានប្រសាសន៍ថា ក្នុងនាមរដ្ឋសភា និងក្នុងនាមសម្តេចផ្ទាល់ សម្តេចសូមកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ឯកឧត្តម ដែលបានរួមចំណែកលើកកម្ពស់នៅក្នុងវិស័យសេដ្ឋកិច្ច ពាណិជ្ជកម្ម វប្បធម៌ និងនយោបាយការបរទេស កាន់តែប្រសើរឡើង។ សម្តេចបានគូសបញ្ជាក់ថា រដ្ឋសភាកម្ពុជាសូមគាំទ្រដល់កិច្ចសហប្រតិបត្តិការលើគ្រប់វិស័យ ដែលរដ្ឋាភិបាលនៃប្រទេសទាំងពីរ បានធ្វើរួមគ្នា និងសូមជំរុញឲ្យបន្តបង្កើននូវកិច្ចសហប្រតិបត្តិការថ្មីៗថែមទៀត ជាពិសេសវិស័យពាណិជ្ជកម្ម និងទេសចរណ៍ ដើម្បីឧត្តមប្រយោជន៍ ប្រជាជាតិទាំងសងខាង ។
សម្តេចប្រធានរដ្ឋសភា បានលើកឡើងថា សម្តេចនឹងខំជំរុញ លើកកម្ពស់កិច្ចសហប្រតិបត្តិការសភាប្រទេសទាំងពីរ ឲ្យមានការរីកចម្រើនឡើង។ កន្លងមក ទោះបីមិនទាន់មានការផ្លាស់ប្តូរ ដំណើរទស្សនកិច្ចជាផ្លូវការរវាងរដ្ឋសភាកម្ពុជា និងតួគីមែន តែសភាប្រទេសទាំងពីរ បានចូលរួម សហការគ្នា នៅក្នុងក្របខណ្ឌសភាតំបន់អាស៊ី(APA)។ សម្តេចបានលើកឡើងថា កន្លងមកសមាជិកសភាតួគី បានចូលរួមកិច្ចប្រជុំមហាសន្និបាត សភាតំបន់អាស៊ី (APA) នៅកម្ពុជា ហើយគណៈប្រតិភូជាន់ខ្ពស់សភាកម្ពុជា ដឹកនាំដោយ ឯកឧត្តមបណ្ឌិត ងួន ញ៉ិល ក៏បានទៅចូលរួមមហាសន្និបាតសភាតំបន់អាស៊ី នៅប្រទេសតួគី ផងដែរ។
សម្តេចអគ្គមហាពញាចក្រីមានជំនឿយ៉ាងមុតមាំថា ទោះបីឯកអគ្គរដ្ឋទូត បានបញ្ចប់បេសកកម្មការទូតនៅកម្ពុជា ហើយទៅបំពេញតួនាទីថ្មីនៅក្នុង ស្ថាប័នណាមួយក៏ដោយ ឯកឧត្តមនឹងនៅតែបន្តរក្សាទំនាក់ទំនងល្អជាមួយកម្ពុជា។ សម្តេចបានជូនពរ ឯកឧត្តម អីុលហាន កេម៉ាល់ តាគ មាន សុខភាពល្អ និងនិវត្តន៍ទៅកាន់មាតុប្រទេសវិញប្រកបដោយសុវត្ថិភាព និងទទួលបានជោគជ័យក្នុងបេសកកម្មបន្តបន្ទាប់ទៀត៕ ដោយ៖បញ្ញាស័ក្តិ