ភ្នំពេញ៖ យុវជន២នាក់ កំពុងតែជិះម៉ូតូសុខៗស្រាប់តែមានរថយន្ដមិនចាំម៉ាកមួយគ្រឿងបើកបុកចំពីចំហៀងបណ្ដាលឲ្យយុវជនម្នាក់សន្លប់និងម្នាក់ទៀតរបួសស្រាល ត្រូវបានរថយន្ដសង្គ្រោះបន្ទាប់យកទៅមន្ទីរពេទ្យ ហេតុការណ៍គ្រោះថ្នាក់ខាងលើកនេះបង្កឲ្យមានការភ្ញាក់ផ្អើលកាលពីវេលាម៉ោង៩ យប់នៅថ្ងៃទី១៤ ខែមិថុនា ឆ្នាំ២០២០ ស្ថិតតាមបណ្ដាលផ្លូវ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
បើយោងតាមប្រភពព័ត៌មានពីប្រជាពលរដ្ឋបានប្រាប់ឲ្យដឹងថា មុនពេលកើតហេតុបានឃើញយុវជន២នាក់បានជិះម៉ូតូម៉ាកហុងដាសង់ឌ្រីមស៊េរី២០១៣ពណ៌ខ្មៅ ដែលពាក់ផ្លាកលេខកំពង់ចាម1K-7146 ដែលបានធ្វើដំណើរក្នុងទិសដៅពីជើងមកត្បូងក្នុងល្បឿន មធ្យម ខណៈពេលនោះក៏មានរថយន្ដគ្រឿងម៉ាកហាយឡិនដ័រមិនចាំផ្លាកលេខបានធ្វើដំណើរក្នុងទិសដៅពីត្បូងមកជើងក្នុងល្បឿនលឿន លុះមកដល់ចំណុចកើតហេតុបានបត់ឆ្វេងក៏ជ្រុលទៅបុកយុវជន២នាក់ដែលកំពុងតែជិះម៉ូតូខាងលើ បណ្ដាលឲ្យបុរសម្នាក់រងរបួសធ្ងន់ឡើងសន្លប់និងម្នាក់ទៀតរងរបួសស្រាល ចំណែកឯរថយន្ដបង្កឃើញដូច្នេះក៏បានបើករថយន្ដបន្ដទៅមុខបាត់ស្រមោលនៅក្នុងភូមិតាឡី។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុបានធ្វើការវាសវែងម៉ូតូជនរងគ្រោះទៅរក្សាទុកក្នុងអធិការខណ្ឌរងចាំម្ចាស់ម៉ូតូមកយកពេលក្រោយ៕ ដោយ៖ហង់ ភត្រា និងហុឹម សាម៉េត