ភ្នំពេញ៖ ក្នុងកិច្ចប្រជុំពិភាក្សាឆ្លងរបាយការណ៍ ស្តីពីលទ្ធផល នៃការចុះអង្កេតស្រាវជ្រាវករណីសារព័ត៌មានមួយបានចុះផ្សាយអំពី នគរបាល នៃអគ្គនាយកដ្ឋានអន្តោប្រវេសន៍ អគ្គាធិការដ្ឋាននៃក្រសួងមហាផ្ទៃ បានអំពាវនាវដល់បណ្តាញសារព័ត៌មាន ទាំងបណ្តាញអនឡាញ និងអ្នកប្រើប្រាស់បណ្តាញសង្គមនានា ជាពិសេសបណ្តាញហ្វេសប៊ុក ចុះផ្សាយ ឬផុសព័ត៌មានប្រកបដោយវិជ្ជាជីវៈ ក្រមសីលធម៌ និងសេចក្តីថ្លៃថ្នូររបស់ខ្លួន។
ព្រឹកថ្ងៃពុធ ទី១៧ ខែមិថុនា ឆ្នាំ២០២០ ឯកឧត្តម អ៊ីវ លាង អគ្គាធិការ នៃអគ្គាធិការដ្ឋាន អញ្ជើញដឹកនាំកិច្ចប្រជុំពិភាក្សាឆ្លងរបាយការណ៍ស្តីពីលទ្ធផល នៃការចុះអង្កេតស្រាវជ្រាវករណីសារព័ត៌មានមួយបានចុះផ្សាយថា នគរបាល នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានសហការជាមួយនគរបាលអន្តោប្រវេសន៍ នៃស្នងការដ្ឋាននគរបាលខេត្តកោះកុង បានចាប់ខ្លួនប្រជាពលរដ្ឋមួយរូប មានទីលំនៅស្រុកមណ្ឌលសីមា ខេត្តកោះកុង ពីបទប្រើប្រាស់ឯកសារជនជាតិខ្មែរខុសច្បាប់ ដោយពុំមានដីកា ឬសេចក្តីជូនដំណឹងជាមុននោះទេ ហើយសារព័ត៌មាននោះបានលើកឡើងបន្តថា មានការឃុំខ្លួននៅស្នងការដ្ឋាននគរបាលខេត្តកោះកុងមួយយប់ មុននឹងបញ្ជូនមករាជធានីភ្នំពេញ។
សូមជម្រាបផងដែរថា ពាក់ព័ន្ធនឹងការចុះផ្សាយរបស់បណ្តាញសារព័ត៌មាន ក្រោយពីការចុះអង្កេតស្រាវជ្រាវកន្លងមក ទទួលស្គាល់ថា បណ្តាញសារព័ត៌មានមួយចំនួនពិតជាបានចុះផ្សាយជាករណីមានឬកើតឡើងពិតប្រាកដមែន និងប្រកបដោយវិជ្ជាជីវៈ ដែលនេះជាការចូលរួមចំណែកយ៉ាងសំខាន់ ក្នុងការកែលម្អចំនុចខ្វះខាត ភាពអសកម្ម និងលុបបំបាត់មន្ត្រីខិលខូចមួយចំនួនយកតួនាទីបម្រើផលប្រយោជន៍ខ្លួន ឬបក្ខពួក។ ប៉ុន្តែក៏មានសារព័ត៌មានមួយចំនួនទៀត ពិតជាបានចុះផ្សាយនូវព័ត៌មានមិនពិត ឬគ្មានប្រភពច្បាស់លាស់ និងជាពិសេសបានចុះផ្សាយករណីដែលកើតមានយូរមកហើយ ឬករណីដែលសមត្ថកិច្ចបានបង្ក្រាប និងលុបបំបាត់រួចហើយដែរ ដែលនេះពិតជាបានបង្កការភាន់ច្រឡំមតិសាធារណៈ បំផុលសង្គមយ៉ាងធ្ងន់ធ្ងរ ទង្វើនេះបានជះឥទ្ធិពល ឬប៉ះពាល់ដល់កិត្តិយសរបស់មន្ត្រីរាជការ ដែលខុសផ្ទុយយ៉ាងធ្ងន់ធ្ងរ នឹងវិជ្ជាជីវៈខាងសារព័ត៌មាន ។
លោកអគ្គាធិការដ្ឋាន ជាថ្មីម្តងទៀត សូមអំពាវនាវដល់បណ្តាញសារព័ត៌មាន (ទាំងបណ្តាញអនឡាញ) និងអ្នកប្រើប្រាស់បណ្តាញសង្គមនានា ជាពិសេសបណ្តាញហ្វេសប៊ុក ចុះផ្សាយ ឬផុសព័ត៌មានប្រកបដោយវិជ្ជាជីវៈ ក្រមសីលធម៌ និងសេចក្តីថ្លៃថ្នូររបស់ខ្លួន ៕
ដោយ៖កូឡាប
