ភ្នំពេញ៖ ការជះឥទ្ធិពលអវិជ្ជមានពីការរាតត្បាតនៃជំងឺកូវីដ-១៩ ធ្វើឱ្យការនាំចេញរបស់កម្ពុជា ទៅវៀត ណាម ក្នុងរយៈពេល ៥ខែ ឆ្នាំ២០២០នេះ មានការធ្លាក់ចុះ ១៥% បើធៀបរយៈពេលដូចគ្នាកាលពីឆ្នាំមុន។ នេះបើតាមការបញ្ជាក់របស់ស្ថានទូតវៀតណាមប្រចាំនៅកម្ពុជា។
របាយការណ៍ដដែលនេះ បានបង្ហាញថា ចន្លោះពីខែមករា ដល់ ខែឧសភា ឆ្នាំ ២០២០នេះ អគ្គនាយករដ្ឋានគយវៀតណាម បានស្រង់តួលេខនៃការនាំចេញរបស់កម្ពុជា ទៅប្រទេសវៀតណាម មានតម្លៃទឹកប្រាក់សរុបប្រមាណ ៤៧៦លានដុល្លារអាមេរិក បានធ្លាក់ចុះ ១៥% បើធៀបនឹងរយៈពេលដូចគ្នាកាលពីឆ្នាំមុន។
ចំណែក ការនាំចូលរបស់កម្ពុជា ពីប្រទេសវៀតណាម ត្រឡប់មកវិញ មានតម្លៃទឹកប្រាក់សរុបប្រមាណ ១,៧ពាន់លានដុល្លារអាមេរិក បានធ្លាក់ចុះ ៦%។
តាមរបាយការណ៍ខាងលើនេះ ក្នុងឆ្នាំ២០១៩កន្លងទៅ ទំហំពាណិជ្ជកម្មកម្ពុជា-វៀតណាមសម្រេចបាន ជិត ៥,៣លានដុល្លារអាមេរិក កើនឡើង១១% បើធៀបជាមួយឆ្នាំ២០១៨ ដែលក្នុងនោះការនាំចេញពីរប្រទេសវៀតណាមចូលមកកម្ពុជាសម្រេចបាន ៤,៤ ពាន់លានដុល្លារ កើនឡើង ១៦% និងនាំចូលពីប្រទេសកម្ពុជា ៩០១លានដុល្លារ កើនឡើង ៧%។
ផ្អែកតាមតួលេខ ខាងលើនេះ ការនាំចេញរបស់កម្ពុជា មានតម្លៃទឹកប្រាក់តិចជាង តម្លៃទឹកប្រាក់នៃការនាំចេញរបស់វៀតណាម មកកម្ពុជាវិញ រហូតដល់ទៅជាង ៣ដង។ ជាទូទៅការធ្វើពារណិជ្ជកម្មរបស់កម្ពុជា តែងតែចាញ់ប្រៀបប្រទេសជិតខាង ជាពិសេសវៀតណាម និងថៃ ហើយទំនិញរបស់កម្ពុជា ជាញឹកញាប់ត្រូវបានរឹតបន្តឹង ឬទម្លាក់ថ្លៃ ពីបណ្តាប្រទេសទាំងនេះ នៅពេលរដូវប្រមូលផលកសិកម្ម។ មូលហេតុនៃការចាញ់ប្រៀបនេះ ដោយសារផលិតកម្មក្នុងស្រុកនៅទុនខ្សោយនៅឡើយ។
គួរបញ្ជាក់ថា ប្រភេទមុខទំនិញសំខាន់ៗ ដែលកម្ពុជានាំចេញទៅប្រទេសវៀតណាម ក្នុងរយៈពេល ៥ខែ ឆ្នាំ នេះ មានដូចជា ស្រូវ អង្ករ គ្រាប់ស្វាយចន្ទី ជ័រកៅស៊ូ ស្លឹកថ្នាំជក់ និងផ្លែចេក ជាដើម។ ដោយ ឡែកទំនិញ ដែលវៀតណាម នាំចេញត្រឡប់មកកម្ពុជាវិញ មានដូចជា ដែកថែប ប្រេង បន្លែ ផ្លែឈើ ជីកសិកម្ម និងគ្រឿងឧបភោគបរិភោគផ្សេងៗ៕
ដោយ៖CEN
