សៀមរាប ៖ បែកធ្លាយលោកឧត្តមសេនីយ៍ទោស្នងការខេត្តសៀមរាប និងស្នងការរងទទួលផែនសណ្តាប់ធា្នប់ ប្រើប្រាស់កម្លាំងប្រដាប់អាវុធ ដើរសម្លុត និងចុះចាក់សោរថយន្តតាក់ស៊ីនៅកែងចុងកៅស៊ូ ខេត្តសៀមរាប ដែលចតលើហ្គារ៉ាស់សាំង បានធ្វើឲ្យប៉ះពាល់ដល់របរអាជីវកម្មរបស់បងប្អូនអ្នករកស៊ីរត់រថយន្តតាក់ស៊ី។ វីដេអូដែលបែកធ្លាយលើបណ្តាញសង្គមនេះ ត្រូវបានចែកចាយកាលពីថ្ងៃទី២៣ខែមិថុនាឆ្នាំ២០២០ ។
ស្នងការដ្ឋាននគរបាលខេត្តសៀមរាប បានបញ្ជាក់ថា ក្រុមរថយន្ដតាក់ស៊ីមួយចំនួនតូចទាំងនេះ គឺពួកគាត់ពុំព្រមចូលចាប់ភ្ញៀង និងដាក់ភ្ញៀវនៅក្នុងបេនតាមការណែនាំរបស់អាជ្ញាធរខេត្តឡើយ ពួកគាត់តែងតែយកកន្លែងស្ថានីយប្រេង ឬភោជនីយដ្ឋាន និងទីតាំងជួសជុលរថយន្ត ធ្វើជាជម្រកដើម្បីជាលេស ក្នុងការចាប់ម៉ូយនៅតាមដងផ្លូវ ដែលធ្វើឲ្យមានភាពរញ៉េរញ៉ៃ និងបាត់បង់សណ្តាប់សាធារណៈ ក៏ដូចជាសោភ័ណភាពក្រុងសៀមរាប។
ពាក់ព័ន្ធករណីខាងលើនេះ នៅថ្ងៃទី២៤ខែមិថុនាឆ្នាំ២០២០នេះ ឧត្តមសេនីយ៍ទោ ទិត្យ ណារ៉ុង ស្នងការ នៃស្នងការដ្ឋាននគរបាលខេត្តសៀមរាប បានចេញលិខិតសុំទោសចំពោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ
និងប្រជាពលរដ្ឋទូទាំងប្រទេស ករណីដែលខ្ញុំបាទបានប្រើប្រាស់កម្លាំងប្រជាការពារ (ដោយឲ្យពាក់ឯកសណ្ឋាននគរបាលជាតិ) ចុះប្រតិបត្តិការការងាររៀបចំសណ្ដាប់ធ្នាប់ ក្នុងក្រុងសៀមរាប កាលពីថ្ងៃទី២៣ ខែមិថុនា ឆ្នាំ២០២០ ធ្វើឲ្យមានការប៉ះពាល់ និងភាន់ច្រឡំ មកលើកងកម្លាំងនគរបាលជាតិ ខ្ញុំបាទគោរពជម្រាបជូនថា បច្ចុប្បន្ននេះ ខ្ញុំបាទបានឲ្យមន្ត្រីជំនាញហៅបុគ្គលនេះ មកអប់រំណែនាំរួចរាល់ហើយ ។
សូមគោរពអរគុណ និងអរគុណ
ស្នងការដ្ឋាននគរបាលខេត្តសៀមរាប បានលើកឡើងថា ដើម្បីចៀសវាងការយល់ច្រឡំរបស់មហាជន ពិសេសអ្នកនិយមប្រើប្រាស់បណ្ដាញទំនាក់ទំនងសង្គម facebook ស្នងការដ្ឋាននគរបាលខេត្តសៀមរាប សូមធ្វើការបកស្រាយថា យើងខ្ញុំសូមបដិសេធឃ្លីបវីដេអូដែលបានបង្ហោះ និងខ្លឹមសារអត្ថាធិប្បាយចោទប្រកាន់កម្លាំងសមត្ថកិច្ចនគរបាល យកសោចាក់កង់ឡានរបស់ភ្ញៀវចូលទៅចាក់សាំងនៅហ្គារ៉ាស់សាំងនោះ។
សកម្មភាពនោះ គឺកម្លាំងចម្រុះសហការជាមួយប្រជាការពារ បានយកសោចាក់កង់រថយន្ដតាក់ស៊ី ដែលពួកគាត់គេចវេស ដោយមិនព្រមចូលបេន តាមសេចក្តីណែនាំរបស់សាលាខេត្តលេខ ០០១.១៩ សណន ចុះថ្ងៃទី២ ខែមេសា ឆ្នាំ២០១៩ ស្តីពីការធ្វើចរាចរណ៍របស់យានយន្តគ្រប់ប្រភេទ និងការរៀបចំសណ្តាប់ធ្នាប់ របៀបរៀបរយសាធារណៈ និងបរិស្ថាន អនាម័យនៅក្នុងក្រុងសៀមរាប ខេត្តសៀមរាប ។
ស្នងការដ្ឋាននគរបាលខេត្តសៀមរាបមានសិទ្ធិសម្រេចទទួលយកកិច្ចសហការ របស់ក្រុមការងារប្រជាការពារ ជាមួយកងកម្លាំងនគរបាលជាតិ ដើម្បីអនុវត្តបទបញ្ជា និងសេចក្តីណែនាំ របស់គណៈបញ្ជាការឯកភាពខេត្ត សំដៅថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈក្នុងទឹកដីខេត្ត-ក្រុងសៀមរាប។
សូមបញ្ជាក់ជូនថា កន្លងមកក្រុមរថយន្ដតាក់ស៊ីមួយចំនួនតូចទាំងនេះ គឺពួកគាត់ពុំព្រមចូលចាប់ភ្ញៀង និងដាក់ភ្ញៀវនៅក្នុងបេនតាមការណែនាំ របស់អាជ្ញាធរខេត្តឡើយ ពួកគាត់តែងតែយកកន្លែងស្ថានីយប្រេង ឬភោជនីយដ្ឋាន និងទីតាំងជួសជុលរថយន្ត ធ្វើជាជម្រកដើម្បីជាលេសក្នុងការចាប់ម៉ូយ នៅតាមដងផ្លូវដែលធ្វើឲ្យមានភាពរញ៉េរញ៉ៃ និងបាត់បង់សណ្តាប់សាធារណៈ ក៏ដូចជាសោភណ្ឌភាពក្រុងសៀមរាប មានពេលខ្លះធ្វើឲ្យបាត់សម្ភាររបស់ភ្ញៀវទៀតផង ។ ជាក់ស្តែង គឺដូចករណីខាងលើនេះ គីគាត់យកឡានទៅចតនៅហ្គារ៉ាស់សាំង ហើយពួកគាត់ចេញមកចាប់ម៉ូយយ៉ាងអាណាធិបតេយ្យ នៅលើដងផ្លូវ ទោះយើងខិតខំណែនាំពួកគាត់យ៉ាងណា ក៏គាត់មិនព្រមស្តាប់ និងហៅគាត់ទៅណែនាំក៏មិនព្រមទៅ ទើបកម្លាំងចម្រុះយើងសម្រេចចិត្តយកសោទៅចាក់កង់ឡាន។
សូមសាធារណជន និងអ្នកប្រើប្រាស់បណ្ដាញទំនាក់ទំនងសង្គមកុំមានការយល់ច្រឡំ និងសូមកុំមានការបកស្រាយបំភ្លើសពីការពិត ជេរប្រមាថ ដែលប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រីអនុវត្តច្បាប់។
បើតាម ការផ្សាយរបស់ផេកហ្វេសប៊ុក Lee Kangsrey កាលពីថ្ងៃទី២៣មិថុនា២០២០នេះថា
ករណីបែកធ្លាយ លោកឧត្តមសេនីយ៍ទោស្នងការខេត្តសៀមរាប និងស្នងការរងទទួលផែនសណ្តាប់ធា្នប់ រើសកម្លាំងប្រដាប់អាវុធ តាមអំពើចិត្តឲ្យដើរសម្លុត និង ចុះចាក់សោឡានតាក់ស៊ីនៅកែងចុងកៅស៊ូ ខេត្តសៀមរាប ៕
ដោយ៖កូឡាប
