ភ្នំពេញ៖ ស្ដ្រីម្នាក់ដើរឆ្លងផ្លូវ ត្រូវរថយន្ដដែលមិនចាំម៉ាកបើកបុកបណ្ដាលឲ្យក្បាលបោកនឹងថ្នល់ជាតិ ស្លាប់យ៉ាងអាណោចអាធ័ម ចំណែកឯរថយន្ដបង្កបើករត់គេចបាត់ស្រមោល។ ហេតុការណ៍ គ្រោះថ្នាក់ចរាចរណ៍ដ៏រន្ធត់មួយនេះបង្កឲ្យមានការភ្ញាក់ផ្អើលកាលពីវេលាម៉ោង១១ និង៣០នាទីយប់ត្រូវនិងថ្ងៃពុធ ទី២៤ ខែមិថុនា ឆ្នាំ២០២០ ត្រង់ចំណុចមុខកងអាវុធហត្ថផ្ទៃប្រទេស តាមបណ្ដោយផ្លូវ២៨៩ ក្នុងសង្កាត់ទឹកកក់ទី១ ខណ្ឌទួលគោក រាជធានីភ្នំពេញ។
ស្ដ្រីជនរងគ្រោះមិនស្គាល់អត្តញ្ញាណ ភិនភាគអាយុប្រហែល២៥ឆ្នាំ កម្ពស់ប្រហែល១ម៉ែត្រ៦០ ពាក់អាវយឺតខោយឺត ពណ៌លឿង សម្បុរខ្មៅស្រអែម។
បើតាមប្រភពព័ត៌មានពីប្រជាពលរដ្ឋបានប្រាប់ថា មុនពេលកើតហេតុមានស្ដ្រីម្នាក់បានដើរឆ្លងផ្លូវទៅម្ខាងទៀត តែមិនបានទៅដល់ផងក៏ត្រូវរថយន្ដដែលមិនចាំម៉ាកបានធ្វើដំណើរក្នុងទិសដៅពីត្បូងមកជើងក្នុងល្បឿនលឿនដោយពេលនោះមានភ្លៀងផងក៏បុកចំពេញទំហឹងបណ្ដាលខ្ទាតបោកក្បាលនឹងថ្នល់ជាតិស្លាប់យ៉ាងអាណោចអាធ័មដោយបន្សល់ទុកកព្ចាក់រថយន្ដនៅនឹងកន្លែងកើតហេតុ។
ក្រោយពេលកើតហេតុសមត្ថកិច្ចក៏ចុះមកដល់ចណុចកើតហេតុធ្វើការវាស់វែងសពនិងបានធ្វើកំណត់ហេតុរួច ឲ្យរថយន្ដសាមុយដឹកទៅតម្កល់ទុកឯវត្តទឹកថ្លារង់ចាំសាច់ញាតិមកទទួលយកមកធ្វើបុណ្យតាមប្រពៃណី៕ ដោយ៖ភត្រានិង សាម៉េត
