បាត់ដំបង៖ នគរបាលខេត្តបាត់ដំបង បានលើកឡើងថា ពេលវេលាយូរឬឆាប់គង់នឹងចូល មកដល់បើអ្នកនៅតែបន្តប្រព្រឹត្តិអំពើល្មើសច្បាប់។ អធិការនគរបាលស្រុកករុក្ខគីរី បានអនុវត្តដីកាបង្គាប់ឱ្យចាប់ខ្លួនចំនួន២ដីកា ដោយអនុវត្តលើមនុស្សចំនួន១នាក់ ចោទប្រកាន់ពីបទ(រំលោភសេពសន្ថវៈ)ដែលប្រព្រឹត្តតាំងពីឆ្នាំ ២០១៦ហើយរត់គេចខ្លួនបាត់ និងដីកាបង្គាប់ឲ្យចាប់ខ្លួនពីបទប្រើប្រាស់និងជួញដូរគ្រឿងញៀន។
ស្នងការដ្ឋាននគរបាលខេត្តបាត់ដំបង បានឲ្យដឹងថា កាលពីថ្ងៃ ទី២៤ខែមិថុនាឆ្នាំ២០២០ វេលាម៉ោង១០និង០០នាទី អនុវត្តតាមមតិដឹកនាំរបស់ ឯកឧត្តម ឧត្តមសេនីយ៍ទោ អ៊ុច សុខុន ស្នង ការនៃស្នងការដ្ឋាននគរបាលខេត្តបាត់ដំបង ព្រមទាំងអនុវត្តតាមការណែនាំជំនាញលោកឧត្តមសេនីយ៍ត្រី កុយ ហៀង ស្នងការរងផែនការងារគ្រឿងញៀន និងលោកវរសេនីយ៍ទោ លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ កម្លាំងផ្នែកជំនាញនៃអធិការនគរបាលស្រុករុក្ខគីរី ដែលមានលោកវរសេនីយទោ ឆាយ ម៉ាប់ ជាអធិការនគរបាលស្រុក បានអនុវត្តដីកាបង្គាប់ឱ្យចាប់ខ្លួនចំនួន២ដីកា ដោយអនុវត្តលើមនុស្សចំនួន១នាក់ ឈ្មោះ ឆាត ចន្ថា ហៅចាស់ ភេទប្រុស កើតឆ្នាំ ១៩៩៩ ដែលមានដីកាបង្គាប់ឱ្យចាប់ខ្លួនចំនួន២បទល្មើសផ្សេងគ្នាគឺ៖
១-ដីកាលេខ៤៤៧ត.ព្រ១៩ ចុះថ្ងៃទី៧ ខែសីហា ឆ្នាំ ២០១៩ ដោយប្រធានក្រុមប្រឹក្សាជំនុំជម្រះ លោកជា វណ្ណៈ នៃសាលាដំបូងខេត្តបាត់ដំបង ចោទប្រកាន់ពីបទ (រំលោភសេពសន្ថវៈ) និងផ្ដន្ទាទោសកំណត់រយៈពេល ៦ឆ្នាំ គិតចាប់ពីថ្ងៃចាប់ខ្លួនបាន ប្រព្រឹត្តនៅភូមិព្រែកតាវេន ឃុំព្រែកជីក ស្រុករុក្ខគីរី ខេត្តបាត់ដំបង កាលពីថ្ងៃទី ២៥ ខែកញ្ញា ឆ្នាំ ២០១៦ ។
២-ដីកាបង្គាប់ឲ្យចាប់ខ្លួនលេខ៦៧ត.ព្រចុះថ្ងៃទី ១ ខែមីនា ឆ្នាំ ២០១៧ ដោយចៅក្រមស៊ើបសួរ លោក ជា វណ្ណ: នៃសាលាដំបូងខេត្តបាត់ដំបង ចោទប្រកាន់ពីបទ (ជួញដូរដោយខុសច្បាប់នូវសារធាតុញៀន) ប្រព្រឹត្តនៅចំណុចក្រុមទី ០៣ ភូមិព្រែកតាវេន ឃុំព្រែកជីក ស្រុករុក្ខគីរី ខេត្តបាត់ដំបង កាលពីថ្ងៃទី ២៦ ខែតុលា ឆ្នាំ ២០១៦ ។
នៅពេលនេះ នគរបាលស្រុកបានបញ្ជូនខ្លួន មកកាន់ការិយាល័យជំនាញ ដើម្បីបញ្ជូនទៅសាលាដំបូងខេត្តបាត់ដំបង តាមនីតិវិធី៕
ដោយ៖បញ្ញាស័ក្តិ
