ខេត្តព្រះសីហនុ៖ ឯកឧត្តម យន្ត មីន អភិបាលខេត្តព្រះសីហនុ បានដឹកនាំមន្ត្រីរាជការទាំងស្ថាប័នស៊ីវិល ស្ថាប័នកងកម្លាំងប្រដាប់អាវុធ លោកគ្រូ អ្នកគ្រូ និងសិស្សានុសិស្ស នៅតាមសាលាមួយចំនួន ធ្វើពិធីដាំកូនឈើប្រណីត នៅក្នុងបរិវេណសាលាខេត្តព្រះសីហនុ កាលពីព្រឹកថ្ងៃ ទី២៩ ខែមករា ឆ្នាំ២០១៨។
មន្ត្រីសាលាខេត្តព្រះសីហនុ បានឲ្យដឹងថា ពិធីដាំកូនឈើនាឱកាសនេះ គឺជាព្រះរាជអំណោយ របស់ព្រះករុណា ព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រទានជូន រដ្ឋបាលខេត្ត ដើម្បីដាំជានិមិត្តរូប នៃការបំផុសចលនា ឲ្យផ្នែកពាក់ព័ន្ធចូលរួមដាំដើមឈើ ឲ្យបានទាំងអស់គ្នានៅទូទាំងប្រទេសកម្ពុជា។
ទន្ទឹមគ្នាបានចលនាឲ្យ មន្ត្រីរាជការ ប្រជាពលរដ្ឋ និងក្រុមយុវជន ចូលរួមដាំកូនឈើ ផ្តើមដោយ ឯកឧត្តម យន្ត មីន អភិបាលខេត្តព្រះសីហនុពេលនេះ គេសង្កេតឃើញថា ដីគម្របព្រៃឈើបៃតងឆ្នាំ២០០២ ដែលសម្តេចអគ្គមហាសេនាបតីតេជោ ហ៊ុន សែន បម្រុងទុកនិងបានដាក់ជូនឲ្យរដ្ឋបាលខេត្តព្រះសីហនុ ថែរក្កន្លងមក ប៉ុន្តែបច្ចុប្បន្ននេះ ត្រូវបានកាប់បំផ្លាញរានដីធ្វើកម្មសិទ្ធិឯកជនស្ទើរទាំងស្រុងអស់ទៅហើយ។
ជាក់ស្តែងបរិវេណដីគម្របព្រៃឈើបៃតង មានទីតាំងនៅតំបន់ពយម៉ាចូវ ស្ថិតក្នុងភូមិគគី ឃុំបិតត្រាំង និងឃុំមួយចំនួនទៀត នៃស្រុកព្រៃនប់ ត្រូវបានគេឃុបឃិតគ្នាកាប់បំផ្លាញទន្ទ្រានយកដីធ្វើកម្មសិទ្ធិស្ទើរទាំងស្រុងក្នុងរយៈពេល ២ឆ្នាំចុងក្រោយនេះ។
ស្រដៀងគ្នានេះដែរ ព្រៃឈើធម្មជាតិ ដែលមានដើមធំៗដុះដូចម្រាមដៃ នៅលើកោះរ៉ុង ស្ថិតក្នុងសង្កាត់កោះរ៉ុង ក្រុងព្រះសីហនុ ក៏ត្រូវគេឃុបឃិតគ្នាកាប់បំផ្លាញរានយកដីធ្វើកម្មសិទ្ធិយ៉ាងអនាធិបតេយ្យ ដោយគ្មានអាជ្ញាធរ ពីស្ថាប័នណាមួយចេញមុខទប់ស្កាត់ឲ្យមានប្រសិទ្ធភាពទេ។
អ្នកឃ្លាំមើលសង្គម បានកត់សម្គាល់ថា សកម្មភាពកាប់ទន្ទ្រានព្រៃឈើរានយកដីធ្វើកម្មសិទ្ធិ ឯកជន នាខេត្តព្រះសីហនុ មានលក្ខណៈជាប្រព័ន្ធ គឺមានទាំងមន្ត្រីជាថ្នាក់ដឹកនាំនៅតាមស្ថាប័នជំនាញ កងកម្លាំងប្រដាប់អាវុធ និងមន្ត្រីខ្លះ កំពុងបំរើការងារនៅក្នុងរដ្ឋបាលខេត្តព្រះសីហនុ ពិសេសមន្ត្រីមានឋាន់ខ្ពស់នៅតាមក្រសួង និងស្ថាប័នរដ្ឋកំពូលៗមួយចំនួន ក៏មានជាប់ពាក់ព័ន្ធបទល្មើសព្រៃឈើ ឬភាពអនាធិបតេយ្យ នៃការបំផ្លាញព្រៃឈើ ដែលមាននៅសេសសល់ នាមូលដ្ឋានខេត្តព្រះសីហនុនេះដែរ។
ទាក់ទិនបញ្ហានេះ អ្នកឃ្លាំមើលសង្គម ប្រចាំខេត្តព្រះសីហនុ បានរិះគន់រដ្ឋបាលខេត្តព្រះសីហនុ នៅក្នុងអាណត្តិនេះ ថាអសមត្ថភាព ក្នុងសកម្មភាពការពារធនធានព្រៃឈើ ឲ្យបានគង់វង្សនោះទេ ព្រោះសង្កេតឃើញថា បទល្មើសព្រៃឈើដែលកើតមានកន្លងមកនាមូលដ្ឋាននេះមានដូចជា៖ សកម្មភាពបំផ្លាញព្រៃឈើនៅលើកោះរ៉ុង និងការបំផ្លាញគម្របព្រៃឈើឆ្នាំ២០០២ នៅស្រុកព្រៃនប់ជាដើម មិនសូវឃើញមន្ត្រីជំនាញ នៅតាមមន្ទីរស្ថាប័នពាក់ព័ន្ធ រួមមាន៖ មន្ទីរបរិស្ថាន មន្ទីរកសិកម្ម ជាពិសេសរដ្ឋបាលខេត្តព្រះសីហនុតែម្តង មានវិធានការទប់ស្កាត់ឲ្យមានប្រសិទ្ធភាពទេ។ បច្ចុប្បន្នព្រៃឈើ ដែលមាននៅសេសសល់នាខេត្តព្រះសីហនុ គឺ ត្រូវគេកាប់បំផ្លាញរានយកដីធ្វើកម្មសិទ្ធិស្ទើទាំងស្រុង ជាឧទារណ៍ព្រៃឈើនៅលើកោះរ៉ុង និងដីគម្របព្រៃឈើបៃតងឆ្នាំ២០០២ជាភស្តុតាងស្រាប់៕ ដែន សីមា
