ភ្នំពេញ៖បុរស់ពីនាក់បានឌុបគ្នាចេញមកពីធ្វើការ ស្រាប់តែមកដល់ចំណុចកើតហេតុមុខក្លឹបវាយកូនហ្គោល ក៏ជ្រុលចង្កូតទៅបុកចំពីមុខរថយន្តពេញទំហឹង បណ្តាលឲ្យបាក់កស្លាប់ម្នាក់ រីឯម្នាក់ទៀតរងរបួសធ្ងន់ បញ្ជូនទៅមន្ទីរពេទ្យភ្លាមៗ។
ហេតុការណ៍នេះ កើតឡើងនៅតាមបណ្តោយផ្លូវវិមាន ឈ្នះឈ្នះ ក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ នៅវេលាម៉ោង ២ និង៣៥ នាទីថ្ងៃអង្គារ ទី៣០ ខែមិថុនា ឆ្នាំ២០២០។
បុរសដែលស្លាប់មានឈ្មោះ ពុទ្ធី អាយុ ២២ ឆ្នាំ មុខរបរធ្វើកូនជាង ដាក់លូ មានស្រុកកំណើតនៅភូមិថ្មី ឃុំចំបក់ ស្រុកស្វាយជ្រំ ខេត្តស្វាយរៀង (នៅលីវ)។ រីឯនាក់រងរបួសមានឈ្មោះ ចក់រ៉ាស៊ីន អាយុ ២០ឆ្នាំ ជាងមានមុខរបរ កូនជាងដាក់លូដូចគ្នា
មានស្រុកកំណើត និងភូមិឃុំជាមួយគ្នា បច្ចុប្បន្ន ស្នាក់នៅម្តុំបឹងតាមោក ជិតកន្លែងធ្វើការ។
បើយោងតាមប្រភពព័ត៌មាន ពីកន្លែងកើតហេតុបានឲ្យដឹងថា គេឃើញរថយន្តម៉ាកឡិចស៊ីស RX300 ពណ៌ទឹកប្រាក់ ដែលពាក់ផ្លាកលេខ កណ្តាល 2A 9358 បើកបរដោយបុរសម្នាក់ ធ្វើដំណើចេញពី ក្លឹប វាយកូនហ្គោល រ៉ូយ៉ាល់ ភ្នំពេញកម្ពុជា ក្នុងទិសដៅពីលិចមក កើតស្រាប់តែមកដល់ចំណុចកើតហេតុខាងលើ គេឃើញម៉ូតូទ្រីម សង់ពណ៌ខ្មៅ សេ ១២៥ ជិះគ្នាពីរនាក់ ដែលពាក់ផ្លាកលេខ ភ្នំពេញ 1FV 9071 ធ្វើដំណើក្នុងទិសដៅពីជើងមកត្បូង ស្រាប់តែមកដល់ចំណុចកើតហេតុ ក៏វាក់ អើជាមួយនឹងរថយន្តជ្រុលចង្កូតទៅបុកចំពី ខាងមុខពេញទំហឹងបណ្តាលឲ្យបាក់កស្លាប់ម្នាក់ និងម្នាក់ទៀតរងរបួសធ្ងន់យកទៅសង្គ្រោះបន្ទាន់នៅមន្ទីរពេទ្យ។
ក្រោយពេលកើតហេតុសមត្ថកិច្ចមូលដ្ធានមកដល់ រួចក៏ទាក់ទងទៅមន្ត្រីជំនាញចរាចរណ៍ក្រុងឲ្យចុះពិនិត្យ និងវាស់វែង រួចសរសេរលិខិតប្រគល់សពជូនរថយន្តសាម៉ុយយកទៅតម្កល់ទុកទៅវត្តទឹកថ្លា រង់ចាំសាច់ញាតិ យកទៅធ្វើបុណ្យនៅស្រុកកំណើតខេត្តស្វាយរៀងតាមប្រពៃណី៕
ដោយ៖សាមេត