ភ្នំពេញ៖ គម្រោងខុនដូ The Seven Residence បានធ្វើពិធីក្រុងពាលី បុកគ្រឹះនិងសម្ពោធបើកលក់ជាផ្លូវការកាលថ្ងៃទី១០ ខែកក្កដា ឆ្នាំ២០១៩ ហើយនៅថ្ងៃទី៣ ខែកក្កដានេះ បានរៀបចំធ្វើពិធីបញ្ចប់ខ័ណ្ឌផ្ទាល់ដី ដែលនឹងឈានទៅសាងសង់ជាន់ទី១នាពេលឆាប់ៗខាងមុខនេះ។
The Seven Residence បានប្រកាសថា ជាខុនដូដំបូងគេ ដែលមានតម្លៃសមរម្យ និងស្ថិតនៅកណ្តាលក្រុងជិតផ្សារទំនើបអ៊ីអន២ សាងសង់នៅលើផ្ទៃដីជាង ៣ម៉ឺនម៉ែត្រការ៉េ កម្ពស់ ២៧ ជាន់ ស្ថិតនៅភូមិបាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងជាសំណង់ខុនដូសាងសង់ទៅតាមបទដ្ឋានស្តង់ដារ ធានាបាននូវសុវត្ថិភាពខ្ពស់។
លោក អ៊ុក ច័ន្ទដារ៉ាវុធ ជានាយកផ្នែកលក់ និងទីផ្សារនៃខុនដូ The Seven Residence បានឲ្យដឹងថា បច្ចុប្បន្ននេះ តម្លៃផ្ទះបានកើនឡើងយ៉ាងខ្លាំងនៅក្នុងទីក្រុងភ្នំពេញ ប្រជាពលរដ្ឋខ្មែរមួយចំនួន បានកំពុងងាកមករកការទិញខុនដូរ សម្រាប់ការរស់នៅដែលមានសុវត្ថិភាព និងគ្មានហានិភ័យ ដែលមានតម្លៃចាប់ពី ១៤០០ ដុល្លារ ទៅ ២ពាន់ដុល្លារ ក្នុងមួយម៉ែត្រការ៉េ ព្រោះបច្ចុប្បន្នប្រជាពលរដ្ឋអាចបង់រំលោះបានរហូតដល់ ២៥ឆ្នាំ ឬចង់បង់ផ្តាច់ពេលណាក៏បាន ដោយមិនមានប្រាក់កក់ ជាមួយ ខុនដូ The Seven Residence នេះ។
លោកបន្តថា និន្នាការខុនដូតម្លៃសមរម្យនៅកណ្តាលក្រុងភ្នំពេញ កំពុងទាក់ទាញប្រជាពលរដ្ឋខ្មែរ ដែលចង់រស់នៅកន្លែងមានសុវត្ថិភាព និងគ្មានហានិភ័យ។ ៥ឆ្នាំទៅមុខទៀត ប្រជាពលរដ្ឋខ្មែរ និងមានទំនោរទៅលើការរស់នៅក្នុងខុនដូ ជាពិសេសខុនដូដែលមានតម្លៃសមរម្យ និងនៅកណ្តាលក្រុង។
លោក អ៊ុក ច័ន្ទដារ៉ាវុធ បានគូសបញ្ជាក់ថា កត្តាហិរញ្ញវត្ថុ កត្តាសុខភាព កត្តាសុវត្ថិភាព និងកត្តាចរាចរណ៍ ជាមូលហេតុដែលធ្វើឲ្យប្រជាពលរដ្ឋខ្មែរងាកទៅរកការរស់នៅក្នុងខុនដូ ព្រោះការរស់នៅបែបនេះ មានគ្រប់បែបយ៉ាង មានផ្សារទំនើប ភោជនីយដ្ឋាន កន្លែងហាត់ប្រាណ ស្ទីមសូណា កន្លែងក្មេងលេង និងបណ្ណាល័យជាដើម គឺនៅកន្លែងតែមួយ មិនចាំបាច់ចំណាយពេលយូរ និងអាចជួយកាត់បន្ថយការចំណាយច្រើនជាដើម។
គួរបញ្ជាក់ថា សម្រាប់ទីផ្សារខុនដូបច្ចុប្បន្ន បែងចែកជា៣កម្រិត មានកម្រិតមធ្យមតម្លៃប្រមាណ ១,៤០០ដុល្លារក្នុងមួយម៉ែត្រការ៉េ និងលើមធ្យមតម្លៃប្រមាណ ២,៦៥០ដុល្លារក្នុងម៉ែត្រការ៉េ និងកម្រិតខ្ពស់ប្រមាណ៣,៣០០ដុល្លារក្នុងមួយម៉ែត្រការ៉េ៕
ដោយ៖CEN
