ភ្នំពេញ៖ បើតាមប្រភពព័ត៌មានពី facebook ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់និងនេសាទ បានឲ្យដឹងថា គិតមកត្រឹម ថ្ងៃទី៩ ខែកក្កដា ឆ្នាំ២០២០ ការងារបង្កបង្កើនផលស្រូវរដូវវស្សា នៅទូទាំងប្រទេស សម្រេចធ្វើការស្ទូងនិងព្រួសបាន ១ ៩៤៩ ៧២៥ ហិកតា ស្មើនឹង ៧៥,២៨% នៃផែនការចំនួន ២ ៥៨៨ ១៣០ ហិកតា ក្នុងនោះមាន៖ ស្រូវស្រាលចំនួន ៦១០ ៧៣៦ ហិកតា, ស្រូវកណ្តាលចំនួន ៩៥៣ ៥២៦ ហិកតា, ស្រូវធ្ងន់ចំនួន ៣៣៤ ៦៩៤ ហិកតា, ស្រូវចម្ការចំនួន ១៧ ៦៨៣ ហិកតា, ស្រូវឡើងទឹកចំនួន ៣៣ ០០៦ ហិកតា ។
ឯកឧត្តម វេង សាខុន បានលើកឡើងថា ទន្ទឹមនឹងនេះ យើងបានប្រមូលផលស្រូវស្រាល ដើមរដូវវស្សាបានជាបណ្តើរៗ បានចំនួន ៣២ ៥៦៥ ហិកតា ទទួលបរិមាណផលសរុបចំនួន ១៤១ ០៣២ តោន ទិន្នផលគិតជាមធ្យម ៤,៣៣១ តោនក្នុងមួយហិកតា ដែលចាត់ទុកថា ជាការទទួលបានផលខ្ពស់ជាងបណ្តាឆ្នាំដទៃទៀត។ ទន្ទឹមនឹងនេះ ក៏យើងបានជួបប្រទះបញ្ហាគ្រោះរាំងស្ងួតនៅតាមឃុំ ស្រុកខ្លះ នៅទូទាំងប្រទេស មួយចំនួនដែរ ប៉ុន្តែមិនប្រឈមខ្លាំងក្លាដូចឆ្នាំកន្លងទៅនោះទេ ៕ដោយ៖កូឡាប
