បន្ទាយមានជ័យ : ការចុះឈ្មោះបោះឆ្នោតថ្មីនៅបន្ទាយមានជ័យបានជាង២ម៉ឺននាក់ ក្នុងចំណោមជាង១៥ម៉ឺននាក់។ ក្នុងចំណោមឃុំសង្កាត់ទាំង៦៥ នៃ៩ស្រុក-ក្រុង មន្ត្រីចុះឈ្មោះនិងមន្ត្រីគជខ និយាយថា នៅសង្កាត់ប៉ោយប៉ែតនិងផ្សារកណ្តាលក្រុងប៉ោយប៉ែត មានអ្នកចុះឈ្មោះច្រើនជាងគេ។
លោក ហី គឹមសេង ប្រធានលេខាធិការដ្ឋានគណ:កម្មាធិការខេត្តរៀបចំការបោះឆ្នោត(គជខ)ខេត្តបន្ទាយមានជ័យអោយដឹងថ្ងៃទី១២តុលាថា ពីការចាប់ផ្តើមចុះឈ្មោះអ្នកបោះឆ្នោតថ្មីនាថ្ងៃទី១ខែកញ្ញាដល់ថ្ងៃទី៩តុលា កន្លងមកនេះ នៅគ្រប់ឃុំសង្កាត់មានអ្នកចុះឈ្មោះថ្មីបាន២១.២៨១នាក់ ក្នុងចំណោមអ្នកត្រូវចុះឈ្មោះដែលប៉ាន់ស្មានបជាង១៥ម៉ឺននាក់ ។
មន្ត្រីចុះឈ្មោះនិងមន្ត្រីគណបក្សនយោបាយអោយដឹងថា ចំនួនចុះឈ្មោះនេះនៅតិច ខណ:រយ:ពេលចុះឈ្មោះសល់មិនដល់១ខែទៀតនោះ(ថ្ងៃទី១កញ្ញាដល់៩វិច្ឆិកា២០១៧ )។នោះមកពីពលរដ្ឋ ពិសេសពលករធ្វើការនៅប្រទេសថៃមិនមកចុះឈ្មោះ, អ្នកចុះឈ្មោះគ្មានជំនឿលើការបោះឆ្នោតខាងមុខ និងដោយសារស្ថានការណ៍នយោបាយអាប់អួរនៅកម្ពូជានិងនិតិវិធីចុះឈ្មោះស្មុគ្រស្មាញ។ល។
សូមរំលឹកថា កាលបោះឆ្នោតជ្រើសរើសក្រុមប្រឹក្សាឃុំសង្កាត់កាលពីថ្ងៃទី៤មិថុនា២០១៧ កន្លងមកមានអ្នកចុះឈ្មោះបោះឆ្នោត៣២៣.៦៥៦នាក់ (នៃពលរដ្ឋក្នុងខេត្តជាង៨០០.០០០នាក់)។
មន្ត្រីអាជ្ញាធរ មន្ត្រីចុះឈ្មោះនិងមន្ត្រីគណបក្សនយោបាយបានអំពាវនាវជាសាធារណ: ថាពេលវេលាចុះឈ្មោះបោះឆ្នោតសល់មិនដល់១ខែទេ(ថ្ងៃទី៩វិច្ឆិកា២០១៧) ដូច្នេះបងប្អូនពលរដ្ឋចាស់ដែលមិនបានចុះឈ្មោះបោះឆ្នោតកន្លងមក និងយុវជននារីដល់អាយុត្រូវចុះឈ្មោះបោះឆ្នោតថ្មីអោយរួសរាន់បំផុត។
អំពីដំណើរការធ្វើបច្ចប្បន្នភាពដោយចុះឈ្មោះបោះឆ្នោតថ្មីនេះ លោក លឹម រី ប្រធានក្រុមចុះឈ្មោះបោះឆ្នោតសង្កាត់ប៉ោយប៉ែតអោយដឹង ថ្ងៃទី១២តុលាថា នៅសង្កាត់ដែលមានពលរដ្ឋច្រើនជាងគេក្នុងខេត្តនេះ មានក្រុមចុះឈ្មោះបោះឆ្នោត ក៏អាចថាច្រើនជាងគេដែរ។ ឯនៅសង្កាត់ផ្សារកណ្តាល ក៏មានអ្នកឈ្មោះច្រើនដែរ។
សូមបញ្ជាក់ថា អ្នកចុះឈ្មោះថ្មីដែលមានសមាសភាពជា ពលរដ្ឋចាស់មិនបានចុះឈ្មោះ,អ្នកខ្វះបែបបទឯកសារចុះឈ្មោះកន្លងមក,អ្នកដល់អាយុថ្មី ,អ្នកកែប្រែទិន្នន័យ,ពលរដ្ឋជាពលករខ្មែរមកពីធ្វើការនៅប្រទេសថៃជាដើម៕ដោយ : បន្ទាយ
