ភ្នំពេញ៖ បន្លែធម្មជាតិ ទំពាំងបារាំងនេះ ភាគច្រើនត្រូវបានគេទទួលស្គាល់ថា មានការដាំដុះច្រើននៅខេត្តប៉ៃលិន។ មន្ទីរកសិកម្មខេត្តនេះ បានជំរុញ និងលើកទឹកចិត្តឱ្យប្រជាកសិករ បន្តខិតខំដាំដុះបន្លែធម្មជាតិ ដំណាំទំពាំងបារាំងនេះ ដែលជាមុខរបរមួយបន្ថែមទៀតក្រៅពីធ្វើស្រែចំការ ដើម្បីជួយលើកស្ទួយដល់ជីវភាពគ្រួសារប្រជាកសិករឱ្យរីកចំរើនមួយកម្រិតទៀត។
បណ្តុំកសិករដាំបន្លែធម្មជាតិ ទំពាំងបារាំង នៅខេត្តប៉ៃលិន បានឱ្យដឹងថា ក្នុងមួយឆ្នាំពួកគេ ទទួលបានផលពីទំពាំងបារាំងនេះ ២ ទៅ ៣វគ្គ ដោយក្នុងវគ្គទី១ ដាំដំណាំទំពាំងបារាំង ក្នុងផ្ទៃដី២៤០០ម៉ែត្រការ៉េ ទទួលបានទិន្នផល ២៨ គីឡូក្រាមក្នុងមួយថ្ងៃ និងគិតជាមធ្យមបាន១៧គីឡូ ក្រាមក្នុងមួយថ្ងៃ។ ចំពោះទីផ្សារលក់បន្លែធម្មជាតិ ទំពាំងបារាំងនេះវិញកំពុងមានទីផ្សារខ្ពស់នៅភ្នំពេញ ហើយអាចលក់បានរហូតដល់ ១២០០០រៀលក្នុងមួយគីឡូក្រាម។
លោកស្រី លឹម សុភាព ប្រធានបណ្តុំកសិករដាំទំពាំងបារាំងនៅក្នុងភូមិក្រចាប់ សង្កាត់អូតាវ៉ៅ ក្រុងប៉ៃលិន បានប្រាប់អ្នកសារព័តមានយើងថា “កាលពីមុនមិនសូវមានទីផ្សា តែក្រោយមក ដោយមានការជំរុញ និងផ្សព្វផ្សាយពីមន្ទីរកសិកម្មខេត្តប៉ៃលិន ក៏ដូចជាបណ្តុំក្នុងសហគមន៍ក្រចាប់ គឺគាត់ទទួលបានការកម្មង់ទិញពីប្រជាពលរដ្ឋអ្នកទទួលទានជាច្រើន ជាពិសេសអ្នកនៅភ្នំពេញ”។
ក្រៅពីទីផ្សានៅរាជធានីភ្នំពេញ ទំពាំងបារាំងនេះ ក៏មានការបញ្ជាទិញពីបណ្តាខេត្តផ្សេងៗផងដែរ ដូចជា ខេត្តរតនគិរី មណ្ឌលគិរី ដោយក្នុងមួយគីឡូក្រាម អាចលក់បានក្នុងចន្លោះពី ១០០០០រៀល ដល់ ១៤០០០រៀល។
ជាមួយគ្នានេះ ប្រជាកសិក ដាំដំណាំបន្ថែមធម្មជាតិ ទំពាំងបារាំងក្នុងសហគមន៍ក្រចាប់នេះ បានសំនូមពរដល់មន្ទីរកសិកម្មខេត្ត បន្តជួយជំរុញការបណ្តុះបណ្តាលផ្នែកបច្ចេកទេសដាំដុះ និងការប្រើប្រាស់ជីធម្មជាតិបន្ថែមទៀតដល់ប្រជាកសិករ និងសុំឲ្យជួយរកទីផ្សាកាន់តែទូលាយ និងឱ្យតម្លៃកាន់តែខ្ពស់ជាងនេះ។ កន្លងមកមន្ត្រីនៃមន្ទីរកសិកម្មខេត្តប៉ៃលិន បានចងក្រងជាបណ្តុំកសិករក្នុងភូមិក្រចាប់នេះនិងបានជួយបណ្តុះបណ្តាលក្នុងការដាំដុះ ការថែទាំ និងការប្រើប្រាស់ជី និងជួយរកទីផ្សាជូនពួកគាត់ ដោយបានធ្វើកិច្ចព្រមព្រាង កិច្ចសន្យា ទិញលក់ រវាងអាជីករ ពាណិជ្ជករ និងបណ្តុំកសិករដាំដំណាំបន្លែធម្មជាតិ ទំពាំបារាំងនេះ។
យោងតាមឯកសារស្រាវជ្រាវបង្ហាញថា ជាតិកាកសរសៃដ៏ល្អក្នុងដំណាំបន្ថែមធម្មជាតិទំពាំងបារាំងនេះ អាចជួយទប់ទល់ជាតិស្ករនៅក្នុងឈាមមិនឱ្យឡើងខ្លាំង ជួយកាត់បន្ថយជាតិខ្លាញ់ក្នុងរាងកាយ ជួយឱ្យពោះវៀនធំងាយស្រួលធ្វើការ ជួយឱ្យសរសៃសក់មានសុខភាពល្អ ជួយថែរក្សាសុខភាពភ្នែក និងជួយថែរក្សាសុខភាពបេះដូងថែមទៀតផង៕
ដោយ៖CEN
