ភ្នំពេញ៖ ពិធីបុណ្យមាឃបូជានៅឆ្នាំ២០១៨ បានប្រារព្ធធ្វើឡើង នៅសក្យមុនីចេតិយ លើភ្នំឧត្តុង្គ ស្ថិតក្នុងស្រុកឧត្តុង្គ ខេត្តកំពង់ស្ពឺ ក្រោមអធិបតីភាព លោក ងួន ញ៉ិល អនុប្រធានទី២ នៃរដ្ឋសភា។
ការប្រារព្ធពិធីបុណ្យមាឃបូជានេះឡើង គឺដើម្បីប្រារព្ធនូវព្រឹត្តិការណ៍ធំ៣យ៉ាងគឺ៖ ១៖ ដើម្បីប្រារព្ធនូវការធ្វើចតុរង្គ សន្និបាតប្រកបដោយអង្គបួន ២៖ ដើម្បីប្រារព្ធថ្ងៃដែលព្រះអង្គទ្រង់ សម្តែងឱវាទបាតិមោក្ខ ៣៖ ដើម្បីប្រារព្ធថ្ងៃដែលព្រះអង្គទ្រង់ ដាក់អាយុសង្ខារនៅថ្ងៃអាទិត្យ ខែមាឃ ឆ្នាំរោង។
បើតាមសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងក្នុងផេកផ្លូវការថា “នៅក្នុងឱកាសនៃថ្ងៃមាឃបូជានេះ ខ្ញុំព្រះករុណា ខ្ញុំ សូមប្រគេនពរ និងជូនពរ ដល់ព្រះតេជគុណ ព្រះសង្ឃគ្រប់ព្រះអង្គ បងប្អូនជនរួមជាតិ ទាំងក្នុងនិងក្រៅប្រទេស សូមទទួលបាននូវពុទ្ធពរ៥ប្រការគឺ អាយុ វណ្ណៈ សុខៈ ពលៈ និង បដិភាណៈ ព្រមទាំងសុខសុភមង្គលគ្រប់ក្រុមគ្រួសារ និងធ្វើដំណើរជិតឆ្ងាយទទួលបានសុខសុវត្ថិភាពគ្រប់ៗគ្នា”។
មាឃបូជា ជាពីធីបុណ្យមួយដែលមានសារសំខាន់នៅក្នុងពុទ្ធសាសនា ពិធីបុណ្យនេះគឺដើម្បីរំលឹកដល់ព្រឹត្តិការណ៍សំខាន់ៗនៅក្នុងព្រះពុទ្ធសាសនា ដូចជា ១)- រំលឹកដល់ថ្ងៃចតុរង្គសន្និបាតនៃព្រះភិក្ខុសង្ឃទាំង ១២៥០អង្គ នាថ្ងៃ ១៥ កើត ខែមាឃ និង ២)- រំលឹកដល់ថ្ងៃព្រះសម្មាសម្ពុទ្ធ ដែលទ្រង់បានដាក់អាយុសង្ខារ ពោលគឺ ថ្ងៃ១៥កើត ខែមាឃនេះ ជាថ្ងៃដែលព្រះពុទ្ធព្រះបរមគ្រូ បានត្រាស់ដឹង និងក៏ជាថ្ងៃដែលព្រះអង្គបានចូលបរិនិព្វាន។
សម្តេចតេជោ បានមានប្រសាសន៍ថា “ព្រះពុទ្ធសាសនា មិនត្រឹមតែបានធ្វើឲ្យបងប្អូនប្រជាពលរដ្ឋយើង បានរួមរស់ជាមួយគ្នាដោយសុខសាន្តខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារអត្តសញ្ញាណជាតិទៀតផង។ សូមជូនពរដល់ប្រជាពលរដ្ឋទាំងអស់ ក្នុងឱកាសបុណ្យមាឃបូជានេះ សូមបងប្អូនជនរួមជាតិ ជួបតែសេចក្តីសុខចម្រើនគ្រប់ៗគ្នា”៕ ដោយ៖បញ្ញាស័ក្តិ
