ភ្នំពេញ៖ នៅថ្ងៃទី១៩ខែកក្កដាឆ្នាំ២០២០នេះអ្នកនាំពាក្យក្រសួងសុខាភិបាល លោកជំទាវ ឱ វណ្ណឌីន បានថ្លែងថា តាមរយៈបណ្តាញសង្គមតេឡេក្រាមថា៖កន្លងមក ក៏មានការគេចវេសក្នុងការធ្វើតេស្តរកវីរុសកូវីដ-១៩ ក្នុងចំនួនតិចតួចណាស់ តែមិនមានការគេចវេសធ្វើចត្តាឡីស័កបែបដូចករណីស្ត្រីខ្មែរ-អាមេរិកកាំងនេះទេ ហើយបានអប់រំណែនាំពួកគាត់ ដើម្បីព្រមព្រៀងធ្វើតេស្ត និងតាមដានសុខភាពនិង ត្រូវបានដាក់ធ្វើចត្តាឡីស័កនៅខេត្តកំពង់ចាមចំនួន១៤ថ្ងៃ នៅក្នុងសណ្ឋាគារមួយដែលបានរៀបចំឡើងដោយអាជ្ញាធរខេត្ត។ បុគ្គលដែលមិនគោរព និងមិនប្រតិបត្តិតាមវិធានការសុខាភិបាល ឬរត់គេចវេស ពីការអនុវត្តវិធានការនេះ ដោយចេតនា ឬអចេតនាក្តី នឹងត្រូវទទួលទោស ឫទទួលការផាកពិន័យ សស្របតាមផ្លូវច្បាប់មានជាធរមាននៅកម្ពុជា។
លោកជំទាវ ឱ វណ្ណឌីន បានថ្លែងថា ខ្ញុំសូមជម្រាបជូនសាធារណជនទាំងអស់ ដោយឆ្លើយតបទៅនឹងសំណួររបស់អ្នកសារព័ត៌មានជាច្រើនដែលបានសាកសួរមកខ្ញុំ មានសំណួរប្រហាក់ប្រហែលគ្នាដូចខាងក្រោមនេះ៖
សំណួរទី១. តើស្ត្រីអនិកជនខ្មែរ-អាមេរិចកាំងនោះ នៅបន្តធ្វើចត្តាឡីស័កនៅខេត្តកំពង់ចាម ឬយកមកភ្នំពេញ? ព្រោះឮថា ក្រសួងសុខាភិបាលយកគាត់មកធ្វើចត្តាឡីស័កនៅភ្នំពេញ?
ចម្លើយសំណួរទី១. ស្ត្រីរូបនោះ ត្រូវបានដាក់ធ្វើចត្តាឡីស័កនៅខេត្តកំពង់ចាមចំនួន១៤ថ្ងៃ នៅក្នុងសណ្ឋាគារមួយដែលបានរៀបចំឡើងដោយអាជ្ញាធរខេត្ត។
សំណួរទី២៖ តើកន្លងមកធ្លាប់មានករណីរត់ចេញពីមណ្ឌលធ្វើចត្តាឡីស័កនេះដែរឫទេ? បើមាន តើសរុបប៉ុន្មានករណីដែរ?
ចម្លើយសំណួរទី២. កន្លងមក ក៏មានការគេចវេសក្នុងការធ្វើតេស្តរកវីរុសកូវីដ-១៩ ក្នុងចំនួនតិចតួចណាស់ តែមិនមានការគេចវេសធ្វើចត្តាឡីស័កបែបដូចករណីស្ត្រីខ្មែរ-អាមេរិកកាំងនេះទេ។ យើងបានអប់រំណែនាំពួកគាត់ ដើម្បីព្រមព្រៀងធ្វើតេស្ត និងតាមដានសុខភាពបន្ត។
សំណួរទី៣៖ តើក្រសួងសុខាភិបាលនឹងមានវិធានការបែបណា សម្រាប់ស្ត្រីរូបនេះ ឬអ្នករត់ចេញពីមណ្ឌលចត្តាឡីស័ក្ត ដោយដាក់ទោសទណ្ឌ ឬពិន័យអ្វីទេ ដើម្បីការពារកុំឱ្យមានការរត់ចេញបែបនេះទៀត?
ចម្លើយសំណួរទី៣. នេះជាករណីដែលបានចាកចេញពីកន្លែងធ្វើចត្តាឡីស័ក ដោយមិនបានស្នើសុំត្រឹមត្រូវ ដែលជាទង្វើលួចចេញដោយមិនគោរពតាមវិធានការចត្តាឡីស័ក សម្រាប់គ្រប់គ្រងប្រទេស ក្នុងគ្រាមានការរាតត្បាតជំងឺឆ្លងជាអន្តរជាតិនេះ។ ករណីនេះ ទាមទារពេលវេលាបន្តិចសិន ដើម្បីក្រុមការងារថ្នាក់ក្រោមជាតិដែលមានអាជ្ញាធរខេត្តដឹកនាំ កំពុងធ្វើការងារបន្តទៀតសិន។
សំណួរទី៤៖ ប្រជាពលរដ្ឋខ្មែរដែលនឹងត្រូវធ្វើដំណើរពីប្រទេសរុស្ស៊ី និងអេហ្ស៊ីប ឆ្លងតាមប្រទេសម៉ាឡេស៊ី តើក្រសួងសុខាភិបាលនឹងមានវិធានការ និងធ្វើចត្តាឡីស័កពួកគាត់នៅឯណា?
ចម្លើយសំណួរទី៤. ក្រសួងបានត្រៀមលក្ខណៈជួយសម្របសម្រួលអនុវត្តវិធានការត្រួតពិនិត្យសុខភាពជូនដល់អ្នកដំណើរទាំងអស់ ដែលត្រូវចូលមកកម្ពុជា ដូចដែលបាននិងកំពុងធ្វើហើយ។ ប្រសិនបើមានព័ត៌មានអ្វីបន្ថែមទៀត ក្រសួងសុខាភិបាលនឹងជូនព័ត៌មាន ដល់សាធារណជន ដូចធ្លាប់បានធ្វើកន្លងមកអញ្ចឹង។
សំណួរទី៥. តើលោកជំទាវមានជាសារឬការណែនាំអ្វីចង់បញ្ជាក់បន្ថែមទៀតអ្វីខ្លះដែរទេ?
ចម្លើយសំណួរទី៥. ថ្ងៃនេះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសេចក្តីណែនាំតាមរយៈទំព័រហ្វេសប៊ុករបស់សម្តេចរួចហើយ ដូច្នេះ ខ្ញុំសុំឲ្យបងប្អូនប្រជាពលរដ្ឋទាំងអស់ បន្តការប្រុងប្រយ័ត្នផ្ទាល់ខ្លួនក្នុងការការពារការចម្លងវីរុសកូវីដ-១៩ តាមការអំពាវនាវ និងការណែនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងរបស់ក្រសួងសុខាភិបាល ដូចដែលធ្លាប់បានពន្យល់និងលើកឡើងជារឿយៗ និងច្រើនលើកមកហើយដែរ។ សម្រាប់បុគ្គលដែលត្រូវធ្វើចត្តាឡីស័កចំនួន ១៤ថ្ងៃ៖ ចាំបាច់ត្រូវតែគោរពអនុវត្តវិធានការចត្តាឡីស័កនេះ ឲ្យបានហ្មត់ចត់ត្រឹមត្រូវ ទាំងជនជាតិខ្មែរ ទាំងជនបរទេសទាំងអស់ដែលរស់នៅ និងចូលមកកម្ពុជា។ ប្រសិនបើមិនប្រតិបត្តិតាមវិធានការ ដែលក្រសួងសុខាភិបាល ដាក់ចេញឲ្យអនុវត្តនោះទេ បុគ្គលដែលមិនគោរព និងមិនប្រតិបត្តិតាមវិធានការសុខាភិបាល ឫរត់គេចវេស ពីការអនុវត្តវិធានការនេះ ដោយចេតនា ឫអចេតនាក្តី នឹងត្រូវទទួលទោស ឬទទួលការផាកពិន័យ ស្របតាមផ្លូវច្បាប់មានជាធរមាននៅកម្ពុជា ដូចជាអនុក្រឹត្យលេខ១២៩ អនក្រ.បក ចុះថ្ងៃទី១៧ ខែកញ្ញា ឆ្នាំ២០១៥ ស្តីពី វិធានការសុខាភិបាលដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូល ជាដើម។
លោកជំទាវ ឱ វណ្ណឌីន បានថ្លែងថា “ខ្ញុំសូមអរគុណជាអនេក នូវការចូលរួមរបស់បងប្អូនប្រជាពលរដ្ឋយើងទាំងអស់ ក្នុងការអនុវត្តវិធានការសុខាភិបាល និងការការពារការចម្លងវីរុសកូវីដ-១៩ ឲ្យបានខ្ជាប់ខ្ជួន កុំភ្លេចខ្លួនឲ្យសោះថា កូវីដ-១៩ កំពុងតែនៅចរាចររាតត្បាតពាសពេញ សាកលលោកយ៉ាក្លាំងក្លានៅឡើយទេ និងសូមជូនពរបងប្អូនប្រជាពលរដ្ឋទាំងអស់ មានសុខភាពល្អ សប្បាយរីករាយដោយការប្រុងប្រយ័ត្នជាប់ជានិច្ច ក្នុងថ្ងៃឈប់សម្រាកការងារនៅថ្ងៃទី១៧ ដល់ទី២១ ខែសីហា ឆ្នាំ២០២៩ នាពេលខាងមុខនេះ និងសូមចៀសផុតការចម្លងវីរុសកូវីដ-១៩ពីបុគ្គលម្នាក់ទៅបុគ្គលម្នាក់ទៀត និងកុំឲ្យមានការចម្លងចូលក្នុងសហគមន៍យើងផងដែរ”៕ ដោយ៖កូឡាប
