ភ្នំពេញ៖ ឯកឧត្តម ឧបនាយករដ្ឋមន្ត្រី ហោ ណាំហុង នៅព្រឹកថ្ងៃទី២៣ ខែកក្កដា ឆ្នាំ២០២០នេះ បានដឹកនាំកិច្ចប្រជុំពិភាក្សាលើការងារក្នុងក្របខ័ណ្ឌ ការអនុវត្តផែនការសកម្មភាព ក្នុងការបង្កើតសហគមន៍វាសនារួម កម្ពុជា-ចិន ឆ្នាំ២០១៩-២០២៣ នៅទីស្តីការគណៈរដ្ឋមន្ត្រី។
ឯកឧត្តម ហោ ណាំហុង បានឱ្យដឹងថា សម្តេចតេជោ ហ៊ុន សែន នឹងអញ្ជើញទៅប្រទេសចិន ដើម្បីចុះហត្ថលេខា លើកិច្ចព្រមព្រៀងពាណិជ្ជកម្មសេរីកម្ពុជា-ចិននេះ។ ឯកឧត្តម បានបញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា-ចិន នឹងត្រូវចុះហត្ថលេខា នៅមុនថ្ងៃទី១២ ខែសីហាខាងមុខនេះ ពោល គឺមុនពេលដែលសហភាពអឺរ៉ុប ដកការលើកលែងប្រព័ន្ធអនុគ្រោះពន្ធ EBA ប្រមាណ ២០ភាគរយ ពីប្រទេសកម្ពុជា។
ឯកឧត្តម ហោ ណាំហុង ក្នុងកិច្ចប្រជុំគណៈកម្មាធិការកម្ពុជា សម្រាប់ត្រៀមរៀបចំ កិច្ចប្រជុំគណៈកម្មាធិការសម្របសម្រួល អន្ដររដ្ឋាភិបាលកម្ពុជា-ចិន កាលពីនៅថ្ងៃទី១៦ ខែមិថុនាកន្លងទៅ ធ្លាប់បានមានប្រសាសន៍ថា ការចុះហត្ថលេខា លើកិច្ចព្រមព្រៀងពាណិជ្ជកម្មសេរី កម្ពុជា-ចិននេះ មានន័យ២យ៉ាង គឺក្នុងន័យសេដ្ឋកិច្ចផង និងនយោបាយផង។ ក្នុងន័យសេដ្ឋកិច្ច កិច្ចព្រមព្រៀងនេះ នឹងជួយឲ្យសេដ្ឋកិច្ចកម្ពុជា កាន់តែអភិវឌ្ឍន៍រីកចម្រើន។ ដោយឡែកក្នុងន័យនយោបាយវិញ វាជាសារមួយ បញ្ជាក់ទៅកាន់សហភាពអឺរ៉ុបថា កម្ពុជាមានច្រកសេដ្ឋកិច្ច ពិសេសមួយថែមទៀត ក្រៅពីសហភាពអឺរ៉ុប។
គួរបញ្ជាក់ថា ចាប់តាំងពីឆ្នាំ២០១០មក កម្ពុជា-ចិន បានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ ហើយនៅថ្ងៃទី២៨ ខែមេសា ឆ្នាំ២០១៩ កន្លងទៅ ក្រោមការអនុញ្ញាតពីសម្តេចតេជោ ហ៊ុន សែន នាយករដ្ឋមន្ត្រី និងលោក ស៊ី ជិនពីង ប្រធានាធិបតីចិន ឯកឧត្តមឧបនាយករដ្ឋមន្ត្រី ហោ ណាំហុង តំណាងកម្ពុជា និងលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន បានចុះហត្ថលេខា លើផែនការ៥ឆ្នាំ ដើម្បីកសាងសហគមន៍វាសនារួម កម្ពុជា-ចិន ដូច្នេះ ហើយទំនាក់ទំនងរវាងកម្ពុជាជាមួយចិន ជាទំនាក់ទំនងពិសេស លើគ្រប់ជ្រុងជ្រោយទាំងអស់៕
ដោយ៖CEN