កូរ៉េខាងត្បូង៖ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានសហការជាមួយពុទ្ធិកសមាគមកម្ពុជរដ្ឋ និងសហគមន៍ខ្មែរនៅសាធារណរដ្ឋកូរ៉េ បាននិមន្ដ ព្រះសិរីកោសល សុំ សុខា អនុប្រធានពុទ្ធិកសមាគមកម្ពុជរដ្ឋ រួមនឹងព្រះមន្ត្រីសង្ឈមួយចំនួនទៀត ដើម្បីរៀបចំកម្មវិធី អប់រំសីលធម៌ព្រះពុទ្ធសាសនា រំលឹកគុណ មាតា បិតា ក៏ដូចជាការអប់រំផ្លូវចិត្ត គំនិត ការរៀបចំដំណើរជីវិតតាមគន្លងព្រះធម៌វិន័យ តាមរយៈព្រះធម៌វិន័យរបស់ព្រះពុទ្ធសាសនា។
កម្មវិធីនេះធ្វើឡើង កាលពីថ្ងៃអាទិត្យ១១រោជ ខែមាឃ ឆ្នាំរកា សព្វស័ក ព.ស ២៥៦១ ត្រូវនឹងថ្ងៃទី១១ ខែកុម្ភៈ ឆ្នាំ២០១៨ ចាប់ពីម៉ោង ១០និង០០នាទីព្រឹក នៅទីក្រុងស៊ូវ៉ុន នាភោជនីយដ្ឋាន “ភូមិម្ហូបខ្មែរក្រោមដី” ក្រោមព្រះអធិបតីភាព ព្រះមុនីកោសល ឃឹម សន ព្រះប្រធានលេខាធិការដ្ឋានគណៈសង្ឈនាយក នៃព្រះរាជាណាចក្រកម្ពុជា និងជាព្រះមេគុណរាជធានីភ្នំពេញ ក្នុងគោលបំណងចូលរួមលើកកម្ពស់តម្លៃព្រះពុទ្ធសាសនាជាសាសនារបស់រដ្ឋ ក៏ដូចជាការផ្សព្វផ្សាយព្រះធម៌វិន័យ ឆ្លើយតបសំណូមពររបស់ប្រជាពលរដ្ឋខ្មែរ និងដើម្បីលើកកម្ពស់តម្លៃព្រះពុទ្ធសាសនាជាសាសនារបស់រដ្ឋ ។
កម្មវិធីនេះប្រព្រឹត្តទៅដោយមានវត្តមានបងប្អូនប្រជាពលរដ្ឋខ្មែរនៅកូរ៉េយ៉ាងច្រើនច្រើនកុះករផងដែរ៕ ដោយ៖បញ្ញាស័ក្តិ
