ព្រះសីហនុ ៖ ឯកឧត្តមអភិបាលខេត្តព្រះសីហនុ បានស្នើសុំដល់ឯកឧត្តមឯកអគ្គរាជទូតជប៉ុន ជួយគាំទ្រគម្រោងសាងសង់កំពង់ផែទេសចរណ៍ នៅក្នុងក្រុងព្រះសីហនុ និងជួយសាងសង់មណ្ឌលសុខភាពនៅរាម និងនៅកោះរ៉ុង តាមរយៈកម្មវិធីជំនួយឥតសំណង របស់រាជរដ្ឋាភិបាលជប៉ុន។
នៅព្រឹកថ្ងៃទី៣០ ខែកក្កដា ឆ្នាំ២០២០ ឯកឧត្តមគួច ចំរើនអភិបាលខេត្តព្រះសីហនុ បានអញ្ជើញទទួលជួប ឯកឧត្តម មីកាមី ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា ក្នុងឱកាសដែលឯកឧត្តម ឯកអគ្គរាជទូត បំពេញទស្សនកិច្ច ការងារនៅខេត្តព្រះសីហនុ ជំនួបនេះផ្តោតជាសំខាន់ទៅលើចំណងមិត្តភាពនិងកិច្ចសហប្រតិបត្តិការ កម្ពុជា ជប៉ុន ក្នុងនោះឯកឧត្តម អភិបាលខេត្តក៏បានជម្រាបជូនប្រតិភូអំពីការអភិវឌ្ឍក្នុងខេត្តព្រះសីហនុ លើផ្នែកសេដ្ឋកិច្ច ពាណិជ្ជកម្ម និងហេដ្ឋារចនាសម្ព័ន្ធផ្សេងៗ តាមគោលនយោបាយរបស់រាជរដ្ឋាភិបាល នៃព្រះរាជាណាចក្រកម្ពុជា ។ ឯកឧត្តម អភិបាលខេត្ត ក៏បានជម្រាបពីជំនួយរបស់ប្រទេសជប៉ុនជួយដល់កម្ពុជា រួមមានការជួយអភិវឌ្ឍន៍ហេដ្ឋារចនាសម្ព័ន្ធក្នុងកំពង់ផែស្វយ័តក្រុងព្រះសីហនុជាដើម នេះបង្ហាញពីកិច្ចសហប្រតិបត្តិការល្អរបស់ជប៉ុននៅកម្ពុជាផងដែរ។
ឯកឧត្តម គួច ចំរើន អភិបាលខេត្តព្រះសីហនុ បានថ្លែងអំណរគុណដល់រាជរដ្ឋាភិបាលជប៉ុន ដែលបានគាំទ្រការអភិវឌ្ឍនៅកម្ពុជា ជាពិសេសនៅក្នុងទឹកដីនៃខេត្តព្រះសីហនុ។
ឯកឧត្តមអភិបាលខេត្ត បានមានប្រសាសន៍បន្តថា ខេត្តព្រះសីហនុជាខេត្តទេសចរណ៍ ហើយការអភិវឌ្ឍន៍ រយៈពេលប៉ុន្មានឆ្នាំចុងក្រោយនេះ បានធ្វើឱ្យខេត្តព្រះសីហនុក្លាយជាតំបន់សេដ្ឋកិច្ចពហុបំណង ដែលមានវិស័យសំខាន់ៗដូចជា វិស័យសំណង់ ឧស្សាហកម្ម ពាណិជ្ជកម្ម ដឹកជញ្ជូន និងទេសចរណ៍។ ខេត្តមានកំពង់ផែអន្តរជាតិទឹកជ្រៅ ព្រលានយន្តហោះអន្តរជាតិ ផ្លូវដែក និងផ្លូវគោកជាដើម។
ឯកឧត្តមបន្តទៀតថា តាមលទ្ធភាពឆ្នាំនេះរដ្ឋបាលខេត្តមាន គម្រោងស្តារប្រព័ន្ធអូរ ប្រឡាយក្នុងក្រុងព្រះសីហនុ ដើម្បីរំដោះជំនន់ទឹកភ្លៀង ហើយយើងក៏មានបំណងចង់ ចាក់បេតុងជើងទេតាមអូរ ប្រឡាយ តែមិនទាន់មានថវិកាគ្រប់គ្រាន់។
ជាមួយគ្នានេះឯកឧត្តមអភិបាលខេត្តក៏បានស្នើសុំដល់ឯកឧត្តមអគ្គរាជទូតជប៉ុន ជួយគាំទ្រគម្រោងសាងសង់កំពង់ផែទេសចរណ៍នៅក្នុងក្រុងព្រះសីហនុ និងជួយសាងសង់មណ្ឌលសុខភាពនៅរាម និងនៅកោះរ៉ុង តាមរយៈកម្មវិធីជំនួយឥតសំណងរបស់រាជរដ្ឋាភិបាលជប៉ុនផងដែរ។
ឯកឧត្តអភិបាលខេត្តបានបញ្ជាក់ថា ខេត្តព្រះសីហនុមានសក្តានុពលលើគ្រប់វិស័យ ក៏ប៉ុន្តែមិនទាន់ទំនើប ក្នុងនោះរាជរដ្ឋាភិបាល បានសាងសង់ផ្លូវល្បឿនលឿន ពីរាជធានីភ្នំពេញ មកខេត្តព្រះសីហនុ ផ្តល់ភាពអនុគ្រោះដល់វិស័យទេសចរណ៍ និងវិនិយោគនៅពេលខាងមុខផងដែរ។
ឯកឧត្តម MIKAMI MASAHIRO ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា បានមានប្រសាសន៍ថា នេះជាលើកទីពីរហើយ ដែលឯកឧត្តមមកទស្សនកិច្ចនៅខេត្តព្រះសីហនុ បន្ទាប់ពីឯកឧត្តមបានឡើងកាន់តំណែង ជាឯកអគ្គរដ្ឋទូតជប៉ុនប្រចាំព្រះរាជាណាចក្រកម្ពុជា។ កាលពីរឆ្នាំមុន ឯកឧត្តម ក៏បានមកភ្នំពេញចូលរួមកិច្ចប្រជុំអាស៊ាន ហើយមកដល់បច្ចុប្បន្ន កម្ពុជាមានការអភិវឌ្ឍន៍យ៉ាងខ្លាំង និយាយរួមគឺខេត្តព្រះសីហនុ តែម្តងចាប់តាំងពីឯកឧត្តម គួច ចំរើន បានឡើងជាអភិបាលខេត្តព្រះសីហនុនេះមក។ ខេត្តព្រះសីហនុមានការអភិវឌ្ឍន៍យ៉ាងកំហុក ថ្វីត្បិតតែពិភពលោកកំពុងមាន ជំងឺកូវីដ-១៩ ឆ្លងរីករាលដាលយ៉ាងណាក៏ដោយចុះ។
ឯកឧត្តម MIKAMI MASAHIRO បានបន្តទៀតថាកម្ពុជាឆ្លងកាត់សង្គ្រាមជាច្រើនឆ្នាំ មកដល់ពេលនេះសម្រេចបាននូវសុខសន្តិភាព ស្ថេរភាពនយោបាយ ពិសេស ខេត្តព្រះសីហនុ មានអគារខ្ពស់ៗជាច្រើនកន្លែងកំពុងមានការអភិវឌ្ឍខ្លាំងគួរឱ្យចាប់អារម្មណ៍ មានកំពង់ផែ ដែលមានសក្តានុពលអភិវឌ្ឍន៍ប្រទេសកម្ពុជាឱ្យមានការីកចម្រើនពីមួយថ្ងៃទៅមួយថ្ងៃ។ រាជរដ្ឋាភិបាលជប៉ុន មានកិច្ចសហប្រតិបត្តិការល្អ ពិសេសជាមួយកម្ពុជា និងប្រជាជនជប៉ុន ដែលមករកស៊ីនៅខេត្តព្រះសីហនុ រងគ្រោះដោយសារការរលំបាក់អគារកាលពីកន្លងមក ហើយរដ្ឋបាលខេត្ត ក៏ដូចជារាជរដ្ឋាភិបាលបានយកចិត្តទុកដាក់ដោះស្រាយបានទាន់ពេលវេលា។
ឯកឧត្តម ឯកអគ្គរាជទូតជប៉ុន ចង់ដឹងពីការអភិវឌ្ឍខេត្ត លើបញ្ហាផ្លូវទឹក ប្រព័ន្ធលូ ទឹកស្អុយ ភ្លើងបំភ្លឺផ្លូវ និង មានគម្រោងអភិវឌ្ឍន៍ខេត្តបែបណា ហើយឯកឧត្តមឯកអគ្គរាជទូតជប៉ុន បានថ្លែងអំណរគុណ រដ្ឋបាលខេត្តដែលបានសហការ សម្របសម្រួលក្នុងការចូលចតរបស់នាវាកងទ័ពជើងទឹកជប៉ុន នៅខេត្តព្រះសីហនុ ដែលគ្រោងនៅខែសីហា តែនាវានេះអាក់ខានមិនបានចូលចតនោះទេ ដោយសារមានជំងឺកូវីដ-១៩ កំពុងឆ្លងរាលដាលខ្លាំង នៅពាសពេញពិភពលោក តែទោះជាយ៉ាងណាក៏ដោយ នៅពេលខាងមុខនឹងមាននាវាជាច្រើនទៀតចូលចតនៅកំពង់ផែក្រុងព្រះសីហនុ។ ឯកឧត្តម ក៏បានសន្យាជួយផ្សព្វផ្សាយពីសក្តានុពលខេត្តព្រះសីហនុ ដល់ប្រជាជនជប៉ុន ដើម្បីស្វែងឱកាសវិនិយោគ និងដើរទេសចរណ៍កំសាន្ត នៅក្នុងខេត្តដែលមានសក្តានុពលខាងវិស័យទេសចរណ៍ជាប់ឆ្នេរសមុទ្រមួយនេះ៕
ដោយ៖បញ្ញាស័ក្តិ
