ហេតុការណ៍នៅលើដងផ្លូវមួយ បានធ្វើឲ្យមនុស្សគ្រប់គ្នាមានការសង្ស័យ និងព្រួយបារម្ភយ៉ាងខ្លាំង ខណៈពេលដែលឃើញពួកអ្នកជិះម៉ូតូមាឌធំៗ១ក្រុមពោរពេញដោយកំហឹង បានកំពុងឡោមព័ទ្ធរថយន្តគូស្នេហ៍១គូ ទាំងកណ្តាលផ្លូវស្ងាត់ជ្រងំបែបនេះ ។
ដំបូងឡើយ រថយន្តរបស់គូស្នេហ៍នោះ ត្រូវបានប្រដេញតាមដោយពួកអ្នកជិះម៉ូតូ១ក្រុមយ៉ាងប្រសាចពេញដងផ្លូវ និងបានបង្ខំឲ្យរថយន្តឈប់ ។ ភ្លាមៗនោះ បុរសជាគូស្នេហ៍បានចុះពីរថយន្ត និងទៅតតាំងសម្តីជាមួយបុរសម្នាក់ ដែលជាគ្នីគ្នារបស់ក្រុមនោះ ។ ក្នុងកាយវិការហាក់កាន់តែក្តៅគគុក បុរសអ្នកជិះម៉ូតូនោះ ក៏បានរុញច្រានបុរសជាសង្សារ១ទំហឹង បណ្តាលឲ្យផ្ងាកក្រោយទៅលើក្បាលរបស់រថយន្ត ខណៈមិត្តស្រីរបស់គាត់ បានត្រឹមសម្លឹងមើលទាំងអារម្មណ៍ភ័យខ្លាចបំផុតពីក្នុងរថយន្ត ។
ទោះយ៉ាងណា មិត្តប្រុសនោះបានក្រោកឡើង ស្របពេលដែលមិត្តស្រីរបស់គាត់ក៏បានចុះចេញពីរថយន្ត ។ គាត់បន្ទាប់មក ក៏បានដើរទៅជិតមិត្តស្រី ខណៈពួកអ្នកជិះម៉ូតូនៅតែឡោមព័ទ្ធពួកគេគួរឲ្យខ្លាច ។
ខណៈដែលការវាយតប់ត្រូវបានរំពឹងកើតឡើងនៅពេលណាមួយនោះៗ អ្វីដែលបានកើតឡើងបន្ទាប់ ធ្វើឲ្យនារីជាសង្សារស្ទើរតែពុំគួរឲ្យជឿ ។ ជាក់ស្តែង បុរសជាសង្សារដែលអ្នកបង្កើឈុតឆាកនេះឡើងទាំងស្រុង ភ្លាមៗនោះ បានលុតជង្គង់គ្រឹបដល់ដី និងស្នើសុំមិត្តស្រីរៀបការតែម្តង ។ នេះពិតជាប្រភេទនៃការស្នើសុំរៀបការមួយដែលធ្វើឲ្យ «កូនក្រមុំ» នឹងពុំអាចបំភ្លេចបាន ៕ ចន្ទី
