ភ្នំពេញ ៖ ស្របពេលដែលផលិតផលត្រី ផលិតផលស្វាយ របស់ប្រជាកសិករ ត្រូវការទីផ្សារនាំចេញ ហើយក៏ជាឱកាស សម្រាប់ប្រជាពលរដ្ឋ នៅមូលដ្ឋានទទួល បានការងារធ្វើ មានប្រាក់ចំណូលក្នុងគ្រួសារ តាមរយៈក្រសួងកសិកម្ម ក្រុមហ៊ុន Hunty នឹងនាំចេញសាច់ត្រីប្រាក្លាស្សេ (ហ្វីឡេ) និងផលិតផលស្វាយ ទៅកាន់ប្រទេសចិន ឲ្យបាន១០ម៉ឺនតោនក្នុងមួយឆ្នាំ។
នៅរសៀលថ្ងៃព្រហស្បតិ៍ ទី១ ខែកុម្ភៈ ឆ្នាំ២០១៨ នៅទីស្តីការក្រសួងកសិកម្ម រុក្ខាប្រមាញ់ និងនេសាទ មានរៀបចំពិធីចុះអនុស្សរណៈយោគយល់គ្នា រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រុមហ៊ុន Hunty Co., Ltd ។ អនុស្សរណៈនេះ គឺមានគោលបំណង ពង្រឹងកិច្ចសហការ លើការអនុវត្តផែនការសកម្មភាព នៃគម្រោង នាំចេញសាច់ត្រីប្រាក្លាស្សេ (ហ្វីឡេ) និងផលិតផលស្វាយទៅកាន់ប្រទេសចិន ឲ្យបាន ១០ម៉ឺនតោនក្នុងមួយឆ្នាំនាពេលអនាគត។
លោករដ្ឋមន្ត្រី បានថ្លែងថា លទ្ធផលនាថ្ងៃនេះ គឺបានមកពីការខិតខំប្រឹងប្រែង របស់រាជរដ្ឋាភិបាល ដែលមានសម្តេចតេជោ ជានាយករដ្ឋមន្ត្រី ដែលដឹកនាំប្រទេសប្រកបដោយឆន្ទៈ និងគតិបណ្ឌិត ដែលមានក្រសួងកសិកម្ម រុក្ខាប្រមាញ់ និងនេសាទជាសេនាធិការផ្ទាល់ ក្នុងការខិតខំប្រឹងប្រែងទាំងកម្លាំងកាយ ចិត្ត ពុះពារបាននូវរាល់បញ្ហា ធ្វើយ៉ាងណានាំយកកសិផលកម្ពុជា ទៅកាន់ទីផ្សារអន្តរជាតិ។
លោកបន្តថា សមិទ្ធផលនាថ្ងៃនេះទៀតសោធន៍ ក៏បានមកពីការជឿជាក់ ទុកចិត្តលើការដឹកនាំដ៏ត្រឹមត្រូវ របស់រាជរដ្ឋាភិបាល ហេតុផលនេះ ក្រុមហ៊ុនបានចុះទុនវិនិយោគ ចំពេលដែលផលិតផលត្រី ក៏ដូចជា ផលិតផលស្វាយ របស់ប្រជាកសិករ ត្រូវការទីផ្សារនាំចេញ ហើយក៏ជាឱកាសយ៉ាងប្រពៃ សម្រាប់ប្រជាពលរដ្ឋ នៅមូលដ្ឋានទទួល បានការងារធ្វើ មានប្រាក់ចំណូលក្នុងគ្រួសារ ឈប់ធ្វើចំណាកស្រុក និងកាត់បន្ថយភាពក្រីក្រ សមស្របតាមគោលនយោបាយរបស់រាជរដ្ឋាភិបាល៕ ដោយ៖បញ្ញាស័ក្តិ
