នៅពេលជួបពិភាក្សាការងារជាមួយ លោកសាស្ត្រចារ្យ ផនពេជ្រ វិចិតឆុលឆ័យ (Pornpetch Wichitcholchai) ប្រធានសភានីតិប្បញ្ញត្តិថៃ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានជំរុញឲ្យប្រទេសថៃជួយគាំពារពលករខ្មែរដែលកំពុងធ្វើការនៅក្នុងប្រទេសនេះ។
សម្តេចបានលើកឡើងថា កម្ពុជាសូមថ្លែងអំណរគុណចំពោះរាជរដ្ឋាភិបាលថៃ ក៏ដូចជាអាជ្ញាធរមានសមត្ថកិច្ចពាក់ព័ន្ធរបស់ថៃ ដែលបានបង្កលក្ខណៈ ងាយស្រួល ទាំងលក្ខខណ្ឌការងារ ក៏ដូចជាកិច្ចការពារ ចំពោះពលករកម្ពុជា ដែលកំពុងធ្វើការនៅប្រទេសថៃ។ ទាំងនេះគឺជាយុទ្ធសាស្ត្រ ឈ្នះ ឈ្នះ ទាំងអស់គ្នា ផ្តល់ផលប្រយោជន៍ឲ្យគ្នាទៅវិញទៅមក ព្រោះថាប្រទេសថៃត្រូវការកម្លាំងពលកម្ម ហើយពលករកម្ពុជាក៏ត្រូវការប្រាក់ចំណូល ដើម្បីរួម ចំណែកអភិវឌ្ឍន៍ទាំងអស់គ្នា។
សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់រដ្ឋសភាកម្ពុជា ទៅបំពេញទស្សនកិច្ចជាផ្លូវការ និងមិត្តភាព នៅព្រះរាជាណាចក្រថៃ រយៈពេលបីថ្ងៃ ដែលចាប់ផ្តើមពីថ្ងៃទី១ ដល់ថ្ងៃទី៣ ខែកុម្ភៈ ឆ្នាំ២០១៨នេះ តបតាមការអញ្ជើញរបស់ ឯកឧត្តមសាស្ត្រាចារ្យ ផនពេជ្រ វិចិតឆុលឆ័យ (Pornpetch Wichitcholchai) ប្រធានសភានីតិប្បញ្ញត្តិថៃ។
ដំណើរទស្សនកិច្ចនេះ ក្នុងគោលបំណងពូនជ្រុំ លើកកម្ពស់ទំនាក់ទំនងចំណងមិត្តភាព និងកិច្ចសហប្រតិបត្តិការរវាងប្រទេស និងប្រជាជាតិទាំងពីរ កម្ពុជា-ថៃ ឲ្យកាន់តែរឹងមាំខ្លាំងក្លាទ្វេដងទៀត ជាពិសេសពង្រីកកិច្ចសហប្រតិបត្តិការ រវាងស្ថាប័ននីតិប្បញ្ញតិយើងទាំងពីរ ឲ្យកាន់តែជិតស្និត និង ស៊ីជម្រៅទៀត។
ក្នុងជំនួបដែលធ្វើនៅវិមានរដ្ឋសភាថៃ លោកសាស្ត្រាចារ្យ ផនពេជ្រ វិចិតឆុលឆ័យ ប្រធានសភានីតិប្បញ្ញត្តិរបស់ប្រទេសថៃ បានស្វាគមន៍យ៉ាង កក់ក្តៅចំពោះដំណើរទស្សនកិច្ចរបស់សម្តេចប្រធានរដ្ឋសភា និងគណៈប្រតិភូ។ លោកបានលើកឡើងថា កាលពី៨ឆ្នាំមុនសម្តេចធ្លាប់បានអញ្ជើញ មកទស្សនកិច្ចនៅប្រទេសថៃម្តង ហើយពេលនេះ លោកមានកិត្តិយសយ៉ាងក្រៃលែង ដែលបានជួបពិភាក្សាផ្ទាល់ជាមួយសម្តេច នៅក្នុងការពង្រឹង ពង្រីកចំណងមិត្តភាព និងកិច្ចសហប្រតិបត្តិការឲ្យកាន់តែរឹងមាំឡើងរវាងប្រទេសទាំងពីរ ពិសេសស្ថាប័ននីតិប្បញ្ញត្តិ។
លោកសាស្ត្រាចារ្យ ផនពេជ្រ វិចិតឆុលឆ័យ បានលើកឡើងបន្តថា លោកធ្លាប់បានដឹកនាំគណៈប្រតិភូសភាថៃ មកចូលរួមប្រជុំក្រុមប្រឹក្សាប្រតិបត្តិលើកទី១ នៃមហាសន្និបាតលើកទី១០របស់សភាតំបន់អាស៊ី(APA) ដែលសភាកម្ពុជាធ្វើជាម្ចាស់ផ្ទះកាលពីឆ្នាំ២០១៧។ និយាយជារួមសភា ប្រទេសកម្ពុជា និងសភាប្រទេសថៃ បានរួមសហការជាមួយគ្នាយ៉ាងច្រើននាពេលកន្លងមក ទាំងក្នុងក្របខ័ណ្ឌទ្វេភាគី និងពហុភាគី។
សម្តេចអគ្គមហាពញាចក្រី ហេង សំរិន បានលើកឡើងថា កម្ពុជា-ថៃ ជាប្រទេសភូមិផងរបងជាមួយ ហើយប្រជាជនប្រទេសទាំងពីរ មានទំនាក់ទំនង យ៉ាងជិតស្និទ្ធជាមួយគ្នាតាំងពីបូរម្យបូរាណ មានប្រពៃណី សិល្បៈ វប្បធម៌ស្រដៀងគ្នា ដែលអាចនិយាយបានថា ជាប្រទេសបងប្អូនជាមួយគ្នា។
“ខ្ញុំពិតជាមោទនភាពបំផុត ដោយសង្កេតឃើញពីវឌ្ឍនភាព នៃទំនាក់ទំនងមិត្តភាព និងកិច្ចសហប្រតិបត្តិការរវាងរដ្ឋាភិបាលនៃប្រទេសយើងទាំងពីរ កម្ពុជា-ថៃ មានការរីកចម្រើនជាលំដាប់លើគ្រប់វិស័យ គ្រប់កំរិត ក្នុងស្មារតីភាតរភាពស្និទ្ធស្នាលក្នុងភាពជាដៃគូរ ហើយកិច្ចសហប្រតិបត្តិការនេះបានគ្របដណ្តប់លើគ្រប់វិស័យ ដែលបានផ្តល់ផលប្រយោជន៍ឲ្យគ្នាទៅវិញទៅមក ដើម្បីឧត្តមភាពទាំងសងខាង” នេះជាការគូសបញ្ជាក់របស់សម្តេច ប្រធានរដ្ឋសភា។
ចំពោះទំនាក់ទំនង និងកិច្ចសហប្រតិបត្តិការស្ថាប័ននីតិប្បញ្ញត្តិ នៃប្រទេសទាំងពីរវិញ សម្តេចអគ្គមហាពញាចក្រី បានលើកឡើងថា សភាប្រទេស ទាំងពីរ គួរបង្កើនកិច្ចសហប្រតិបត្តិការជាមួយគ្នាឲ្យកាន់តែល្អប្រសើរថែមទៀត។ កិច្ចសហប្រតិបត្តិការនេះ គួរតែធ្វើនៅគ្រប់កំរិត កំរិតថ្នាកដឹកនាំ ជាន់ខ្ពស់ ក្រុមមិត្តភាពសភាទាំងពីរ គណៈកម្មការជំនាញនានានៃរដ្ឋសភា រហូតដល់អគ្គលេខាធិការដ្ឋានរដ្ឋសភាផងដែរ។ សម្តេចបន្តថា អគ្គលេខា- ធិការរដ្ឋសភាកម្ពុជា និងថៃ គួរពិនិត្យកែលម្អចំណុចខ្វះខាតនៃអនុស្សរណៈនៃកិច្ចព្រមព្រៀងដែលមានស្រាប់ សំដៅធ្វើឲ្យកិច្ចសហប្រតិបត្តិការកាន់តែរលូន និងស៊ីជម្រៅ។
នៅក្នុងឱកាសនោះ សម្តេចអគ្គមហាពញាចក្រី ហេង សំរិន ក៏បានលើកឡើងពីស្ថានការណ៍នយោបាយនៅក្នុងប្រទេសកម្ពុជាជម្រាបជូនភាគីថៃ ផងដែរ។ សម្តេចបានគូសបញ្ជាក់ថា សភាពការណ៍នយោបាយនៅកម្ពុជាបច្ចុប្បន្ន មានលក្ខណៈកាន់តែល្អប្រសើរ បន្ទាប់ពីរាជរដ្ឋាភិបាលកម្ពុជាបាន ទប់ស្កាត់ទាន់ពេលវេលានូវឧបាយកលប៉ុនប៉ងផ្តួលរំលំរាជរដ្ឋាភិបាលស្របច្បាប់ តាមរយៈការបំផុសធ្វើបដិវត្តន៍ពណ៌របស់បក្សប្រឆាំង ដោយមានការ ជួយជ្រោមជ្រែងពីខាងក្រៅ។ កន្លងមកបក្សនេះតែងតែបំពាន ញុះញង់ បង្កឲ្យមានអស្ថិរភាព អសន្តិសុខ រំលោភបំពានច្បាប់រដ្ឋធម្មនុញ្ញ ដែលបង្ខំឲ្យតុលាការកំពូលចាត់ការតាមនីតិវិធីច្បាប់រំលាយគណបក្សនេះ និងហាមឃាត់សិទ្ធិធ្វើនយោបាយរយៈពេល៥ឆ្នាំ។ ហើយប្រធានបក្សប្រឆាំង ត្រូវបាន ចាប់ខ្លួន ពីបទធ្វើសន្ទិដ្ឋិភាពជាមួយបរទេស ដែលជាបទល្មើសក្បត់ជាតិ។
សម្តេចប្រធានរដ្ឋសភា បានគូសបញ្ជាក់ថា កម្ពុជាខិតខំរក្សាបាននូវសុខសន្តិភាព ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច រយៈពេលវែង ព្រមទាំងធ្វើកិច្ចសហការល្អជាមួយបណ្តាប្រទេសក្នុងតំបន់ និងសកលលោក ដើម្បីធ្វើការអភិវឌ្ឍប្រទេសជាតិឲ្យកាន់តែថ្កុំថ្កើងឡើង។ ជាចុងក្រោយ សម្តេចបានអញ្ជើញ លោកសាស្ត្រាចារ្យ មកបំពេញទស្សនកិច្ចនៅកម្ពុជា ក្នុងពេលវេលាសមស្របណាមួយ។
លោកសាស្ត្រាចារ្យ ផនពេជ្រ វិចិតឆុលឆ័យ បានទទួលយកការអញ្ជើញរបស់សម្តេច និងបានគាំទ្រការលើកឡើងរបស់សម្តេច ពីវិធានការរបស់ រាជរដ្ឋាភិបាលកម្ពុជា ក្នុងការរក្សាសុខសន្តិភាព ស្ថិរភាពនយោបាយនៅក្នុងប្រទេស។ លោកប្រធានសភានីតិប្បញ្ញត្តិរបស់ប្រទេសថៃ បានមាន ប្រសាសន៍ថា ជាធម្មតានៅក្នុងសង្គមប្រជាធិបតេយ្យ គឺរដ្ឋាភិបាលមានកាតព្វកិច្ចថែរក្សាសុខសន្តិភាព ស្ថិរភាពសង្គមជូនពលរដ្ឋ និងប្រទេសជាតិ៕ ដោយ ៖ បញ្ញាស័ក្តិ