ខេត្តព្រះសីហនុ៖ ប្រជាពលរដ្ឋក៏ដូចជាភ្ញៀវទេសចរផងដែរ នឹងទទួលបានការសប្បាយរីករាយ ជាពិសេសការចាប់អារម្មណ៍ នឹងការកម្សាន្តនៅខេត្តព្រះសីហនុ នៅក្នុងតំបន់កោះពស់ដែល អាជ្ញាធរខេត្តព្រះសីហនុ ក៏ដូចជាក្រុមហ៊ុនកោះពស់ បើកឲ្យប្រជាពលរដ្ឋអាចធ្វើដំណើរ នៅលើស្ពានកោះពស់ដោយសេរី ដើម្បីទស្សនាទិដ្ឋភាពខេត្តព្រះសីហនុ ឆ្នេរសមុទ្រដ៏ស្រស់ស្អាត។
រដ្ឋបាលបាលខេត្តព្រះសីហនុ ចេញសេចក្តីជូនដំណឹង ដល់ក្រុមហ៊ុនកោះពស់(ខេមបូឌា)អ៉ិនវេសមិនគ្រុប អិលធីឌី ឲ្យបើកចរាចរណ៍ស្ពាននេះ អនុញ្ញាតជូនពលរដ្ឋបានធ្វើដំណើរកម្សាន្តលើស្ពាន ។
បើតាមសេចក្តីជូនដំណឹងដែលចុះហត្ថលេខាដោយលោកគួច ចំរើនអភិបាលខេត្តព្រះសីហនុ ចុះថ្ងៃទី១០ ខែសីហា ឆ្នាំ២០២០ បានបញ្ជាក់ថា ចរាចរណ៍លើស្ពានកោះពស់ ជាសាធារណៈនឹងចាប់អនុវត្តន៍ ចាប់ពីថ្ងៃចេញសេចក្តីជូនដំណឹងនេះតទៅ ។
លោកគួច ចំរើន អភិបាលខេត្តព្រះសីហនុ បានលើកឡើងក្នុងសេចក្តីប្រកាសព័ត៌មាននេះថា
តបតាមកម្មវត្ថុ និងយោងខាងលើ រដ្ឋបាលខេត្តព្រះសីហនុ ជម្រាបជូន លោកនាយក ជ្រាបថា៖ ក្នុងដំណើរការរៀបចំហេដ្ឋារចនាសម្ព័ន្ធនៅក្នុងខេត្តសម្រាប់បម្រើដល់វិស័យទេសចរណ៍ រដ្ឋបាលខេត្ត បាននិងកំពុងស្ថាបនាហេដ្ឋារចនាសម្ព័ន្ធផ្លូវក្រុងចំនួន ៣៤ខ្សែ ជិតរួចរាល់ជាស្ថាពរទៅតាមផែនការ និងបាន រៀបចំកែលម្អ បើកលំហឆ្នេរសមុទ្រសម្រាប់ប្រជាពលរដ្ឋបានសម្រាកកម្សាន្តដោយសេរី ដែលពីមុននៅតំបន់ ឆ្នេរខ្លះបិទបាំងនិងហាមឃាត់ការចេញ-ចូលជាសាធារណៈ។ ក្នុងន័យនេះ ស្ពានកោះពស់ក៏បានបិទច្រកទ្វារ មិនអនុញ្ញាតឱ្យប្រជាពលរដ្ឋធ្វើដំណើរឆ្លងកាត់អស់រយៈពេល ជាច្រើនឆ្នាំមកហើយ ដែលធ្វើឱ្យសាធារណជន មានការថ្នាំងថ្នាក់ និងមិនពេញចិត្តមកលើរដ្ឋបាលខេត្ត។ ហេតុដូច្នេះដើម្បីឆ្លើយតបនូវតម្រូវការរបស់ប្រជាពលរដ្ឋ និងបង្កើនតំបន់ទេសចរណ៍ឱ្យបានច្រើនសម្រាប់ទាក់ទាញភ្ញៀវទេសចរមកកម្សាន្តនៅខេត្តព្រះសីហនុ ឱ្យបានច្រើនកុះករ រដ្ឋបាលខេត្តព្រះសីហនុ ស្នើដល់លោកនាយក បើកចរាចរណ៍ជាសាធារណៈនៅលើស្ពានកោះពស់ សម្រាប់សាធារណជនចេញ-ចូល ចាប់ពីថ្ងៃទទួលបានសេចក្តីជូនដំណឹងនេះតទៅ។
អាស្រ័យហេតុនេះសូម លោកនាយកក្រុមហ៊ុនកោះពស់(ខេមបូឌា)ស៊ិនវេសមិន គ្រុប អិលធីឌី ជ្រាប និងអនុវត្តតាមខ្លឹមសារខាងលើឱ្យទទួលបានលទ្ធផលល្អប្រសើរ៕ ដោយ៖កូឡាប
