ព្រះចៅអធិការវត្ត និងព្រះសង្ឃផ្សេងទៀត នៅវត្តនាងខ្មៅ ខេត្តតាកែវ មានអាការផ្ដាសាយ ហើយទៅព្យាបាលនៅផ្ទះគ្រូពេទ្យជាប់វត្ត ដែលជាគ្រូពេទ្យប្រចាំ ជាបន្តបន្ទាប់ ហើយករណីនេះ ក្រសួងសុខាភិបាល ប្រកាសថា ករណីព្រះសង្ឃ២៨អង្គ មានជំងឺផ្តាសាយធម្មតា។
ក្រសួងសុខាភិបាលកម្ពុជា នៅថ្ងៃទី១៩ ខែសីហា ឆ្នាំ២០២០នេះ បានប្រកាសថា អាជ្ញាធរ លោកស្នងការរងផែនសន្តិសុខ អភិបាលរងស្រុកសំរោង ប្រធានមន្ទីរពេទ្យបង្អែកស្រុក និងមេឃុំ បានចុះដល់ទីតាំង ដោយពិនិត្យឃើញថា ព្រះសង្ឃ២៨អង្គ នៅវត្តនាងខ្មៅ ស្ថិតក្នុងភូមិចា ឃុំរវៀង ស្រុកសំរោង ខេត្តតាកែវ គឺគ្រាន់តែមានជំងឺផ្ដាសាយឆ្លងតគ្នា ហើយអាជ្ញាធរស្នើសុំឲ្យគង់នៅក្នុងកុដិដោយឡែក និងត្រៀមខ្លួនសហការ តាមជំនាញរបស់សុខាភិបាល។
ព្រះចៅអធិការវត្ត និងព្រះសង្ឃផ្សេងទៀត មានអាការផ្ដាសាយ ហើយទៅព្យាបាលនៅផ្ទះគ្រូពេទ្យជាប់វត្ត ដែលជាគ្រូពេទ្យប្រចាំ ជាបន្តបន្ទាប់ ហើយគ្រូពេទ្យមិនយកថវិកា ទើបចៅអធិការវត្ត បង្ហោះសារក្នុងបណ្ដាញសង្គម ថ្លែងអំណរគុណដល់គ្រូពេទ្យ ហើយប្រជាពលរដ្ឋក៏យកព័ត៌មានដែលចៅអធិការវត្តបង្ហោះនោះ ផ្សព្វផ្សាយបន្តគ្នា ធ្វើឲ្យមានភាពភ្ញាក់ផ្អើល រហូតមានការទំនាក់ទំនង ចូលទៅលេខ ១១៥ សុំអន្តរាគមន៍ ចុះពិនិត្យតែម្តង៕ ដោយ៖បញ្ញាស័ក្តិ
