ភ្នំពេញ៖ ឯកឧត្តម ឃួងស្រេង អភិបាលរាជធានីភ្នំពេញ និងលោកជំទាវ នៅថ្ងៃទី២៩ ខែសីហានេះ បានដឹកនាំក្រុមការងារចុះរៀបចំកម្មវិធី ទទួលទាននំបញ្ចុកសន្តិភាព ជូនដល់ក្រុមជនរងគ្រោះ និងងាយរងគ្រោះចំនួន៤០០នាក់ ដែលកំពុងសុំចតនៅមណ្ឌលសង្គមកិច្ចព្រៃស្ពឺ ដើម្បីបង្ហាញពីការអាណិតស្រឡាញ់ និងយកចិត្តទុកដាក់ថែទាំជូនជនរងគ្រោះទាំងនេះ។
នៅក្នុងឱកាសនោះ ឯកឧត្តមអភិបាល បានសម្តែងការអាណិតស្រឡាញ់ ដោយអះអាងថា រាជរដ្ឋាភិបាលបានយកចិត្តទុក្ខដាក់ជាខ្លាំងក្នុងផ្គត់ផ្គង់ជីវភាព ការថែទាំសុខភាព ដើម្បីឲ្យពួកគេបានរស់នៅក្នុងស្ថានភាពកាន់តែប្រសើរ។
មន្ត្រីក្រសួងសង្គមកិច្ចបានឲ្យដឹងថា មជ្ឈមណ្ឌលសង្គមកិច្ចព្រៃស្ពឺនេះ ក្រៅពីមានអគារស្នាក់នៅ កន្លែងផ្តល់សេវាថែទាំងសុខភាព ដល់ជនវិកលចរិត ជនអនាថា ដែលជនរងគ្រោះ និងងាយរងគ្រោះនោះ ក៏មានការផ្តល់ជំនាញវិជ្ជាជីវៈដល់ពួកគេផងដែរ ដើម្បីឲ្យពួកគេពេលសមាហរណកម្ម ត្រឡប់ទៅសហគមន៍វិញ មានមុខជំនាញច្បាស់លាស់ ដែលអាចរកប្រាក់ចំណូលបានដោយខ្លួនឯង ដើម្បីលើកកម្ពស់ជីវភាពនៅក្នុងសង្គម។
ក្រុមជនរងគ្រោះ ជនងាយរងគ្រោះ ឬជនវិកលចរិត ដែលរស់នៅក្នុងមជ្ឈមណ្ឌលនេះភាគច្រើនគឺគ្មានសាច់ញាតិថែទាំឲ្យបានដិតដល់ឡើយ ដោយពួកគេរស់នៅដោយអនាថាតាមសំយាបផ្ទះ សួនច្បារ ឬដើរត្រាច់ចរនៅតាមទីសាធារណៈជាដើម។
សូមបញ្ជាក់ថា នៅក្នុងកម្មវិធីទទួលទាននំបញ្ចុកសន្តិភាព ជូនដល់ក្រុមជនរងគ្រោះ និងងាយរងគ្រោះចំនួន៤០០នាក់ នៅមណ្ឌលសង្គមកិច្ចព្រៃស្ពឺ ឯកឧត្តមអភិបាល និងលោកជំទាវ បានចែកជូនក្រម៉ា និងថ្នាំពេទ្យដើម្បីទុកបង្កានិងព្យាបាលជំងឺជាដើម៕
ដោយ៖កូឡាប
