ភ្នំពេញ៖ តារាសម្តែង គីម លីហ្សា បើទោះជាបានឃ្លាតឆ្ងាយ ពីសិល្បៈអស់រយៈពេលជាច្រើនឆ្នាំ ទៅរស់នៅលើ ទឹកដីប្រទេសអូស្ត្រាលី ក៏តារាស្រីរូបនេះនៅតែទទួលការគាំទ្រខ្លាំងដដែល ជាពិសេសពីសំណាក់បងប្អូននៅលើបណ្តាញសង្គម ដែលតែងចូលកោតសរសើរមិនថាតែទៅលើរូបសម្រស់ និងការពូកែរកស៊ីជាដើម។
ជាការពិតណាស់ ក្រោយពីនាំស្វាមី និងកូនៗ មករស់នៅក្នុងស្រុកខ្មែរវិញ គេសង្កេតឃើញថា គឹម លីហ្សា មួយរយៈចុងក្រោយនេះ ហាក់ទទួលបានភាពជោគជ័យនឹងរបររកស៊ីគួរឲ្យកត់សម្គាល់ ជាពិសេសជាមួយមុខរបរលក់តាមអនឡាញតែម្តង ដែលផលិតផលរបស់នាងកំពុងទទួលការគាំទ្រខ្លាំងពីសំណាក់អតិថិជន គឺមានឈ្មោះថា Jesse។
យ៉ាងណាមិញ ស្របពេលកំពុងរកស៊ីកាក់កបកាន់តែរីកចម្រើនឡើង គឹម លីហ្សា ក៏បានបង្ហើបមានគម្រោងចង់បើកហាងពេជ្រមួយបន្ថែមទៀតផងដែរ ដែលធ្វើឲ្យហ្វេនៗជាច្រើន មានការភ្ញាក់ផ្អើល និងចោទជាសំណួរឡើងថា តើអ្នកនាងគ្រាន់តែនិយាយលេង ឬ យ៉ាងណា ហើយបើពិតមែននោះ នឹងគាំទ្រពេញបេះដូង។
ជាការពិតណាស់ តាមរយៈទំព័រហ្វេសប៊ុករបស់ខ្លួនមានឈ្មោះថា Kim Liza អ្នកនាង លីហ្សា បានបង្ហោះរូបនៅក្នុងកន្លែងហាងពេជ្រ ដោយភ្ជាប់សារពោលពាក្យយ៉ាងដូច្នេះថា៖ «ក្តីស្រម៉ៃរបស់ខ្ញុំ ខ្ញុំនឹងសម្រេចវាឲ្យបាន ទោះយូរយ៉ាងណាក៏ស៊ូ»។ ក្រោយមក អ្នកនាង គឹម លីហ្សា ក៏បានបង្ហោះវីដេអូតបតែងខ្លួនលម្អទៅដោយគ្រឿងពេជ្រយ៉ាងស្រស់ស្អាត ជាមួយ Caption សួរទៅកាន់ហ្វេនៗជាសញ្ញាបង្ហាញកាន់តែច្បាស់ថា៖ «សុំសួរយោបល់បងប្អូនបន្តិច បើខ្ញុំបើកហាងលក់ពេជ្រតើជួយគាំទ្រខ្ញុំទេ?»។
ទាក់ទឹងរឿងបើកហាងពេជ្រខាងលើនេះ បើតាមប្រភពពីអ្នកស្គាល់ជិតស្និទ្ធនឹង គឹម លីហ្សា បានបង្ហើបឲ្យដឹងថា នេះមិនមែនជាការនិយាយលេងសើចនោះទេ ប្រសិនបើមានការគាំទ្រច្រើនពីបងប្អូនមហាជន នោះនាងនឹងបើកហាងពេជ្រពិតប្រាកដមែន ព្រោះថា បច្ចុប្បន្ននេះ ការរកស៊ីតាមអនឡាញរបស់នាងកំពុងដំណើរការយ៉ាងរលូនខ្លាំង ហេតុនេះ ការចំណាយដើមទុនសម្រាប់បើកហាងពេជ្រមួយ វាមិនជាការលំបាកប៉ុន្មានសម្រាប់នាងឡើយ៕ ដោយ៖ លឹម ហុង
