ដូចដែលគ្រប់គ្នាបានដឹងហើយថា ជំងឺ Covid-19 មកទល់ពេលនេះ ពុំទាន់ធូរស្បើយទាំងស្រុងនោះទេ នៅទូទាំងពិភពលោក ដែលគេចាត់ទុកថាជាជំងឺដ៏កំណាច បានឆក់យកជីវិតមនុស្សយ៉ាងលឿនអស់រហូតរាប់សែននាក់ និងលើសពី១លាននាក់ឈឺ នៅទូទាំងពិភពលោក។
យ៉ាងណាមិញ ស្របពេលដែលជំងឺដ៏កាចសាហាវនេះបានកំពុងផ្ទុះខ្លាំង កាលពីអំឡុងខែមេសា ស្រាប់តែតារាសម្តែងថៃ លោក Sin Ruangwut បានបង្ហោះនូវរឿងរ៉ាវដ៏គួរឲ្យព្រឺសម្បុរមួយ នៅលើគណនីរបស់ខ្លួន នោះគឺជាការទស្សន៍ទាយរបស់លោក Nostradamus (ណូស្ត្រាដាម៉ូស) កាលពីឆ្នាំ១៥៥១ ដែលលោកគឺជាឱសថការី និងជាគ្រូទាយដ៏ល្បីឈ្មោះរបស់បារាំង ដែលបានបោះពុម្ភផ្សាយការព្យាករណ៍ដ៏ឆុតៗ ពីស្ថានការណ៍កើតឡើងជាច្រើននៅលើពិភពលោក។
ខ្លឹមសារដែលលោក Sin Ruangwut បានបង្ហោះដោយដកស្រង់ចេញពីសៀវភៅទស្សន៍ទាយនោះ បាននិយាយយ៉ាងដូច្នេះថា «នៅក្នុងអំឡុងឆ្នាំ២០២០ ជំងឺដូចជាជំងឺរលាកសួតដ៏ធ្ងន់ធ្ងរ នឹងរីករាលដាលពាសពេញពិភពលោក ដោយជំងឺនេះនឹងវាយប្រហារសួត និងបំពង់ទងសួត ដែលគ្មានថ្នាំណាអាចព្យាបាលបានឡើយ»។
ការទស្សន៍ទាយបន្តថា «អ្វីដែលគួរឲ្យភ្ញាក់ផ្អើលនោះ គឺថាជំងឺនេះនឹងកើតឡើងវាយប្រហារពិភពលោកសារជាថ្មី នៅអំឡុង១០ឆ្នាំទៀត ប៉ុន្តែ វានឹងរលាយបាត់ទៅវិញរហូត»។
ការបង្ហោះរបស់តារាសម្តែងប្រុសរូបនេះ នៅពេលនោះ បានធ្វើឲ្យមហាជនមានការចាប់អារម្មណ៍ និងភ្ញាក់ផ្អើលយ៉ាងខ្លាំង ព្រោះមិននឹកស្មានថា ការទស្សន៍ទាយនៅក្នុងសៀវភៅតាំងពីឆ្នាំ១៥៥១ វាហាក់ត្រូវចំនឹងស្ថានការណ៍នៃវីរុសកូវីដ១៩ ដែលបានផ្ទុះឡើងពិតប្រាកដដូចការព្យាករណ៍មែន៕ ដោយ៖ លឹម ហុង
