គិតមកទល់ពេលនេះ ការកាន់បិណ្ឌគឺមានរយៈពេល ៣ ថ្ងៃហើយ សម្រាប់ពិធីបុណ្យភ្ជុំបិណ្ឌប្រពៃណីជាតិរបស់ខ្មែរយើង ដែលមានតាំងពីបុរាណកាលមក។ នេះជាពេលវេលាដ៏ធំមួយ សម្រាប់បងប្អូនប្រជាពលរដ្ឋជាពុទ្ធបរិស័ទ អាចមានឱកាសក្នុងការទៅធ្វើបុណ្យដាក់បាត្រប្រគេនចង្ហាន់ដល់ព្រះសង្ឃ ដើម្បីឧទ្ធិសទៅដល់សាច់ញាតិ ឬ អ្នកជាទីស្រឡាញ់ដែលបានចែកឋាន នៅតាមវត្តអារាមជិតឆ្ងាយ ប្រកបដោយក្តីសប្បាយរីករាយ និងជ្រះថ្លាគ្រប់ៗគ្នា។
សូមបញ្ជាក់ផងដែរថា ពិធីបុណ្យកាន់បិណ្ឌ នៅឆ្នាំ ២០២០ នេះ គឺប្រព្រឹត្តទៅ ចាប់ពីថ្ងៃ ១រោច ដល់ថ្ងៃ ១៤រោច ខែភទ្របទ គឺចាប់ពីថ្ងៃទី៣ ដល់ថ្ងៃទី ១៨ ខែកញ្ញា ឆ្នាំ ២០២០។
ទោះជាយ៉ាងណា អ្វីដែលធ្វើឲ្យយើងគ្រប់គ្នាមិននឹកស្មាន និងគួរឲ្យស្រណោះខ្លាំងបំផុតនោះ ដោយនៅថ្ងៃទី៤ ខែកញ្ញា ឆ្នាំ ២០២០ គេបានប្រទះឃើញព្រះចៅអធិការវត្តដ៏កម្សត់មួយនៅក្នុងខេត្តកំពង់ឆ្នាំង បានបង្ហោះសារដ៏រំជួលចិត្ត ប្រកាសអំពាវនាវពុទ្ធបរិស័ទមេត្តាមកកាន់បិណ្ឌនៅវត្ត «ក្រឡាញ់ចាស់» ផង ព្រោះឆ្នាំនេះមានតែ ៥ វេន ប៉ុណ្ណោះ ខណៈព្រះសង្ឃធ្វើចង្ហាន់ដោយខ្លួនឯង។
នេះបើយោងតាមគណនីហ្វេសប៊ុកព្រះសង្ឃមដែលមានព្រះនាម Moch Saoly បានបង្ហោះឲ្យដឹងថា៖ «វត្តក្រឡាញ់ចាស់ ក្នុងរដូវ កាន់បិណ្ឌ សូមប្រគេន និងជូនដំណឹងដល់ព្រះករុណា ញាតិញោមពុទ្ធបរិស័ទ្ធ អោយបានជ្រាបថា វត្តក្រឡាញ់ចាស់ ភូមិស្រងាំទេរ ឃុំប្រស្និប ស្រុករលាប្អៀរ ខេត្តកំពង់ឆ្នាំង ក្នុងរដូវកាន់បិណ្ឌ ឆ្នាំនេះមានតែ ៥ វេនទេ នៅខ្វះ ១០វេនទៀត អាស្រ័យដូចបានប្រគេន ជូនដំណឹងខាងលើនេះ សូមញាតិញោមពុទ្ធបរិស័ទ្ធ ចូលរួមជួយតាមសទ្ធា ជ្រះថ្លា
លេខទូរស័ព្ទ អាត្មាភាពព្រះចៅអធិការ ព្រះនាម ម៉ុច សៅលី 015896999|090896999 ដាច់វេនរាល់ឆ្នាំ ញាតិញោម»៕ ដោយ៖ លឹម ហុង
