ភ្នំពេញ៖ អាពាហ៍ពិពាហ៍គឺជាព្រឹត្តិការណ៍សំខាន់ខ្លាំងណាស់សម្រាប់ក្នុងមួយជីវិតមនុស្សម្នាក់ៗ។ ហើយជាការពិតណាស់កាលពីសម័យមុន មនុស្សប្រុសស្រី២នាក់មុននឹងឈានអាចក្លាយជាប្តីប្រពន្ធនឹងគ្នា គឺត្រូវតែឆ្លងកាត់ការរៀបចំទុកដាក់ឪពុកម្តាយមិនមែនចេះតែធ្វើតាមអំពើចិត្តនោះទេ។ ប៉ុន្តែ មកដល់ពេលបច្ចុប្បន្ននេះវិញ ឃើញថា យុវជន យុវតីខ្មែរយើងមួយចំនួនមានសេរីភាពក្នុងការជ្រើសរើសដៃគូជីវិតដែលខ្លួនស្រឡាញ់ពេញចិត្តនិងស្វែងយល់ចិត្តគ្នាចំណាយពេលតិចឬ ច្រើនមុននឹងឈានដល់ការរៀបការក្លាយជាប្តីប្រពន្ធពេញច្បាប់។
ម្យ៉ាងវិញទៀត ការធ្វើពិធីភ្ជាប់ពាក្យនេះទៀតសោត ក៏ពុំតឹងរ៉ឹងម៉ត់ចត់ដូចសម័យបុរាណខ្មែរយើងកាលពីមុននោះទេ ព្រោះថា ឥឡូវនេះ ទោះគ្មានវត្តមានខាងប្រុស ក៏គេអាចធ្វើពិធីភ្ជាប់ពាក្យក្លាយជាគូដណ្តឹងនឹងគ្នាបង្គ្រប់កិច្ចបានដែរ ដោយកន្លងៗមកយើងក៏ធ្លាប់បានឃើញការពិធីនេះបានកើតឡើងរួចមកហើយ។
ដោយឡែក ងាកមកមើលពិធីភ្ជាប់ពាក្យសម្រាប់គូស្នេហ៍នេះវិញ ក៏មិនខុសពីគូស្នេហ៍មុនៗនោះដែរ ដោយពួកគេទាំងពីរបានធ្វើពិធីភ្ជាប់ពាក្យនឹងគ្នា ក្រោមការដឹងឮពីចាស់ទុំ ក្រុមគ្រួសារសាច់ញាតិទាំងសងខាង ក្នុងពិធីដ៏គួរឲ្យចាប់អារម្មណ៍ដោយខាងស្រីអង្គុយសំពះផ្ទឹមទន្ទឹមនឹងទូរស័ព្ទ តាមរយៈវីដេអូ Call ខណៈខាងប្រុសនៅក្រៅប្រទេស(ប្រទេសកូរ៉េ) ដែលហាក់ដូចកំពុងនៅជិតគ្នាអ៊ីចឹង។
នេះបើយោងតាមគណនីហ្វេសប៊ុករបស់កូនកំលោះឈ្មោះ ខុម សុជាតិបានបង្ហោះរូបភាពពីទិដ្ឋភាពពិធីភ្ជាប់ពាក្យរបស់ខ្លួន ដោយបានសរសេររៀបរាប់ឲ្យដឹងថា៖ «ខ្ញុំសូមអគុណលោកឪពុកអ្នកម្ដាយទាំងសងខាងដែលបានជួយផ្សំផ្គុំអោយកូនទាំពីរជាគូនឹងគ្នា ហើយក៏សូមថ្លែងអំណរអគុណដល់បងប្អូនសាច់ញាតិទាំងសងខាង ដែលបានចូលរួមកម្មវីធីរបស់យើងខ្ញុំ ហើយខ្ញុំសូមជូនពរដល់នាក់ទាំងអស់គ្នាឱ្យមានសុខភាពល្អ និងរកស៊ីទទួលទៀនមានបានគ្រប់ៗគ្នា លាហើយភាពនៅលីវ» ៕ ដោយ៖ លឹម ហុង
