ភ្នំពេញ៖ ពិតណាស់ អ្នករស់នៅជាប់ដងផ្លូវ និងអ្នកធ្វើដំណើរ តែងតែត្អូរត្អែរ និងផ្ទុះកំហឹងយ៉ាងខ្លាំង ទៅនឹងពួកម៉ូតូកែច្នៃបំពាក់បំពង់ស៊ីម៉ាំងបង្កការរំខានលាន់ឮកក្រើកដងផ្លូវ ពីសំណាក់ក្រុមយុវជនស្ទាវមួយចំនួន មិនថានៅតាមបណ្តាខេត្ត ឬនៅក្នុងទីក្រុងភ្នំពេញ ។
ទោះយ៉ាងណា ដើម្បីជាការឆ្លើយតបទៅនឹងការត្អូញត្អែររបស់បងប្អូនប្រជាពលរដ្ឋ សមត្ថកិច្ចយើងក៏បានចុះបង្ក្រាប និងឃាត់ពួកក្រុមយុវជនស្ទាវៗដែលប្រើប្រាស់ម៉ូតូលេងបំពង់ស៊ីម៉ាំងរំខានទាំងនោះ យកមកអប់រំជារឿយៗដោយក្នុងនោះ សមត្ថកិច្ចបានដាក់ទណ្ឌកម្មឲ្យអង្គុយស្តាប់បំពង់ស៊ីម៉ាំងរបស់ពួកគេថាតើវាឮលាន់ពីរោះ និងថ្លង់ប៉ុនណាទៅ។
ជាក់ស្តែងៗ ដូចជានៅក្នុងវីដេអូត្រូវបានចែករំលែកថ្មីៗនេះជាដើម បានបង្ហាញក្មេងស្រីជំទង់ៗ៣ម្នាក់ដែលសុទ្ធតែជាអ្នកក្លាហានប្រចាំភូមិ ត្រូវបានប៉ូលិសដាក់ទណ្ឌកម្មឲ្យអង្គុយស្តាប់បំពង់ស៊ីម៉ាំងឡើងហ៊ឹងស្លឹកត្រចៀកតែម្តង បន្ទាប់ពីពួកគេត្រូវបានចាប់បានប្រើប្រាស់ម៉ូតូជាមួយបំពង់ស៊ីម៉ាំងកែច្នៃបង្ករំខានគេឯង។
អ្វីដែលគួរឲ្យហួសចិត្តខ្លាំងទៀតតនោះ គឺថាពួកក្មេងស្រីស្ទាវៗទាំង៣នាក់នេះ ក្រៅពីលេងបំពង់ស៊ីម៉ាំងម៉ូតូបង្កសម្លេងលាន់ឮខ្លាំងៗ គឺពួកគេសូម្បីលេងស្ទាយបិទកៅអៀកក្បាលឲ្យប្លែកទៀតផង។
ទោះយ៉ាងណា បន្ទាប់ពីដាក់ទណ្ឌកម្មឲ្យអង្គុយស្តាប់បំពង់ស៊ីម៉ាំងម្នាក់ៗឡើងស្ពឹកមុខរួចហើយ សមត្ថកិច្ចក៏បានធ្វើការអប់រំ និងប្តូរស៊ីម៉ាំងថ្មីវិញ៕ ដោយ៖ លឹម ហុង