សារព័ត៌មាន ANI បានបង្ហោះតាមគណនីហ្វេស Twitter របស់ខ្លួន បង្ហាញឲ្យដឹងពីបុរសវ័យចំណាស់ម្នាក់ នៅក្នុងរដ្ឋ Bihar ប្រទេសឥណ្ឌា ដែលបានខិតខំមិនគិតពីការនឿយហត់ ជីកប្រឡាយ១ខ្សែមានប្រវែង ៣ គីឡូម៉ែត្រ ដើម្បីឲ្យទឹកភ្លៀងដែលហូរចុះពីលើភ្នំក្បែរនោះ បានទៅកាន់ភូមិរបស់គាត់ ដោយត្រូវចំណាយពេលអស់រយៈពេល ៣០ ឆ្នាំ ឯណោះ ព្រោះគ្មាននរណាម្នាក់យកភ្នែកមើលជួយត្រួសត្រាយគាត់នោះទេ។
លោកតា Laungi Bhuiyan បានឲ្យដឹងថា៖ «ខ្ញុំបានចំណាយពេល ៣០ ឆ្នាំ ដើម្បីជីកប្រឡាយទឹក១ខ្សែនេះ ដើម្បីឲ្យទឹកភ្លៀងហូរចុះពីភ្នំ ធ្លាក់ទៅកាន់ស្រះក្នុងភូមិ»។
លោកតាបន្ថែមថា៖ «ក្នុងរយៈពេល ៣០ ឆ្នាំ មកនេះ គឺគ្មានអ្នកណាម្នាក់ បានមកចូលរួមក្នុងការខិតខំនេះទេ។ អ្នកភូមិនឹងធ្វើដំណើរទៅកាន់ទីក្រុង ដើម្បីរកប្រាក់ចិញ្ចឹមជីវិត ប៉ុន្តែ ខ្ញុំវិញ បានសម្រេចចិត្តរស់នៅឯស្រុក»។
ទោះយ៉ាងណា ឥឡូវនេះ ប្រឡាយទឹកនេះ ត្រូវធ្វើរួចរាល់ហើយៗ ពួកអ្នកភូមិជាច្រើនក៏បានយល់ពីសារសំខាន់ និងតម្លៃដ៏ធំធេងនៃការងាររបស់គាត់ផងដែរ។
អ្នកភូមិម្នាក់និយាយថា៖ «ប្រឡាយនេះនឹងផ្តល់ប្រយោជន៍ដល់សត្វមួយចំនួនធំ និងដើម្បីស្រោចស្រពដីផងដែរ។ គាត់មិនធ្វើវាដើម្បីផលប្រយោជន៍ផ្ទាល់ខ្លួនទេ តែសម្រាប់តំបន់ទាំងមូល»។
អ្នកផ្សេងទៀតបានចែករំលែកថា៖ “មនុស្សជាច្រើននឹងទទួលបានអត្ថប្រយោជន៍នៅទីនេះ។ ឥឡូវនេះប្រជាជនបានស្គាល់គាត់ដោយសារការងាររបស់គាត់»៕
ដោយ៖ លឹម ហុង (ប្រភព៖ worldofbuzz)
