ភ្នំពេញ៖ ជឿជាក់ថាប្រិយមិត្តនៅក្នុងបណ្តាញសង្គម នៅចាំបានហើយចំពោះអតីតបេក្ខភាព Cambodian Idol រដូវកាលទី២ កញ្ញា នាង ប្រាក់គន្ធា ដែលពេលនេះ កំពុងសាងប្រជាប្រិយភាពបន្តិចម្តងៗបន្ទាប់ពីបានចូលខ្លួនជាតារាចម្រៀងនៅក្នុងផលិតកម្មសាន់ដេ ហើយទទួលបានចាប់អារម្មណ៍យ៉ាងខ្លាំងពិសេសគឺក្រោយពីបានចេញបទចម្រៀងផ្លូវការដ៏មានសន្ទុះគាំទ្រយ៉ាងច្រើនដូចជាបទ “បេះដូងចេះស្រវឹង” និងបទ «គេជាសង្សារ អូនជាប្រពន្ធ» ជាដើម។
យ៉ាងណាមិញ បើយើងងាកទៅមើលរូបសម្រស់របស់នាងវិញ ឃើញថាខុសប្លែកច្រើនណាស់គួរឲ្យចាប់អារម្មណ៍ខ្លាំងមែនទែន ពិសេសទាំងរូបរាង ពណ៌សម្បុររបស់នាងនៅពេលនេះ បានធ្វើឲ្យបណ្ដាប្រិយមិត្តយុវវ័យស្ទើរតែមិនគួរឲ្យជឿ។
ជាក់ស្ដែង កាលពីចូលរួមប្រកួតប្រជែងក្នុងកម្មវិធីប្រលងចម្រៀងលើកដំបូង នោះគេកត់សម្គាល់ឃើញថា តារាចម្រៀងស្រីវ័យក្មេងដ៏មានប្រជាប្រិយភាពរូបនេះ ហាក់បីដូចជាក្មេងស្រីម្នាក់ដែលមានសម្រស់មិនសូវជាសស្អាតប៉ុន្មាននោះទេ ប៉ុន្តែ ក្រោយទទួលបានប្រជាប្រិយភាព និងការគាំទ្រខ្លាំង ពីសំណាក់ប្រិយមិត្តទស្សនិកជន ក៏ស្រាប់តែរូបសម្រស់របស់នាងប្រែជាស្រស់សោភាយ៉ាងឆាប់រហ័សមើលសឹងពុំស្គាល់តែម្តងជាពិសេសជាក់ស្តែងពេលនេះមើលលែងស្គាល់តែម្តង បើមិនប្រាប់ថាជា ប្រាក់គន្ធា នោះ។
សូមបញ្ជាក់ថា កញ្ញា នាង ប្រាក់គន្ធា បានចាប់ផ្តើមល្បីឈ្មោះ គឺក្រោយចេញបទចម្រៀងដំបូងនៅក្នុងផលិតកម្មសាន់ដេ គឺបទ «បេះដូងចេះស្រវឹង» ដែលត្រូវបានបង្ហោះតាំងពីថ្ងៃទី២៣ ខែធ្នូ ឆ្នាំ២០១៧ បានទទួលការគាំទ្រដែលរហូតមានអ្នកចូលទស្សនាមកទល់ពេលនេះជាង ១៩ លានដង៕ ដោយ៖ លឹម ហុង
