ភ្នំពេញ៖រថយន្តដឹកខ្សាច់ចាប់ហ្វ្រាំងមិនស៊ីបានជ្រុលទៅបុករះរថយន្តបួនគ្រឿង រងការខូចខាតយ៉ាងដំណំ តែសំណាងល្អមិនបង្កឲ្យមានគ្រោះថ្នាក់ដល់អាយុជីវិតបងប្អូនប្រជាពលរដ្ឋ គ្រាន់តែរងការខូចខាតរថយន្តចំនួន៣គ្រឿង នៅកន្លែងកើតហេតុ ចំណែកឯរថយន្តមួយគ្រឿងទៀត រងការខូចខាតបន្តិចបន្ទួចក៏បើកចេញទៅបាត់។ ហេតុការណ៍នេះ បានកើតទ្បើងនៅវេលាម៉ោង១០ និង២០នាទី ថ្ងែទី៣ ខែវិច្ឆិកា ឆ្នាំ២០២០ ត្រង់ចំណុចមុខពន្ធដារ ទីតាំងស្ថិតនៅតាមបណ្តោយផ្លូវ១០១៩ នៅភូមិក្រាំស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុគេឃើញរថយន្តដឹកខ្សាច់មួយគ្រឿង ពណ៌ស ពាក់ផ្លាកលេខភ្នំពេញ 3A 8509 បានបើកបរក្នុងទិសដៅពីជើងទៅត្បូងស្របគ្នា មកដល់ចំណុចកើតហេតុបានចាប់ហ្វ្រាំងមិនស៊ីក៏បានបុករះរថយន្តចំនួន៤គ្រឿងរងការខូចខាតយ៉ាងដំណំ។
ក្រោយពេលកើតហេតុក៏ឃើញសមត្ថកិច្ចមូលដ្ឋាន ចុះមកធ្វើការអន្តរាគមន៍ និងបានរាយការណ៍ទៅសមត្ថកិច្ចជំនាញ ចុះមកវាស់វែងនិងយករថយន្តទាំងបួនគ្រឿង យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំការដោះស្រាយទៅតាមផ្លូវច្បាប់នៅពេលក្រោយ៕ ដោយ៖មីដា ផាន់ណា
