បាត់ដំបង៖ប្រជាកសិករនៅក្នុងខេត្តបាត់ដំបង បានចាប់ផ្ដើមធ្វើការបង្កបង្កើនដាំដុះដំណាំស្រូវឡើងវិញហើយ ដើម្បីស្ដារជីវភាពរបស់ពួកគាត់ ខណៈស្ថានភាពជំនន់ទឹកភ្លៀងស្រកអស់ជាបណ្ដើរៗ។
ជំនន់ទឹកភ្លៀងដ៏ធំ មិនងាយធ្លាប់មាន នៅខេត្តបាត់ដំបងនេះ កើតឡើងចាប់ពីសប្ដាហ៍ទី២ នៃខែតុលា ឆ្នាំ២០២០ ដែលបង្កឲ្យមានការប៉ះពាល់រហូតទាំង ១៤ក្រុងស្រុកនៃខេត្តបាត់ដំបង ដោយប៉ះពាល់ពលរដ្ឋចំនួនជាង ៧២ ០០០គ្រួសាររនិងជាង ៦ពាន់គ្រួសារ ត្រូវជម្លៀសចេញទៅកាន់ទីទួលសុវត្ថិភាពហើយប៉ះពាល់ដំណាំកសិកម្មផ្សេងៗជិត ២០ម៉ឺនហិកតា ក្នុងនោះបានខូចខាតទាំងស្រុងចំនួនជាង ៨ម៉ឺនហិកតា។
ពលរដ្ឋរស់នៅឃុំបាយដាំរ៉ាំ ស្រុកបាណន់ បានប្រាប់ឲ្យដឹងថា ក្រៅអំពីបញ្ហាជំងឺកូវីដ១៩ ពួកគាត់បានជួបនូវគ្រោះធម្មជាតិចំនួន២ធំៗ មានបញ្ហាគ្រោះរាំងស្ងួត បណ្ដាលឲ្យស្រូវបង្កើនរដូវ(ស្រូវស្រាល) ជំហានទី១ ខ្វះខាតទឹកស្រោចស្រព តែអាចប្រមូលផលបានខ្លះ ហើយការធ្វើស្រូវបង្កើនរដូវនៅជំហានទី២ ស្រាប់តែមានជំនន់ទឹកភ្លៀងដ៏ធំ ធ្វើឲ្យលិចលង់ស្រូវអស់ជាច្រើនហិកតា រួមទាំងដំណាំកសិកម្មផ្សេងៗមួយចំនួនទៀត ដែលរងការខូចខាតផងដែរ។ក្រោយទឹកជំនន់ស្រកទៅវិញ ពួកគាត់បាននាំគ្នាធ្វើស្រែ ដើម្បីស្ដារជីវភាពឡើងវិញនិងមួយទៀតពួកគាត់ក៏នឹងទទួលបានស្រូវពូជពីសម្ដេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា ដែលសម្ដេចនឹងអញ្ជើញមកចែកក្នុងខេត្តបាត់ដំបងនៅក្នុងខែវិច្ឆិកានេះ ធ្វើឲ្យពួកគាត់មានការសប្បាយរីករាយ៉ាងខ្លាំង។
លោក ង៉ុង ឆាន់លី មេឃុំបាយដាំំរ៉ាំ បានមានប្រសាសន៍ថា នៅក្នុងឃុំបាយដំរាំនេះ ទឹកជំនន់បានធ្វើឲ្យប៉ះពាល់ពលរដ្ឋចំនួន៧៩៣គ្រួសារ ដំណាំស្រូវជាង១២០០ហិកតានិងខូចខាត៨៣ហិកតា សម្រាប់ពលរដ្ឋអាចនឹងទទួលស្រូវពូជពីប្រមុខរាជរដ្ឋាភិបាល ក្នុងជំហានដំបូងនេះ មានចំនួន៤៥គ្រួសារ ព្រោះស្ថានភាពស្រែពួកគាត់នៅជាប់មាត់ប្រឡាយ អាចស្ដារលទ្ធភាពការដាំដុះដំណាំស្រូវឡើងវិញបាន។
គួរបញ្ជាក់ថា បើមិនមានអ្វីប្រែប្រួលនោះទេ នៅថ្ងៃទី៨ ខែវិច្ឆិកា ឆ្នាំ២០២០ខាងមុខនេះ សម្ដេចតេជោហ៊ុន សែន នាយករដ្ឋមន្ត្រី នឹងអញ្ជើញជាអធិបតីដ៏ខ្ពង់ខ្ពស់ ដើម្បីចែកស្រូវពូជដល់ពលរដ្ឋនៅក្នុងខេត្តបាត់ដំបង ដែលបានជួបបញ្ហាគ្រោះទឹកជំនន់និងមានទឹកគ្រប់គ្រាន់ ក្នុងការយកពូជស្រូវទៅស្ដារការដាំដុះឡើងវិញ នារដូវទឹកស្រកវិញ ៕ដោយ៖អ៊ុងសារុំ
