ព្រះសីហនុ៖ថ្នាក់ដឹកនាំ នៃរដ្ឋបាលខេត្តព្រះសីហនុ បំផុសដល់មន្ត្រីរាជការ ប្រជាពលរដ្ឋ ពិសេសយុវជន ត្រូវនាំគ្នាដាំកូនឈើ ឬដើមឈើ នៅតាមអង្គភាព ឬតាមទីតាំងលំនៅឋានរៀងៗខ្លួនឲ្យបានច្រើន ដើម្បីឲ្យមូលដ្ឋាននីមួយៗ មានបរិស្ថានល្អ និងកាត់បន្ថយជាពុលរក្សាសុខភាព។
លោក យន្ត មីន អភិបាលខេត្តព្រះសីហនុ កាលពីព្រឹកថ្ងៃអង្គារ ទី១៧ ខែតុលា បានដឹកនាំមន្ត្រីរាជការ ប្រជាពលរដ្ឋ និងយុវជន ចុះដាំកូនឈើអមសងខាងផ្លូវបេតុងមួយខ្សែមានប្រវែងជិត ៨គីឡូម៉ែត្រ មានទីតាំងតាមផ្លូវចូលទៅកាន់កោះខ្យង ស្ថិតក្នុងស្រុកព្រៃនប់។ នាឱកាសនោះ លោកបានបំផុសដល់ប្រជាពលរដ្ឋ មន្ត្រីរាជការ ពិសេសក្រុមយុវជន ត្រូវចូលរួមដាំដើមឈើ ឬកូនឈើនៅតាមទីតាំងរបស់ខ្លួនឲ្យបានច្រើនដើម្បីបរិស្ថានល្អ និងអាចជួយទប់ស្កាត់គ្រោះធម្មជាតិនានាជាដើម។ លោកចាត់ទុក ដើមឈើថា ជាដង្ហើមរស់ របស់មនុស្ស និងសត្វគ្រប់ប្រភេទ ដូច្នេះគប្បីមនុស្សគ្រប់ៗរូបងាកមកចាប់អារម្មណ៍ការងារថែរក្សាបរិស្ថាន ដោយត្រូវរួមគ្នាដាំដើមឈើនៅជុំវិញលំនៅឋាន ឬអង្គភាពរៀងៗខ្លួនឲ្យបានច្រើនតាមដែលអាចធ្វើទៅបាន។
នាឱកាសដឹកនាំមន្ត្រីរាជការ ប្រជាពលរដ្ឋ និងក្រុមយុវជន របស់ លោកយន្ត មីន ចុះដាំកូនឈើ នៅម្តុំចំណុចទួលគ្រួស ផ្លូវចូលតំបន់កោះខ្យងពេលនេះ គឺបាននាំយកកូនឈើប្រភេទអាកាស្យាជិត ២ពាន់ដើម យកទៅដាំនៅអមសងខាងផ្លូវបេតុងមួយខ្សែ មានប្រវែងជាង ៧ពាន់ ៣០០ម៉ែត្រ ដែលជាចំណងដៃ របស់ សម្តេចនាយករដ្ឋមន្ត្រី ហ៊ុន សែន ផ្តល់ជូនអ្នកធ្វើដំណើរ ពិសេសប្រជាពលរដ្ឋ មានលំនៅឋានក្នុងឃុំចំនួន ៣រួមមាន៖ ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ ស្ថិតក្នុងស្រុកព្រៃនប់ ខេត្តព្រះសីហនុ។
ព្រមជាមួយគ្នានេះ លោក យន្ត មីន អភិបាលខេត្តព្រះសីហនុ ក៏បានជម្រុញដល់ប្រជាពលរដ្ឋ ឲ្យបង្កើនសកម្មភាពដាំដុះដំណាំកសិកម្មផ្សេងៗ និងការចិញ្ចឹមសត្វគោ ក្របី មាន់ ទា ជាពិសេសជាងនេះទៀត ត្រូវនាំគ្នាវារីវប្បកម្ម ចិញ្ចឹម ក្តាម បង្គា ខ្យង និងធនធានត្រីសមុទ្រជាច្រើនប្រភេទទៀត ដើម្បីឈានទៅកាត់បន្ថយការនាំចូលមុខម្ហូបសមុទ្រ ពីប្រទេសជិតខាងឲ្យបានច្រើននាថ្ងៃអនាគត។
លោក យន្ត មីន បានអះអាងថា ទីតាំងនៅតាមតំបន់ឆ្នេរសមុទ្រ ខេត្តព្រះសីហនុ បានអំណោយផលដល់ការធ្វើវារីវប្បកម្ម ឬរបរចិញ្ចឹមត្រីសមុទ្រគ្រប់ប្រភេទ ដើម្បីបំពេញតម្រូវការទីផ្សារខេត្តព្រះសីហនុ ក៏ដូចជាសម្រាប់នាំចេញទៅកាន់ទីផ្សារនានាទូទាំងប្រទេសកម្ពុជា ដោយមិនចាំបាច់ពឹងផ្អែកការនាំចូលពីប្រទេសជិតខាង ចូលមកកម្ពុជានោះទេ៕ សត្យា
