ភ្នំពេញ៖ ការបំបែកឯតទគ្គកម្ម ក្រមាវែងជាងគេលើពិភពកលោក បានបើកជូនជាសាធារណៈដល់បងប្អូនប្រជាពលរដ្ឋគ្រប់ស្រទាប់វណ្ណៈចូលទស្សនាដោយសេរី ដោយមិនប្រកាន់និន្នាការឡើយ នៅព្រឹកទី១៤ ខែកុម្ភៈ ឆ្នាំ២០១៨នេះ ចាប់ពីម៉ោង៨ព្រឹក ដល់ម៉ោង៩យប់ ដែលប្រព្រឹត្តទៅ នៅទីតាំងវាលព្រះមេរុ រាជធានីភ្នំពេញ។
លោកបណ្ឌិត សាន វឌ្ឍនា ប្រធានក្រុមចលនា GoGoCambodia បានថ្លែងថា ជឿថាខ្មែរធ្វើបាន យុទ្ធនាការ ការបំបែកឯតទគ្គកម្ម ក្រមាវែងជាងគេលើពិភពលោក ដែលមានប្រវែងរហូតដល់ទៅ១០០០ម៉ែត្រ ៦១ក្រឡា មានពណ៌ដ៏ស្រស់ស្អាត ក្រហមលាយស បានបើកត្បាញសរសៃដំបូងហើយ និងបានបើកជូនជាសាធារណៈដល់បងប្អូនប្រជាពលរដ្ឋគ្រប់ស្រទាប់វណ្ណៈ ហើយកម្មវិធីនេះ បើកដំណើរការរហូត ទាល់តែយើងត្បាញឲ្យបានគ្រប់១ពាន់ម៉ែត្រ ដូចនេះ សូមបងប្អូនយើងជាកូនខ្មែរ ចូលរួមត្បាញក្រមា ដោយផ្ទាល់ដៃទាំងអស់គ្នា អ្នកណាមកមុន គឺបានត្បាញមុន ដើម្បីការបំបែកឯតទគ្គកម្ម ក្រមាវែងជាងគេលើពិភពកលោក។
គួរបញ្ជាក់ផងដែរថា GoGoCambodia គឺជាចលនាថ្នាក់ជាតិមួយ ដែលកើត ចេញ ពីឆន្ទៈកូន ខ្មែរ ធ្វើឡើងក្នុងគោលបំណងលើកតម្កើងមោទនភាពជាតិខ្មែរ និងបង្ហាញពីសក្តានុពលរបស់កម្ពុជា នៅគ្រប់វិស័យ និងជាវេទិកាសម្រាប់យុវជនខ្មែរគ្រប់រូបអាចបង្ហាញនូវមោទនភាពរបស់ខ្លួន ក្នុងនាមជាកូនខ្មែរ ក៏ដូចជាមោទនភាពជាតិទៅដល់សហគមន៍អន្តរជាតិ៕ ដោយ៖បញ្ញាស័ក្តិ
