ភ្នំពេញ៖ បើយោងតាមរបាយការណ៍ត្រីមាសទី៣របស់ការិយាល័យឥណទានកម្ពុជា ហៅថា CBC បានបង្ហាញឱ្យដឹងថា កម្ចីក្នុងវិស័យអចលនទ្រព្យ ដែលផ្តល់ឲ្យដោយគ្រឹះស្ថានធនាគារ និងហិរញ្ញវត្ថុនៅកម្ពុជាបន្តកើនឡើងគួរឲ្យកត់សម្គាល់ នៅក្នុងឆ្នាំ២០២០នេះ បើទោះបីជាមានបញ្ហាប្រឈមពីវិបត្តិជំងឺកូវីដ១៩ ក៏ដោយ។
ទិន្នន័យ CBC បានបង្ហាញថា កម្ចីក្នុងវិស័យអចលនទ្រព្យបានកើនដល់ ៤,៦ ពាន់លានដុល្លារគិតត្រឹមដំណាច់ខែកញ្ញាឆ្នាំ ២០២០ នេះ ដែលកើនឡើងគួរឲ្យកត់សម្គាល់ពីត្រឹម ៣,៩ ពាន់លានដុល្លារកាលពីដំណាច់ឆ្នាំ២០១៩។
កម្ចីអចលនទ្រព្យ ជាផ្នែកមួយនៃឥណទានលក្ខណៈបុគ្គល ដែលកត់ត្រាដោយ CBC ហើយបើគិតមកត្រឹមខែកញ្ញាឆ្នាំ២០២០នេះ កម្ចីលក្ខណៈបុគ្គល បានកើនដល់ ៩,១១ ពាន់លានដុល្លារ។ សមតុល្យឥណទានលក្ខណៈបុគ្គល រួមមានឥណទានសម្រាប់ប្រើប្រាស់ផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។ ចំនួនប្រជាជនកម្ពុជា ដែលស្នើសុំកម្ចីអចលនទ្រព្យ កើនខ្ពស់ឡើងវិញនៅក្នុងអំឡុងខែ កក្កដា រហូតដល់ដំណាច់ខែកញ្ញាឆ្នាំនេះ ដោយចំនួនអ្នកស្នើសុំកើនឡើង ៥០% បើធៀបនឹងបីខែមុន (មេសា-ឧសភា-មិថុនា) នៃត្រីមាសទី២។ របាយការណ៍នេះបានបង្ហាញថា នៅត្រីមាសទី៣នេះ ទំហំទឹកប្រាក់ នៃការស្នើសុំកម្ចីអចលនទ្រព្យកើនឡើង ៣៦ភាគរយ បើធៀបនឹងត្រីមាសទី២។
អ្នកជំនាញលើកឡើងថា ការងើបឡើងវិញនៃការស្នើសុំកម្ចីអចលនទ្រព្យ ក្នុងអំឡុងត្រីមាសទី៣នេះ បង្ហាញពីសកម្មភាពសេដ្ឋកិច្ច ចាប់ផ្តើមវិលទៅរកសភាពដើមវិញ បន្ទាប់ពីទទួលរងនូវបញ្ហាប្រឈមដោយសារជំងឺកូវីដ-១៩។ លោក អឿ សុធារ័ត្ន ប្រធាននាយកប្រតិបត្តិ ការិយាល័យឥណទានកម្ពុជា បានឱ្យដឹងថា «នៅក្នុងត្រីមាសទី៣នេះ ទីផ្សារឥណទានមានភាពវិជ្ជមាន បន្ទាប់ពីមានការថយចុះកាលពីត្រីមាសមុន»។
លោកបានបន្ថែមថា ការកើនឡើងបណ្តាលមកពីកំណើននៃពាក្យស្នើសុំឥណទាន និងដំណើរការឥណទាននៅក្នុងទីផ្សារជាលក្ខណៈបុគ្គល បើទោះបីជាមានការកើនឡើងនៃអនុបាទនៃគណនីប្រាក់កម្ចីជាមួយនឹងការសងយឺត ៣០ ថ្ងៃហួសកាលបរិច្ឆេទកំណត់ ប៉ុន្តែវានៅតែទាបត្រឹម ២,៤២% នៃគ្រប់តំបន់ទាំងអស់នៅទូទាំងប្រទេសកម្ពុជា៕
ដោយ៖CEN
