ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានសម្រេចលុបអាជ្ញាបណ្ណចំនួន៣ របស់ក្រុមហ៊ុន Chuan Wei (Cambodia) Co., Ltd ។
បើតាមសេចក្តីជូនដំណឹងក្រសួងប្រៃសណីយ៍និងទូរគមនាគមន៍ នៅថ្ងៃទី២៤ ខែវិច្ឆិកានេះស្តីពី ការលុបអាជ្ញាបណ្ណចំនួន ៣ របស់ក្រុមហ៊ុន Chuan Wei (Cambodia) Co., Ltd ឱ្យបានជ្រាបថា ក្រសួងបានសម្រេចលុបអាជ្ញាបណ្ណចំនួន ៣ របស់ក្រុមហ៊ុន Chuan Wei (Cambodia) Co., Ltd រួមមាន (១) អាជ្ញាបណ្ណ សេវាសំឡេងតាមរយៈពិធីការអឺនធឺណិត (២) អាជ្ញាបណ្ណសេវាទូរស័ព្ទចល័ត 4G និង (៣) អាជ្ញាបណ្ណសេវាបណ្តាញ ខ្សែកាប្តីអុបទិកក្រោមបាតសមុទ្រ ។ ក្រសួងនឹងរក្សាទុកអាជ្ញាបណ្ណសេវាអឺនធឺណិត (ISP) ឱ្យក្រុមហ៊ុន Chuan Wei (Cambodia) Co., Ltd បន្តធ្វើអាជីវកម្មដដែល ប្រសិនបើក្រុមហ៊ុនសងបំណុលដែលជំពាក់រដ្ឋ។
គួរបញ្ជាក់ថា កន្លងមកក្រសួងប្រៃសណីយ៍និងទូរគមនាគមន៍បានសម្រេចលុបនិងព្យួរអាជ្ញាបណ្ណរបស់ ប្រតិបត្តិករទូរគមនាគមន៍ចំនួន ១៧ ក្រុមហ៊ុន រួចមកហើយ។ ក្រសួងនឹងបន្តចាត់វិធានការលុបអាជ្ញាបណ្ណរបស់ ប្រតិបត្តិករទូរគមនាគមន៍ទាំងឡាយណាដែលគេចវេះមិនអនុវត្តតាមច្បាប់ និងមិនគោរពតាមលក្ខខណ្ឌនៃអាជ្ញាបណ្ណ ដូចជាមិនមានប្រតិបត្តិការ មិនបានធ្វើស្វ័យប្រកាសបង់ចំណូលត្រឹមត្រូវ មិនផ្តល់ឯកសារហិរញ្ញវត្ថុនិងបច្ចេកទេស គ្រប់គ្រាន់ មិនសងបំណុល ឬមិនបង់ចំណូលជូនរដ្ឋ ជាដើម។
សេចក្តីដូចបានជម្រាបជូនខាងលើ សូមប្រតិបត្តិករទូរគមនាគមន៍ទាំងអស់អនុវត្តឱ្យបានពេញលេញតាមច្បាប់ បទប្បញ្ញត្តិ និងលក្ខខណ្ឌនៃអាជ្ញាបណ្ណ និងសូមសាធារណជនទាំងអស់មេត្តាជ្រាបជាព័ត៌មាន។
ក្រសួងនឹងបន្តចាត់វិធានការលុបអាជ្ញាបណ្ណ របស់ប្រតិបត្តិករទូរគមនាគមន៍ទាំងឡាយណា ដែលគេចវេះមិនអនុវត្តតាមច្បាប់ និងមិនគោរពតាមលក្ខខណ្ឌនៃអាជ្ញាបណ្ណ ដូចជាមិនមានប្រតិបត្តិការ មិនបានធ្វើស្វ័យប្រកាសបង់ចំណូលត្រឹមត្រូវ មិនផ្តល់ឯកសារហិរញ្ញវត្ថុនិងបច្ចេកទេសគ្រប់គ្រាន់ មិនសងបំណុល ឬមិនបង់ចំណូលជូនរដ្ឋ ជាដើម។
ជាមួយគ្នានេះ ក្រសួងជំរុញឲ្យប្រតិបត្តិករទូរគមនាគមន៍ទាំងអស់ អនុវត្តឱ្យបានពេញលេញតាមច្បាប់ បទប្បញ្ញត្តិ និងលក្ខខណ្ឌនៃអាជ្ញាបណ្ណ៕ដោយ៖បញ្ញាស័ក្តិ
