កំពង់ចាម៖ ក្រសួងអប់រំ យុវជន និងកីឡា បានសម្ពោធបណ្ណាល័យមជ្ឈមណ្ឌលគរុកោសល្យភូមិភាគកំពង់ចាម ដែលបានរៀបចំជួសជុលកែលម្អធ្វើទំនើបកម្មទាំងផ្នែកហេដ្ឋារចនាសម្ព័ន្ធទាំងផ្នែកបរិក្ខារ និងប្រព័ន្ធបច្ចេកវិទ្យាគ្រប់គ្រងឲ្យសមស្របតាមលក្ខណ:បច្ចេកទេស។ ការរៀបចំ និងកែលម្អបណ្ណាល័យនេះគឺធ្វើឡើងក្នុងគោលបំណងលើកកម្ពស់ការរៀន និងបង្រៀន បណ្ដុះទម្លាប់អាន និងការស្រាវជ្រាវ ព្រោះបណ្ណាល័យជាកន្លែងរក្សាទុកនូវចំណេះដឹងគ្រប់បែបយ៉ាង ដែលគ្រូឧទ្ទេស និងគរុសិស្សអាចស្វ័យសិក្សា និងអាចប្រើប្រាស់ក្នុងការបង្រៀន និងរៀន។
ពិធីសម្ពោធនេះត្រូវបានប្រារព្ធឡើងក្រោមអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា អម ដោយ ឯកឧត្តម លោកជំទាវ ថ្នាក់ដឹកនាំ ក្រសួង ប្រធាន នាយកដ្ឋាន មន្ដ្រីជំនាញ គណៈគ្រប់គ្រងមជ្ឈមណ្ឌល លោកគ្រូអ្នកគ្រូ និងគរុសិស្សជាច្រើនរូបផងដែរ នៅថ្ងៃទី២៦ វិច្ឆិកា ២០២០ នៅមជ្ឈមណ្ឌលគរុកោសល្យភូមិភាគខេត្តកំពង់ចាម។
ទន្ទឹមគ្នានេះដែរ ឯកឧត្ដមរដ្ឋមន្ត្រីក៏បានជួបសំណេះសំណាលជាមួយគរុសិស្ស នៃសាលាគរុកោសល្យភូមិភាគ និង វិក្រឹតការខេត្តដែលជាជំនួយការអប្បមាទទូទាំងប្រទេសផងដែរ ដោយឯកឧត្ដមបានផ្ដល់នូវអនុសាសន៍ដល់ប្អូនៗដែលជាគរុសិស្សនិងជាជំនួយការអប្បមាទត្រូវខិតបំពេញតួនាទី និងភារកិច្ចឲ្យបានល្អដើម្បីសម្រចបាននូវយន្តការ ច្បាប់ យត្តិធម៌ តល្លាភាព និងលទ្ធផលទទួលយកបាន ស្របតាមការធ្វើកំណែទម្រង់ប្រឡង ដែលជាមួលដ្ឋានសម្រាប់កណែទម្រង់ប្រព័ន្ធអប់រំទាំងមូល ហើយឯកឧត្ដមបានសង្កត់ធ្ងន់ថា ប្រទេសដែលរីកចម្រើនមិនប្រាកដទៅលើធនធានធម្មជាតិនោះគឺសំខាន់លើធនធានមនុស្សដែលពោរពេញដោយចំណេះដឹង។
មុនបញ្ចប់កម្មវិធីឯកឧត្ដមបណ្ឌិសភាចារ្យ រដ្ឋមន្ដ្រី ក៏បានប្រគល់លិខិតថ្លែងអំណរគុណដល់ ក្រុមការងារដែលបានចូលរួមសហការកសាងបណ្ណាល័យ អង្គការដៃគូនានាព្រមទាំងអង្គភាពពាក់ព័ន្ធក្រោមឱវាទក្រសួងទាំងអស់ដែលបានចូលរួមកសាងនូវសមិទ្ធផលនេះឡើង និងចែកជូននូវសម្ភារអនាម័យមួយចំនួនដល់សាលាគរុកោសល្យ និងម៉ាសដល់គរុសិស្សផងដែរ៕ ដោយ៖បញ្ញាស័ក្តិ
