ព្រះសង្ឃថៃព្រះជន្ម ២១ វស្សា ត្រូវបានសម្លាប់ដោយដំរីព្រៃមួយក្បាលកាលពីថ្ងៃទី២៩ ខែវិច្ឆិកា ឆ្នាំ២០២០ ខណៈពេលលោកទៅធ្វើសមាធិនៅលើភ្នំមួយក្នុងស្រុក Saeka នៃខេត្ដ Kampaengphet ។
អ្នកភូមិក្នុងតំបន់បានស្វែងរកព្រះសង្ឃរងគ្រោះ បន្ទាប់ពីលោកមិនបានបង្ហាញខ្លួន និមន្តមកទទួលយកចង្ហាន់ពីពួកគេដូចសព្វមួយដង។ ក្រោយមក ពួកគេក៏បានរកឃើញថា លោកបានសុគតដោយមានរបួសយ៉ាងធ្ងន់ធ្ងរ ដែលគេអះអាងថាជនល្មើសគឺជាសត្វដំរីតែម្តង។
មេភូមិលោក ក្រៃវ៉ាន់ ណុនទីប៊ុត (Kraiwan Nontibut) បាននិយាយថា ព្រះសង្ឃរងគ្រោះបាននិមន្តចុះពីលើភ្នំប្រហែល ៦ ព្រឹក ជារៀងរាល់ថ្ងៃ ដើម្បីមកទទួលយកចង្ហាន់ពីអ្នកភូមិក្នុងតំបន់។
លោក ក្រៃវ៉ាន់ បានបន្តថា “ព្រះសង្ឃរងគ្រោះមិនបានបង្ហាញខ្លួននៅព្រឹកនេះទេ ហេតុដូច្នេះ ពួកខ្ញុំក៏បានដើរឡើងភ្នំ។ ប៉ុន្តែ អ្វីដែលគួរឲ្យស្លុតរន្ធត់យ៉ាងខ្លាំងនោះ គឺពួកខ្ញុំបានប្រទះឃើញសាកសពរបស់លោក ដែលបានសុគតយ៉ាងអាណោចអាធ័ម”៕ ដោយ៖ លឹម ហុង
