ភ្នំពេញ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាតំណាងរាស្ត្រ បានបញ្ជាក់ថា៖ លទ្ធផលផ្លូវការរូបលោនៅលើ «តេស្តកូវីដ១៩» នៅព្រឹកនេះគឺ « អវិជ្ជមាន» ហើយលោកថា នឹងត្រូវស្នាក់នៅដាច់ពីគ្នានិងតាមដានសុខភាពរបស់ខ្ញុំក្នុងអំឡុងពេល១៤ថ្ងៃ។
លោកហ៊ុន ម៉ានី ថ្លែងថា៖ លោកសូមថ្លែងអំណរគុណយ៉ាងជ្រាលជ្រៅចំពោះមិត្តភក្តិរួមការងារ និងអ្នករាល់គ្នា ដែលបានផ្ញើសារបង្ហាញពីក្តីបារម្ភ និងបានជូនពរចំពោះខ្ញុំ។ ខ្ញុំពិតជារំភើបរីករាយចំពោះពាក្យពេចន៍របស់អ្នក ហើយជាមនោសញ្ចេតនាដ៏ថ្លៃថ្លា ដែលមិនអាចរកពាក្យនិយាយអស់បានពីដួងចិត្ត។
លោកហ៊ុន ម៉ានី មានឈ្មោះក្នុងបញ្ជីរួម៦៦នាក់ ដែលលេខាធិការដ្ឋានរដ្ឋសភាបានផ្ញើទៅរដ្ឋមន្ត្រីសុខាភិបាល សង្ស័យមានការពាក់ព័ន្ធដោយប្រយោលជាមួយលោក ឡូយ សុផាត ជាតំណាងរាស្ត្រ ពាក់ព័ន្ធផ្ទាល់ជាមួយលោកឆែម សាវុធ៕ដោយ៖បញ្ញាស័ក្តិ
