កាលពីពេលកន្លងទៅនេះ រឿងរ៉ាវរបស់គូស្នេហ៍មួយ បានធ្វើឲ្យអ្នកលេងអ៊ីនធឺណិត មានការភ្ញាក់ផ្អើលគ្រប់ៗគ្នា ក្រោយពីបានដឹងថា ពួកគេនាំគ្នាទៅរួមមេត្រីក្នុងរថយន្តនៅកន្លែងស្ងាត់ ហើយប៉ូលិសប្រទះឃើញមានការសង្ស័យក៏ចូលទៅពិនិត្យមើល ស្រាប់តែធ្វើឲ្យពួកគេផ្អើលស្លន់ស្លោ ប្រញាប់ប្រញាល់បើករថយន្តចាកចេញរហូតជួបគ្រោះថ្នាក់។
យោងតាមសារព័ត៌មានជាភាសាម៉ាឡេស៊ី Harian Metro បានឲ្យដឹងថា គូស្នេហ៍មួយគូបានចតរថយន្តនៅកន្លែងស្ងាត់នៃផ្លូវហាយវ៉េ Butterworth រដ្ឋ Penang ប្រទេសម៉ាឡេស៊ី។ ដោយមានការសង្ស័យ ប៉ូលីសល្បាតបានចុះទៅមើលថា តើឡាននោះមានបញ្ហា ឬ យ៉ាងណា។ ប៉ុន្តែ នៅពេលប៉ូលិសចូលកៀក ពួកគេពិតជាស្រឡាំងកាំងតែម្តង ខណៈឃើញគូស្នេហ៍នោះដែលខាងប្រុសអាយុ ១៩ ឆ្នាំ និងខាងស្រីអាយុ ២៥ ឆ្នាំ បែរជាកំពុងបង្កាត់ភ្លើងស្នេហ៍ដ៏រោលរាលក្នុងរថយន្ត។
នៅពេលពួកគេឃើញវត្តមានប៉ូលិសចូលកាន់តែកៀក ពួកគេក៏បានស្រវេស្រវ៉ាលើកខោប្រញាប់ប្រញាល់ បើករថយន្តព្យាយាមគេចពីសមត្ថកិច្ច។ ប៉ុន្តែ ដោយសារតែភាពភ័យស្លន់ស្លោខ្លាំងពេក ជាហេតុធ្វើឲ្យពួកគេបើករថយន្តទៅបុកនឹងម៉ូតូ១គ្រឿងនៅខាងមុខ (បើកស្របទិសគ្នា) ហើយជ្រុលធ្លាក់ចូលក្នុងប្រឡាយទឹកខាងក្រោមផ្លូវតែម្តង។
តែទោះយ៉ាងណា ពិតជាសំណាងហើយ ពួកគេត្រូវបានប៉ូលិសដែលបើករថយន្តប្រដេញតាម បានជួយសង្គ្រោះទាញចេញពីរថយន្តភ្លាមៗ ដោយអ្នកទាំងពីរពុំមានគ្រោះថ្នាក់អ្វីធ្ងន់ធ្ងរនោះទេ តែដោយឡែកអ្នកដំណើរដោយម៉ូតូបានរងរបួសបាក់ជើង និងក៏ត្រូវបានបញ្ជូនទៅសង្គ្រោះនៅឯមន្ទីរពេទ្យផងដែរ។
គូស្នេហ៍នេះត្រូវបានធ្វើតេស្តរកឃើញប្រើប្រាស់គ្រឿងញៀន និងស្រវឹងស្រា ហើយប៉ូលិសក៏បានបញ្ជាក់ថា ពួកគេគឺជានិស្សិតរៀននៅមហាវិទ្យាល័យ Giat MARA ក្បែរនោះ។
នេះជាមេរៀនមួយសម្រាប់គូស្នេហ៍នេះ និងក៏ដូចគូស្នេហ៍ដទៃទៀតផងដែរ ដែលមិនគួរណាមករួមមេត្រីក្នុងរថយន្ត នៅតាមទីសាធារណៈបែបនេះនោះទេ៕ រក្សាសិទ្ធិដោយ៖ លឹម ហុង
