ភ្នំពេញ៖ មហាជននៅលើបណ្តាញសង្គម ពិតមានការចាប់អារម្មណ៍ និងសម្តែងនូវក្តីអាណិតអាសូរជាខ្លាំង ក្រោយពីបានឃើញរូបប៉ុន្មានសន្លឹក បង្ហាញអ៊ំប្រុសមានវ័យចំណាស់ម្នាក់ បានលុតជង្គង់ក្រាបសំពះសុំទោសដល់ម្ចាស់ឡាន Prius ១គ្រឿង ក្រោយពីគាត់បានដឹងខ្លួនខុស ជិះម៉ូតូបណ្តាលឲ្យប៉ះរថយន្ត និងក៏បានដួលរងរបួសខ្លួនឯងផងដែរ។
តែយ៉ាងណា ក្រោយពីមានការជួយសម្របសម្រួលពីសមត្ថកិច្ច និងឃើញអ៊ំប្រុសលុតជង្គង់អង្វរ សូមមេត្តាកុំទារសំណងពីគាត់ព្រោះតែគាត់អត់មានលុយ ម្ចាស់រថយន្តជាប្តីប្រពន្ធក៏ចិត្តមិនដាច់ ក៏បានបញ្ចប់រឿងនៅនឹងកន្លែងកើតហេតុ ដោយពុំទាមទារសំណងអ្វីទាំងអស់ពីលោកអ៊ំនោះទេ។
យ៉ាងណាមិញ ក្រោយពីបានឃើញបែបនេះ នៅមុននេះបន្តិចតារាហ្វេសប៊ុកចិត្តធម៌ អ្នននាងស្រីអូន សម្រស់ធម្មជាតិ បានបង្ហោះសារបង្ហាញក្តីអាណិត និងចង់ជួបអ៊ំប្រុសម្នាក់នោះដើម្បីជួយលុយធ្វើជាដើមទុនខ្លះៗ ដោយអ្នកនាងបានរៀបរាប់យ៉ាងដូច្នេះថា៖ «ហឹម លោកពូអើយថ្វាយបង្គំដល់ដីប្រហែលគាត់ភ័យខ្លាំង មិនដឹងរកលុយឯណាសងឡានឃើញរូបភាពនេះ ខ្លោចចិត្តអាណិតគាត់ណាស់ពុកគេពុកយើង ជិះម៉ូតូដឹកអេដចាយប៉ះជាមួយឡាន គាត់ថ្វាយបង្គំសុំទោសម្ចាស់ឡានអរគុណម្ចាស់ឡាន ដែលអាណិតលើកលែងទោសបងប្អូនដែលស្គាល់លោកពូជួយប្រាប់គាត់ផង ខ្ញុំចង់ផ្ដល់ដើមទុនជូនគាត់រកស៊ី ជួយស៊ែរប្រាប់គាត់ផង បងប្អូននឹកស្រម៉ៃកាលប៉ារត់ម៉ូតូឌុបជួបរឿងប្រហែលនេះ ខ្ញុំខ្លោចចិត្តណាស់ពុកអើយអតីតកាលដែលមិនអាចបំភ្លេចបាន អ្នកក្រទើបយល់អារម្មណ៍នេះ»៕ រក្សាសិទ្ធិដោយ៖ លឹម ហុង
