ភ្នំពេញ៖ អភិបាលរាជធានីភ្នំពេញ លោកឃួង ស្រេង បានថ្លែងប្រាប់អ្នកសារព័ត៌មានក្រោយបញ្ចប់វេទិកាសាធារណៈកាលពីព្រឹកថ្ងៃទី១៩ខែតុលាឆ្នាំ២០១៧ នៅមហោស្រពចេនឡា ខណ្ឌទួលគោលថា ការផ្តួលរំលំរាជរដ្ឋាភិបាល ពីសំណាក់លោកសម រង្ស៊ី តើចង់បានន័យអ្វី ? ដូចជា លន់ នល់ សិរីមតៈ ដែលបានរួមគំនិតគ្នាផ្តួលរំលំ សម្តេច នរោត្តម សីហនុ បាននាំមកនូវវិនាសកម្ម ក្នុងរបបប៉ុល ពត បណ្តាលឲ្យសង្គ្រាមរ៉ាំរ៉ៃជាង៤ទសវត្សរ៍នៅកម្ពុជា។
លោកអភិបាល បានបន្ថែមថា យើងដឹងហើយថា សង្គ្រាមនាំមកនូវវិនាសហិនហោច ទ្រព្យសម្បត្តិប្រជាពលរដ្ឋ ជាពិសេសយើងត្រូវមើលប្រទេសស៊ីរី ជាឧទាហរណ៍ជាក់ស្តែង។
លោកបន្តថា ក្រោយការផ្តួលរំលំសម្តេចសីហនុ ប្រទេសកម្ពុជាកើតសង្គ្រាម ពីឆ្នាំ៧០ ដល់៧៩ ត្រូវទទួលនូវវិនាសកម្មយ៉ាងខ្លោចផ្សា ដែលធ្វើឲ្យប្រជាពលរដ្ឋកម្ពុជាយើងមានបទពិសោធន៍ពេញលេញ ដែលមិនអាចទទួលយកបាន នូវការផ្តួលរំលំតាមរបៀបក្បត់ជាតិនេះទៀតទេ។
ពាក់ព័ន្ធនឹងសំណួរថា ទៅថ្ងៃមុខគណបក្សសង្គ្រោះជាតិត្រូវរំលាយ ហើយសមាជិកបក្សប្រឆាំងបានរៀបចំធ្វើបដិវត្តន៍ពណ៌ឬក៏រៀបចំធ្វើបាតុកម្មនៅរាជធានីភ្នំពេញ តើអាជ្ញាធរនឹងរៀបចំសណ្តាប់ធ្នាប់តាមរបៀបម៉េចនោះ? លើកករណីនេះ ត្រូវបានលោកអភិបាលរាជធានីភ្នំពេញ បញ្ជាក់ថា ប្រទេសខ្មែរមានច្បាប់ ហើយប្រទេសកម្ពុជាមានបូរណភាពទឹកដី មានច្បាប់របស់កម្ពុជា មានរដ្ឋធម្មនុញ្ញច្បាស់លាស់ ។ ដូច្នេះយើងត្រូវមើលច្បាប់ បើធ្វើបាតុកម្មប្រឆាំងនឹងច្បាប់ មិនមែនជាប្រជាធិបតេយ្យនោះទេ ហើយប្រជាធិបតេយ្យគឺស្ថិតនៅក្នុងរង្វង់ច្បាប់ ។ លោកបញ្ជាក់ថា ប្រសិនបើធ្វើអ្វីដែលចេញពីរង្វង់ច្បាប់ គឺអនាធិបតេយ្យ នៅពេលនោះរាជរដ្ឋាភិបាលក៏ដូចជាអាជ្ញាធរមិនអនុគ្រោះបាននោះទេចំពោះបញ្ហានេះទេ ពីព្រោះថាពួកយើងខ្ញុំ ក្នុងនាមជានីតិប្រតិបត្តិ ដូច្នេះប្រជាពលរដ្ឋទាំងអស់ត្រូវគោរពច្បាប់ ប៉ុន្តែបើប្រជាពលរដ្ឋមិនគោរពច្បាប់ យើងត្រូវណែនាំឲ្យប្រជាពលរដ្ឋគោរពច្បាប់។
ទោះយ៉ាងណា ពាក់ព័ន្ធនឹងគម្រោងការរបស់បក្សប្រឆាំងដែលមានបំណងគៀរគរប្រជាពលរដ្ឋដើរតាមបក្សប្រឆាំង ក្នុងការតវ៉ាបាតុកម្មនោះ ត្រូវបានលោកឃួង ស្រេង អភិបាលរាជធានីភ្នំពេញ បានផ្ញើសារទៅប្រជាពលរដ្ឋថា “អ្នកដែលមានគម្រោងចង់ធ្វើបាតុកម្ម ដើម្បីទាមទារដោះលែងទណ្ឌិតនេះ ដោះលែងទណ្ឌិតនោះ សូមឲ្យអស់លោក លោកស្រីទាំងអស់ពិនិត្យឡើងវិញ ហើយមើលឲ្យបានច្បាស់អំពីច្បាប់នៅប្រទេសកម្ពុជា ថាតើអស់លោកធ្វើនេះជាសេរីភាព ក៏ការបំពានច្បាប់ ប៉ុន្តែបើការបំពានច្បាប់គឺកំពុងតែដើរផ្លូវខុសហើយ ហើយសូមវិលត្រឡប់ចូលមកផ្លូវត្រូវវិញ គឺជាការគោរពច្បាប់នៅកម្ពុជា ។ កម្ពុជា ជាប្រទេសអធិបតេយ្យ មានបូរណភាពទឹកដី ច្បាស់លាស់ មានច្បាប់ទម្លាប់ត្រឹមត្រូវ ដូច្នេះសូមឲ្យគោរពច្បាប់ ។ មិនអាចប្រជាជនណាម្នាក់ មិនគោរពច្បាប់បាននោះទេ”៕ ដោយ៖កូឡាប
