ភ្នំពេញ៖ បុគ្គលិកក្រុមហ៊ុនអ័រគីដេវីឡាម្នាក់ត្រូវបានតំណាងក្រុមហ៊ុនប្តឹងប៉ូលិសមូលដ្ឋានអោយចាប់ខ្លួនចាត់ការតាមច្បាប់ កាលពីថ្ងៃទី២១ ខែកុម្ភៈ ឆ្នាំ២០១៨ បន្ទាប់ពីបានរកឃើញថា ជននេះបានរំលោភទំនុកចិត្តលួចយកលុយរបស់ក្រុមហ៊ុន ប្រមាណជាង៥ម៉ឺនដុល្លារអាមរិក រួចមកតាមរយៈការទទួលយកលុយពីអតិតិថិជនដែលបានទិញផ្ទះ។
សមត្ថកិច្ចនិយាយថា៖ ជនជាប់ចោទខាងលើឈ្មោះ ចាន់ សេរីវឌ្ឍន៍ ហៅ វឌ្ឍន៍ ភេទប្រុសអាយុ២៦ឆ្នាំ មានទីលំនៅក្នុងបុរីប៉េងហួត នៅ សង្កាត់ភ្នំពេញថ្មី ខណ្ឌសែនសុខ មុខរបរបុគ្គលិក ផ្នែកសម្របសម្រួល។
ប៉ូលិសនិយាយថា ជនសង្ស័យ ខាងលើត្រូវបានចាប់ខ្លួន តាមបណ្តឹងរបស់ លោកឈិត បូរ៉ាវុធ អាយុ៥២ឆ្នាំ មានទីលំនៅភូមិទ្រា សង្កាត់ស្ទឹងមានជ័យ មុខរបរ ជាមេធាវីការពារក្តី ប្រចាំក្រុមហ៊ុន អ័រគីវីឡា២ បានប្តឹងមកសមត្ថកិច្ចនគរបាលខណ្ឌសែនសុខ ថា ជនឈ្មោះ ចាន់ សេរីវុឌ្ឍ កាលពីអំឡុងឆ្នាំ២០១៥ គាត់បានមកដាក់ពាក្យសុំបំរើការងារផ្នែកសម្របសម្រួល នៅ ក្រុមហ៊ុន អ័រគីដេវីឡា២ មានទីតាំងនៅសង្កាត់ទឹកថ្លា ក្នុងខណ្ឌសែនសុខ។ លោកបានបន្តថា ក្រោយមកនៅថ្ងៃទី១២ខែកុម្ភៈ ឆ្នាំ២០១៨ខាងក្រុមហ៊ុនបានរកឃើញថា លោកចាន់ សេរីវឌ្ឍន៍មានកំហុសពីបទរំលោភទំនុកចិត្ត ដោយគាត់បានក្លែងលិខិតស្នាមយកលុយពីអតិថិជនចំនួន៥៥២៣០ដុល្លារអាមេរិក ដោយការលក់ផ្ទះរបស់ក្រុមហ៊ុន ជូនអតិថិជន។ នៅថ្ងៃទី២១ ខែកុម្ភៈ ឆ្នាំ២០១៨ បន្ទាប់ពីមេធាវីបានទទួលឯកសារភស្តុតាងជាក់លាក់ ទើបមេធាវីតំណាងក្រុមហ៊ុនបានប្តឹងមកសមត្ថកិច្ចអោយឃាត់ខ្លួនជននេះចាត់ការតាមផ្លូវច្បាប់តែម្តង៕ ដោយ៖បញ្ញាស័ក្តិ