ភ្នំពញ ៖ ម៉ូតូ២គ្រឿងបុកគ្នាលាន់ដូចរន្ទះ រងរបួសធ្ងន់ម្នាក់ ស្រាលម្នាក់ ម៉ូតូខូចខាតខ្ទេចទាំងសងខាង ខណៈដែលចេញពីលេងបាល់ទះវិញ ឆ្លងផ្លូវត្រូវម៉ូតូមួយគ្រឿងទៀត មកផ្លូវត្រង់បុកចំកាបាំងម៉ូតូ បណ្ដាលឲ្យដួលបោកអូសដាច់មេជើងម្នាក់ និងម្នាក់ទៀតចុកឆ្អល់ ចំណែកម៉ូតូខូចខាតទាំងសងខាង។
កើតហេតុ នៅវេលាម៉ោង៥និង២០នាទី តាមបណ្ដោយផ្លូវ១៣២ ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ។
តាមប្រភពនៅកន្លែងកើតហេតុ បានប្រាប់ក្រុមការងារCENឲ្យដឹងថា មុនកើតហេតុគេឃើញម៉ូតូម៉ាកវ៉េវពណ៌ខ្មៅពាក់ផ្លាកលេខភ្នំពេញ 1IE-2164 បើកបរដោយបុរសម្នាក់ ទិសដៅពីជើងទៅត្បូង ក្នុងល្បឿនលឿនល្មម ពេលមកដល់ត្រង់ចំណុចកើតហេតុ ក៏មានម៉ូតូមួយគ្រឿងទៀត ម៉ាកសង់២០១៩ ពណ៌ខ្មៅពាក់ផ្លាកលេខភ្នំពេញ 1HM-8936 ចេញពីកន្លែងលេងបាល់ ខាងក្រោយអតីតក្លឹបបេសរ៉ូម ឆ្លងផ្លូវបត់ពីត្បូងទៅជើង លឿនមិនប្រយ័ត្ន ត្រូវម៉ូតូវ៉េវបុកចំចង្កឹះលេខ បណ្ដាលឲ្យអ្នកបើកម៉ូតូសង់ដួលបោកអូសដាច់មេជើងខាងឆ្វេង ត្រូវរថយន្តសង្គ្រោះដឹកទៅព្យាបាលនៅមន្ទីរពេទ្យហុងហាក់ ចំណែកអ្នកបើកម៉ូតូវ៉េវបោកនិងដៃចង្កូតចុកឆ្អល់នៅកន្លែងកើតហេតុ និងខូចខាតម៉ូតូទាំងសងខាង។
ក្រោយពេលកើតហេតុ ភ្លាមៗសមត្ថកិច្ចប៉ុស្តិ៍សហការជាមួយជំនាញចរាចរណ៍ខណ្ឌ បានចុះមកដល់បានជួយសម្របសម្រួល ដោយមនោសញ្ចេតនា ទើបខាងម៉ូតូវ៉េវ ព្រមជួយសងចំនួន50$បញ្ចប់រឿង ៕ រក្សាសិទ្ធិដោយ៖ សារឿន
